စက်ရုံဘက်က အောက်တိုဘာ ၁၆ ရက်မှာ အလုပ်သမား ၂၆၁ ဦးကို အကြောင်းပြချက်မရှိ အလုပ်က ထုတ်ပယ်ခဲ့တဲ့အပြင် လုပ်ခလစာ နှစ်လဆက်တိုက် ဖြတ်တောက်ခဲ့လို့ အလုပ်သမားရုံးကို တိုင်ကြားခဲ့တယ်လို့ အလုပ်သမားတွေက ပါတယ်။

 

“ အောက်တိုဘာလနဲ့ နိုဝင်ဘာလအတွက် လုပ်ခစာတွေ အဖြတ်ခံရတယ်။ အပြည့်မရဘူး။ ဘာအတွက် ဆိုတာမသိဘဲ အဖြတ်ခံရတာ။ အဲဒါနဲ့ အလုပ်သမာတွေက အဖြတ်ခံရကတည်းက တိုင်ကြားခဲ့တာ။ ” လို့ အလုပ်သမားတဦးက ပြောပါတယ်။

 

လုပ်ခလစာ ဖြတ်တောက်မှုတွေကို အောက်တိုဘာလ လစာထုတ်အပြီး နိုဝင်ဘာ ၆ ရက်နဲ့ နိုဝင်ဘာလစာထုတ်ပြီး ၁၉ ရက်နေ့ တွေမှာ တိုင်ကြားခဲ့တာဖြစ်ပေမဲ့ ဖြေရှင်းဆောင်ရွက်တာ မရှိခဲ့ဘူးလို့ အလုပ်သမားတွေက ပြောပါတယ်။

 

“ဒီဖြတ်တောက်ထားတဲ့ လစာက တိုးမြှင့်ထားပေးတဲ့ လုပ်ခလစာ ၁၀၀၀ကျပ်ပါ။ အလုပ်ဖြုတ်ခံရသူတွေက သမဂ္ဂဖွဲ့လို့ တမင် အလုပ်ထုတ်တာ”လို့ အလုပ်သမားတဦးက ပြောပါတယ်။

 

ILO ပြဋ္ဌာန်းချက် အမှတ် ၈၇ (လွတ်လပ်စွာ အသင်းအပင်းဖွဲ့စည်းခြင်းနှင့် ဖွဲ့စည်းခွင့်ကို အကာအကွယ် ပေးရေးဆိုင်ရာ ပြဋ္ဌာန်းချက်) မြန်မာနိုင်ငံက လက်မှတ်ရေးထိုးထားပါတယ်။ ဒါ့အပြင် လုပ်ခလစာ ဖြတ်တောက်မှုတွေကို လက်ရှိအချိန်အထိ ဖြေရှင်းပေးတာမရှိတဲ့အပြင် လုပ်ငန်းခွင်အတွင်းမှာလည်း ဖိနှိပ်ခံရပြီး အဆင်မပြေမှုတွေကြုံတွေ့နေရတယ်လို့ စက်ရုံအလုပ်သမားတွေက ပြောပါတယ်။

 

ဒါ့အပြင် အလုပ်သမားတွေရဲ့ ဆန္ဒမပါဘဲ အချိန်ပို OT တွေကို အတင်းအကျပ်ခေါ်တာ ၊ အရေးကြီးကိစ္စရှိလို့ ဂိတ်ပတ်စ် တောင်းလည်း မရတာ၊ သတိပေးလက်မှတ် (ဝမ်တိန်)တွေကို အတင်းအကျပ် ထိုးခိုင်းတာ၊ အထည်စံချိန် အတင်းအကျပ်တောင်းတာ၊ ခွဲခြားဆက်ဆံပြီး ဌာန အပြောင်းအလဲတာနဲ့ ဆဲဆို ခိုင်းစေတာတွေ ရှိနေတယ်လို့ အလုပ်သမားဝန်ကြီးဌာနကို တိုင်ကြားထားပေမဲ့ မဖြေရှင်းပေးဘူးလို့လည်း အလုပ်သမားတွေက ပြောပါတယ်။

“ဒီစက်ရုံက အရင်က ဖောခ်ဂလိုရီ ဆိုပြီးဖွင့်ခဲ့တယ်။ အဲ့မှာ အလုပ်သမားသမဂ္ဂဖြိုခွဲတယ်။ ဒါပြီး JIMMY ဆိုပြီး နာမည်ပြောင်းထားတာ။ အခုလည်း စက်ရုံနာမည် ထပ်ပြောင်းမယ်လို ကြားပါတယ်”လို့ အလုပ်သမားတဦးက ပြောပါတယ်။

 

JIMMY GARMENT စက်ရုံက ZARA အမှတ်တံဆိပ် အဝတ်အထည်တွေကို ရှင်း မိန် (Chi Mei) နှင့် ကျား မိန် အထည်ချုပ်စက်ရုံတွေက တဆင့်ခံယူ ချုပ်လုပ်နေတယ်လို့ Solidarity Of Trade Union Myanmar ရဲ့ လူမှုကွန်ရက်မှာ ရေးသားထားပါတယ်။

 

JIMMY GARMENT (MYANMAR) CO,LTD စက်ရုံက ရန်ကုန်မြို့၊ ရွှေပြည်သာမြိုနယ် ၊ ရွှေပြည်သာစက်မှုဇုန် ( ၁ ) ၊ စက်မှု ( ၇ ) လမ်းမှာ ဖွင့်လှစ်ထားပါတယ်။