Myanmar Fortress Wealth Garment Co.,Ltd အထည်ချုပ် စက်ရုံက အလုပ်သမားဥပဒေပါ ခွင့်ရက် ခံစားခွင့်တွေမပေးဘဲ ရက်တွက် ဒေးကြေးအပါအဝင် ရပိုင်ခွင့်တွေ ဖြတ်တောက် ခံရတယ်လို့ မြန်မာနိုင်ငံကုန်ထုတ်နှင့် စက်မှုလက်မှု အလုပ်သမားများအဖွဲ့ချုပ် (IWFM) ကို အလုပ်သမားတွေက ပြောပါတယ်။ စက်ရုံက ဒေးကြေး ၁၂,၀၀၀နဲ့ ရက်မှန်ကြေး ၃၀,၀၀၀ သတ်မှတ်ပေးထားပြီး ရှောင်တခင်၊ ဆေးခွင့်တွေ မရဘူးလို့ အလုပ်သမားတွေက ပြောထားတာပါ။
“လူမှုဖူလုံရေးကြေးသာ လတိုင်း ထည့်နေရတာ၊ လူမှုဖူလုံရေးဆေးခွင့် ခံစားခွင့်မပေဘူး။ အလုပ်တစ်ရက်ပျက်တာနဲ့ ဒေးကြေး၊ ရက်မှန်ကြေးး အထည်ကြေး အထည်ကြေး အကုန်အဖြတ်ခံရတယ်။
လူမှုဖူလုံရေး ဆေးခွင့်နဲ့ရက်ပျက်ရက် ပိုဆိုးတယ်။ ပိုက်ဆံဖြတ်တဲ့အပြင် ရက်ပျက်တဲ့လ တစ်လစာလုံးကို ဒေးကြေး၆၈၀၀ ကျပ်တွက်ပြိး အချိန်ပိုအိုတီကြေး ၁၂၀၀နဲ့ပဲ ရှင်းပေးတော့တယ်။ နေမကောင်းရင်တောင် အလုပ်မပျက်ရဲဘူး။” လို့ အလုပ်သမားတွေက ပြောပါတယ်။
လုပ်ငန်းခွင်အတွင်း စာရေးမ၊ အောစူ ပါတွေက အလုပ်သမားတွေကို စောင့်ကြည့်ပြီး အလုပ် မလုပ်ဘူးဆိုကာ လစာမှာ ရက်တွက် ဒေးကြေး၆၈၀၀ ကျပ်အချိန်ပိုအိုတီ ၁၂၀၀ကျပ်နဲ့ ရှင်းပေးတော့တယ်လို့လည်း ပြောပါတယ်။
အလုပ်သမား ၆၀ ချုပ်တဲ့ စက်လိုင်းတ လိုင်းကို အထည်စံချိန် တနာရီ အထည် ၉၀ ကျော်တောင်းတယ်လို့လည်း အလုပ်သမားတွေက ပြောပါတယ်။ အထည်ကြေး စက်ရုံမို့ အလုပ်သမားတွေမှာ ဆန္ဒရှိသလို ချုပ်မရဘဲ သတ်မှတ် စံချိန်မပြည့်ဘူးပါက အောစူပါ၊ စူပါတွေက အော်ဟစ် ဆဲဆိုတယ်လို့ ပြောပါတယ်။
“ ချုပ်ရတဲ့ အထည်က လက်ဝင်တဲ့ ဆွဲသား ဝယ် လွန်ထည်တွေ၊ တောင်းတဲ့ အထည်ရဖို့ အလုပ်သမားတွေက အိမ်သာတောင် မသွားရဘူး၊ တချို့ဆို ရေတောင် မသောက်ရဘူး။ ဒီလိုဖြစ်အောင် အောစူပါ၊ စူပါတွေက ဖိအားပေး ခိုင်းနေတာ.” လို့ အလုပ်သမားတဦးက ပြောဆိုပါတယ်။
Myanmar Fortress Wealth Garment Co.,Ltd အထည်ချုပ် စက်ရုံက ရန်ကုန်မြို့၊ လှိုင်သာယာမြို့နယ်၊ မြစိမ်းရောင်စက်မှုဇုန်မှာ ဖွင့်ထားပြီး တရုတ်နိုင်ငံသားပိုင် စက်ရုံဖြစ်ပါတယ်။ အလုပ်သမား ၁၅၀၀ကျော်လုပ်ကိုင်နေပြီး SPORT-TEK တံဆိပ် အထည်တွေ ချုပ်လုပ်နေပါတယ်။
