Mei Jie Myanmar Clothing & Accessories Co.,ltd ပိုင် အထည်ချုပ် စက်ရုံမှာ စက်ချုပ်အလုပ်သမားတွေကို finishing ဌာနဆီ အတင်းအကျပ်ပြောင်း လုပ်ကိုင်ခိုင်းတဲ့ အပြင် ဌာနအလုပ်တွေ မလုပ်နိုင်လို့ အလုပ်ထုတ်ခံရတဲ့ အလုပ်သမားတွေ ရှိနေတယ်လို့ သိရပါတယ်။
“ finishing ပိုင်းရောက်လို့ မလုပ်နိုင်ရင် အလုပ်က ထုတ်တယ်။ အချိန်ပိုအိုတီခေါ်လို့ မသွားချင်လဲ အထုတ် ခံရမှာ စိုးတာနဲ့ သွားရတယ်။ အလုပ်က မထွက် ထွက်အောင် လုပ်တော့ ပြသနာအဖြစ်မခံချင်လို့ ကိုယ့်ဘာသာ ကိုယ် အလုပ်ထွက်သူတွေလည်း ရှိတယ်။ “ လို့ အမျိုးသမီး အလုပ်သမားတဦးက ပြောပါတယ်။
နေ့စဉ် စက်ရုံက ပုံမှန် အချိန်ပို ၃ နာရီ လုပ်ကိုင်ခိုင်းတဲ့ အပြင် ညနက် အောနိုက် အချိန်ပို ၊ နောက်မနက်အထိ အောင်လင်း အချိန်ပိုတွေကို မဖြစ်မနေ လုပ်ကိုခိုင်းတယ်လို့လည်း ပြောပါတယ်။ ဒါ့အပြင် အချိန်ဆင်းအပြီး နေအိမ်ပြန်ရာမှာ ကြိုပို့ယာဉ်တွေ အချိန်မမှန်တာကြောင့် အလုပ်သမားတွေမှာ လူမှုဒုက္ခတွေနဲ့ ကြုံတွေ့နေရ တာပါ။
ကြိုပို့တွေရှိပေမဲ့ နောက်ကျတယ်။ အလုပ်ပြီးတာက မိုးမလင်းခင်၊ အိမ်ပြန်ရောက်တော့ နေထွက်နေပြီ၊ အိပ် ဖို့လည်း အဆင်မပြေ၊ ကျန်းမာရေး လူမှုရေးပြဿနာတွ နဲ့ ကြုံရတယ်။ စက်ရုံထဲလည်း အထည်စံချိန် မပြည့်တော့ ဆဲဆိုခံရနဲ့ အသံကျယ်ကျယ် ဆိုရင်ကို လူက လန့်နေတယ်” လို့ စက်ချုပ်အမျိုးသမီး အလုပ်သမားတဦးက ပြောပါတယ်။
ဥပဒေအရ ခံစားခွင့်ရှိတဲ့ ရှောင်တခင်ခွင့် ၊ ဆေးခွင့်တွေနဲ့ ခွင့်ခံစားခွင့်တွေကို အလုပ်ရှင်ဘက်က ခွင့်မပြုဘဲ အလုပ်ထုတ်တဲ့ အထိ အရေးယူခံရတယ်လို့ အလုပ်သမားတဦး က ပြောပါတယ်။
ခွင့်မဲ့ ဖြစ်ဖြစ် ခွင့်တိုင်းကြားလို့ ပဲ ဖြစ်ဖြစ် ရက်ပျက်တာနဲ့ ဒေးကြေး ၊ ၁၂၀၀၀၊ ရက်မှန်ကြေး တစ်ရက်အတွက် ၂၀၀၀၀ အဖြတ်ခံရတယ်။ ဆေးခွင့်ရလို့ အလုပ်ပျက်တာများတယ်ဆိုပြီး အလုပ်ကထုတ်တယ်။ နေမကောင်းရင် ခွင့်မယူရဲဘူး။ ဒါတွေကို Wcc တွေက ဖြေရှင်းပေးဖို့နေနေသာသာ သူတို့တောင်အလုပ် မထုတ်ခံရအောင် ကြည့်ပြီးနေ နေရတဲ့ .” လို့ ပြောထားပါတယ်။
Mei Jie Myanmar Clothing & Accessories Co.,ltd စက်ရုံက ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်း စက်မှူဇုန်၊ ဦးဖိုးလှိုင်လမ်းမှာ ဖွင့်လှစ်ထားတဲ့ တရုတ်နိုင်ငံသားပိုင် စက်ရုံဖြစ်ပါတယ်။ အလုပ်သမား၂၀၀၀ ဝန်းကျင်လုပ်ကိုင်နေပြီး Aunely, Coen, တံဆိပ် အထည်တွေ ချုပ်လုပ်နေတယ်လို့ သိထားပါတယ်။
