Jin Shi Yuan Garment Co., Ltd အထည်ချုပ်စက်ရုံက အလုပ်သမားတွေရဲ့ ဆန္ဒမပါဘဲ အချိန်ပို အတင်းအကျပ် လုပ်ကိုင်ခိုင်းစေနေတယ်လို့ သိရပါတယ်။ အချိန်ပို ညနက် ၉ နာရီ ဒါမှမဟုတ် အော်လင်းအောနိုက် တွေ လုပ်ကိုင်ပေးရတာလို့ အလုပ်သမားတွေက ပြောပါတယ်။
“အချိန်ပို ည ၉ နာရီ၊ အော်လင်း၊ အော်နိုက်တွေ ဆင်း ရတယ်။ တနင်္ဂနွေတွေလည်း မပိတ်ဘူး ။ အချိန်ပိုကို ငြင်းလိုမရဘူးး မဆင်းရင် နောက်နေ့ အလုပ်မလာနဲ့လို့ စက်ရုံကရော ခေါင်းဆောင်တွေကပါ ပြောထားတယ်။ နောက်အချိန်ပိုကြေးကို ဒေးကြေးနဲ့ တွက်ပေးတာမဟုတ်ဘူး ၇၈၀၀ နဲ့ တွက်ထားတာ။” လို့ ပြောပါတယ်။
ဒါ့အပြင် အလုပ်ပိတ်ရက်တွေမှာ သတ်မှတ်ဒေးကြေး ၁၁၀၀၀ မပေးဘဲ ၇၈၀၀ နဲ့သာ စက်ရုံဘက်က တွက်ချက် ပေးတယ်လို့ အလုပ်သမားတွေက ပြောပါတယ်။ လုပ်ငန်းခွင်မှာ နေ့စားအလုပ်သမားတွေကို အမြဲတမ်း ခန့်ထား တာ မရှိပဲ အလုပ်မျိုးစုံကို လုပ်ကိုင်ခိုင်းတယ်လို့ အလုပ်သမားတွေက ပြောပါတယ်။
“ နေ့စားအလုပ်သမားတွေက လုပ်သက် ၃ လကျော်၊ ၁ နှစ်ကျော်တွေအထိ ရှိနေပြီ။ နေ့စားအနေနဲ့ပဲ စက်ရုံက ခန့်ထားတာ၊ တခြားအလုပ်သမားတွေလို့ ခံစားခွင့် မပေးဘူး။ လုပ်ငန်းခွင်ထဲမှာ အလုပ်မျိုးစုံ ခိုင်းတယ်။ အမြဲတမ်း အလုပ်သမား ခန့်ပေးဖို့ ပြောတော့ “အလုပ်ထွက်လိုက်ပါ၊ မထွက်ရင် အလုပ် ထုတ်မယ်လို့” ပြောတယ်” လို့ ပြောဆိုပါတယ်။
ပုံမှန်လည်ပတ်နေတဲ့ လုပ်ငန်းခွင်တွေမှာ အလုပ်သမားတွေကို အစမ်းခန့်ကာလပြီးနောက် အမြဲတမ်း ဝန်ထမ်းအဖြစ် ခန့်အပ်ရမှာဖြစ်သလို ဘယ်အလုပ်သမားမဆို တစ်ပတ် အလုပ်ချိန် ၄၄ နာရီ ပြည့်အောင် လုပ်ကိုင်ခဲ့ပါက ရက်သတ္တပတ်အလုပ်ပိတ်ရက်ကို လုပ်ခလစာနှင့်အတူ ခံစားခွင့်ရှိတယ်ဆိုတာကို ဥပဒေမှာ ပြဌာန်းထားတယ်လို့ မြန်မာနိုင်ငံ ကုန်ထုတ်နှင့် စက်မှုလက်မှုအလုပ်သမားများအဖွဲ့ချုပ် - IWFM တာဝန်ရှိသူက ပြောတယ်။
အလုပ်သမားသမားတွေ ခွင့်ယူလိုပါက ကြိုတင်ခွင့်တင်ရပေမဲ့ ခွင့်တင်လည်းမပေးဘူးလို့ အလုပ်သမားတွေက ပြောပါတယ်။ လုပ်ငန်းခွင်က သောက်ရေမှာ ရေသန့်မဟုတ်တဲ့အပြင် တခြား သုံးရေပိုက်တွေနဲ့ ချိတ်ဆက် ထားတယ်လို့ အလုပ်သမားတွေက ပြောပါတယ်။
“သောက်ရေသန့် မဟုတ်ဘူး။ ရေပိုက်မှ ရေပဲ၊ အဲ့ရေက သုံးရေ၊ အိမ်သာရေတွေနဲ့ ချိတ်ထားတာ။ ရေစင် ကလည်း အတူပဲ။ ရေသောက်ရင် သံချေးနံ့နဲ့ တခြား အနံ့တွေရတယ်။ အခုလို ရာသီဥတု ပူလာရင် ရေသောက်ဖို့ ပိုခက်လာတယ်လို့ ပြောပါတယ်။
အလုပ်သမားတွေအတွက် စီစဉ်ပေးထားတဲ့ ကြိုပိုယာဉ်တွေနဲ့ အလုပ်သမား မမျှတလို့ ယောက်ျားလေး၊ မိန်းကလေး အကုန်တွယ်စီးရတယ်လို့ အန္တရာယ်တွေနဲ့ ရင်ဆိုနေရတယ်လို့ အလုပ်သမားတွေက ပြောပါတယ်။
“လုပ်ငန်းခွင်ညှိနှိုင်းရေး (WCC) အဖွဲ့ရှိပါတယ်။ ဒီကိစ္စတွေကို ညှိနှိုင်းဖြေရှင်းမပေးတဲ့ အပြင် အလုပ်ရှင် ခိုင်းသမျှ လုပ်ကိုင်ပေးတေယ်” လို့ အလုပ်သမားတွေက ပြောထားပါတယ်။
Jin Shi Yuan Garment Co.,Ltd အထည်ချုပ် စက်ရုံက ရန်ကုန်မြို့ ၊ရွှေပြည်သာမြို့နယ်၊သာဓုကန်စက်မှုဇုန် ကျောက်စိမ်းမပေါ် မှာ ဖွင့်လှစ်ထားပြီး အလုပ်သမား ၁,၀၀၀ ဝန်းကျင် လုပ်ကိုင်နေတဲ့ တရုတ် နိုင်ငံသားပိုင် စက်ရုံဖြစ်ပါတယ်။
