၂၀၂၃ ခုနှစ် ဇူလိုင်လကုန်တွင် MOU သက်တမ်း လေးနှစ်ပြည့်မယ့် မြန်မာအလုပ်သမားတွေအတွက် ထိုင်းနိုင်ငံဘက်မှာ ဖြေလျှော့တာတွေ လုပ်ဆောင်သွားမယ်လို့ ထိုင်းအလုပ်အကိုင်ဦးစီးဌာနရဲ့ ထုတ်ပြန်ချက်ကိုကိုးကားပြီး အစ်ဆာရာမြန်မာ -Issara page မှာ ဖော်ပြထားပါတယ်။

ထိုင်းအလုပ်အကိုင်ဦးစီးဌာန၊ အထွေထွေညွှန်ကြားရေးမှူးချုပ်ဟာ ဇွန်လ (၁၉)ရက် မှာ သက်ဆိုင်ရာတာဝန်ရှိသူတွေနဲ့တွေ့ဆုံပြီး ထိုင်းနိုင်ငံရောက် မြန်မာအလုပ်သမားတွေအတွက် လုပ်သားစီမံ ခန့်ခွဲရေးဆိုင်ရာ ကိစ္စရပ်တွေကို ဆွေးနွေးခဲ့တယ်လို့ သိရပါတယ်။

ဆွေးနွေးမှုရလဒ်အနေနဲ့ ဇန်နဝါရီ ၁ ရက် ၂၀၂၂ ခုနှစ်ကနေ ဇူလိုင် ၃၁ ရက်၂၀၂၃ ခုနှစ်အတွင်း MOU စာချုပ်သက်တမ်း လေးနှစ် ကုန်ဆုံးမယ့် မြန်မာလုပ်သားတွေအနေနဲ့ မိခင်နိုင်ငံမှာ သက်တမ်းပြန်တိုးပြီး ထိုင်းနိုင်ငံကို ပြန်လည်ဝင်ရောက်လာချိန်မှာ အချိန်နဲ့ကုန်ကျစရိတ် လျှော့ချနိုင်ဖို့အတွက် ရက်ပေါင်း (၃၀) အတွင်း အပြီးသတ် လုပ်ဆောင်ဖို့၊ အလုပ်သမားတွေရဲ့ အကျိုးခံစားခွင့်ကိုထောက်ရှုပြီး ဗီဇာကြေးပေးသွင်းငွေ ဘတ် (၂၀၀၀) ကနေ ဘတ်(၅၀၀) ထိ လျှော့ချဖို့၊ အလုပ်ရှင်နဲ့ အလုပ်သမားကြား အလုပ်ခန့်ထားရေး နှစ်ဦးသဘောတူစာချုပ်ချုပ်ဆိုပြီးမှ အလုပ်နေရာကို မခေါ်ဆောင်နိုင်တဲ့အလုပ်ရှင်တွေကို ထိရောက်တဲ့ အရေးယူမှု လုပ်ဆောင်ဖို့၊ MOU စနစ်အတိုင်းသတ်မှတ်ထားတဲ့ လုပ်ငန်းခွင်အခြေအနေရရှိစေဖို့နဲ့ အလုပ်ခန့်ထားရေး စာချုပ်တွေကိုလည်း MOU လုပ်ထုံးလုပ်နည်းအတိုင်း ဆက်လက် သက်တမ်းတိုး ဆောင်ရွက်နိုင်ဖို့ စတာတွေပါဝင်တယ်လို့ သိရပါတယ်။

လက်ရှိမှာ ထိုင်းနိုင်ငံကို MOU စနစ်နဲ့ သွားရောက် လုပ်ကိုင်သက်တမ်းတိုးတဲ့ အလုပ်သမားတွေဟာ MOU စာချုပ်ပါ လုပ်ငန်းခွင်နဲ့ တူညီမှုမရှိတာ၊ အမှန်တကယ် အလုပ်မရရှိတာတွေ ရှိနေတယ်လို့ ထိုင်းနိုင်ငံ အခြေစိုက် အလုပ်သမားအရေး ကူညီဆောင်ရွက်ပေးနေတဲ့ အဖွဲ့အစည်းတွေဆီက သိရပါတယ်။

#MyanmarLabourNews 
Photo-ပုံဟောင်း