Mai Yi Bei Garment Manufacturing Co.Ltd အထည်ချုပ် စက်ရုံဘက်က အချိန်ပိုနာရီ ကွာခြားမှုတွေကို တာဝန်ယူဖြေရှင်းပေးတာမရှိတဲ့အပြင် တာဝန်ရှိသူ ခေါင်းဆောင်တွေရဲ့ ဘက်လိုက်မှုတွေကြောင့် အလုပ်သမားတွေ မှာ လုပ်ခလစာ နစ်နာနေရတယ်လို့ အလုပ်သမားတွေက ပြောပါတယ်။
“အလုပ်သမားတွေ တစ်လလုံး အလုပ်ဆင်းပြီး ဆင်းရတဲ့ အချိန်ပို အိုတီနာရီတွေနဲ့ အလုပ်ရှင်ဘက်က ပေးတဲ့ ot နာရီကွာနေရင်လဲ တာဝန်ယူပြီး ဖြေရှင်း ပေးတာမရှိဘူး။ ဘယ်သူကိုမှာလည်း သွားပြောလို့ မရဘူး။ အလုပ်ရှင်က ဒေးကြေးထောက်ပံ့ကြေး ကျပ် ၁၀၀၀၀ ပေးမယ်ဆိုပြီး လစာထုတ်တော့ အဲဒီ ၁၀၀၀၀ ကို အပြည့်တွက် မပေးဘူး။ ရုံးပေါ်ကို သွားမေးတော့လဲ သေချာလဲ ရှင်းမပြဘူး။ အဲလို မပေးလဲ အလုပ် တစ်ရက် ပျက်ရင် ဖြတ်လိုက်တာက လေးငါးခြောက်သောင်း ဖြတ်တာ။” လို့ အလုပ်သမားတွေက ပြောပါတယ်။
အချိန်ပို တဆက်တည်းလုပ်ကိုင်ရပြီး လက်ရှိ ည ၇ နာရီခွဲအထိ လုပ်ကိုင်နေရတယ်လို့ အလုပ်သမားတွေက ပြောပါတယ်။ စက်ရုံဘက်က အရေးတကြီး ဂိတ်ပတ်တောင်းလည်း မရသလို၊ ခေါင်းဆောင်တွေ စူပါတွေရဲ့ဘက်လိုက်မှုက လုပ်ခလစာတွေ နစ်နာရတယ်လို့ အလုပ်သမားတဦး က ပြောပါတယ်။
“ အလုပ်အတူတူ ၊ အထည် အတူတူရတာကို၊ လစာကြတာ့ စူပါတွေရဲ့ အမျိုးတွေ၊ စူပါတွေနဲ့ အဆင်ပြေတဲ့ သူတွေ ဆိုရင် တစ်သိန်းလောက် ပိုရကြတယ်။ ခွဲခြားတာတွေကဆို ထမင်းစားဆောင်ခုံ မလုံလောက်လဲ HR က လုပ်မပေးဘူး။ ဒါ့ထက်ဆိုးတာ လုပ်သက် ခြောက်လကျော်တာတောင် EC စာချုပ် ချုပ်မပေးဘူး။” လို့ ပြောပါတယ်။
စက်ရုံဘက်က ဥပဒေပါ ခွင့်တွေမပေးတာ၊ အလုပ်ပျက်ပါက ဒေးကြေး ကျပ် ၁၀၀၀၀၊ ရက်မှန်ကြေး ကျပ် ၁၀၀၀၀ ဖြတ်တောက်ခံရပြီး အသက်မပြည့်တဲ့ လူရွယ်လုပ်သားတွေကို တန်းတူခိုင်းစေနေတယ်လို့ အလုပ်သမားတွေက ပြောပါတယ်။
“လူငယ်၊ လူရွယ် အလုပ်သမား ၁၄၊၁၅၊၁၆ အရွယ်တွေ ၅၀ကျော်ကို ခိုင်းနေတယ်။ နေ့စားလုပ်သားတွေဆို ဒေးကြေးပဲရတယ်။ ရက်မှန်ကြေး၊ ထောက်ပံ့ကြေး၊ တနင်္ဂနွေနေ့ တွေ အတွက် မရကြဘူး။”လို့ အလုပ်သမားတွေက ပြောပါတယ်။
Mai Yi Bei Garment Manufacturing Co.Ltd အထည်ချုပ်က တရုတ်နိုင်ငံသားပိုင်ဆိုင်ပြီး အလုပ်သမား ၁၂၀၀ လောက် လုပ်ကိုင်နေတယ်လို့ အလုပ်သမားတွေက ပြောပါတယ်။ စက်ရုံရဲ့ ချိုးဖောက်မှုတွေကြောင့် အလုပ်သမားတွေဘက်က မကြာခဏ တိုင်ကြားကြပေမဲ့ ချိုးဖောက်မှုတွေ ဆက်ရှိနေတာလို့ မြန်မာနိုင်ငံကုန်ထုတ်နှင့်စက်မှုလက်မှု အလုပ်သမားများ အဖွဲ့ချုပ်(IWFM) ဆီက သိရပါတယ်။
ချိုးဖောက်မှုတွေ ရှိနေတဲ့ Mai Yi Bei Garment Manufacturing Co.Ltd စက်ရုံက ရန်ကုန်မြို့၊ လှိုင်သာယာမြို့နယ်၊ ရွှေလင်ဗန်းစက်မှုဇုန်၊ ပိတောက်လမ်းမှာ ဖွင့်လှစ်ထားပြီး GIORDANO ၊ RESERVED စတဲ့ တံဆိပ်တွေချုပ်လုပ်တယ်လို့ အလုပ်သမားတွေက ပြောဆိုထားပါတယ်။
