Innovation Food Co.,Ltd ပိုင်စက်ရုံ မှာ ကုန်ကြမ်း မရှိတဲ့ပိတ်တဲ့ရက်အတွက် ရက်အစား ပြန်ဆင်းခိုင်းတယ်လို့ အလုပ်သမားတွေက ပြောပါတယ်။ စက်ရုံ အလုပ်ချိန် အဆိုင်း ၂ဆိုင်း ခွဲထားပြီး အလုပ်ချိန်ကိုလည်း ပုံမှန် သတ်မှတ်ထားတာ မရှိဘူးလို့ ပြောပါတယ်။
“ အဲဒီရက်အစား နားရက်မှာ ပြန်ခေါ်တာ။ မဆင်းရင် ရက်မှန်ကြေး ဖြတ်တောက် မယ်လို ပြောပါတယ်။ ကုန်ကြမ်း နည်းရင် အလုပ်ချိန်ကို နာရီဝက် ၁နာရီ နောက်ကျမှ ဝင်ခိုင်းတယ်။ ကုန်းကြမ်းရှိတဲ့နေ့မှ ပုံမှန် အလုပ်ချိန် ဝင်ရတယ်” လို့ အလုပ်သမားတဦးက ပြောပါတယ်။
စက်ရုံရဲ့ EC စာချုပ်မှာတော့ အလုပ်ဝင်ချိန်ကို မနက် ၈နာရီမှာ စတင်တယ်လို့ ဖော်ပြထားပေမဲ့ လက်တွေ့မှာ တော့ စက်ရုံဘက်က အဆင်ပြေတဲ့ အချိန် လုပ်ကိုင်ခိုင်းနေတယ်လို့ စက်ရုံ အလုပ်သမားတဦးက ပြောပါတယ်။ စက်ရုံမှာ ဖွဲ့စည်းထားတဲ့ WCC အဖွဲ့အစည်းမှာလည်း ဥပဒေနဲ့ အညီ ဖွဲ့စည်းထားတာ မဟုတ်လို့ အကူအညီတောင်းဆို့ ခက်ခဲနေတယ်လို့ အလုပ်သမားတွေက ပြောပါတယ်။
“WCC မှာ ပါတဲ့ အလုပ်သမားကိုယ်စားလှယ်တွေက ဘယ်သူမှန်း မသိဘူး။ ညှိနှိင်း ပေးတာလဲ မရှိဘူး။ ဖွဲထားတာက ကြာနေပြီ။ မရှိတဲ့သူတွေက မရှိတော့ဘူး။ အဖွဲဝင် အစားထိုး ခဲ့တာပဲ ရှိတယ်။ အလုပ်သမားတွေရဲ့ ဆန္ဒအတိုင်းရွေးချယ် ဖွဲစည်းထားမရှိဘူး။ “လို့ ပြောပါတယ်။
စက်ရုံက ယူနီဖောင်းကို လုပ်ငန်းခွင် ရောက်မှ ဝတ်ခိုင်းလို့ ညဆိုင်း အလုပ်ဆင်းရတဲ့ အလုပ်သမားတွေ အတွက် လုံခြုံရေး စိုးရိမ်ရတယ်လို့လည်း အလုပ်သမားတွေက ပြောပါတယ်။
“အိမ်ကနေ ဝတ်ပြီးလာရင်အပေါ် ယူနီဖောင်းဆို ၁၅၀၀ ၊ အောက်ယူနီဖောင်းဆို ၁၅၀၀ ကောက်တယ် ။ အလုပ်က နေ့ဆိုင်း ညဆိုင်း ဝင်ရတာ။ ယူနီဖောင်းနဲ့ လာမယ်ဆိုရင် လုံခြုံရေးအရ ပိုအဆင်ပြေတယ်” လိုပြောပါတယ်။
“စက်ရုံမှာ သာရေး နာရေး အတွက် ဖောင်ဒေးရှင်းကြေး ဆိုပြီး တလ ၊ တခါ ပိုက်ဆံ ကောက်တယ်။ ငွေကြေး ရှင်းတမ်းတော့ မလုပ်ဘူး။ ဘယ်လောက်ရနေပြီ ဆိုတာလည်း မသိရဘူး။ အဲ့လိုထည့်ပေးရတာက စက်ရုံဖွင့်ကတည်းကပဲ” လို့ ပြောပါတယ်။
Innovation Food Co.,Ltd က ရန်ကုန်၊ လှိုင်သာယာမြို့နယ်၊ ရွှေသံလွှင်စက်မှုဇုန်မှာရှိပြီး မြန်မာနိုင်ငံသားပိုင် စက်ရုံလို့ သိရပါတယ်။ လုပ်သား ၈၀၀ ကျော် လုပ်ကိုင်ပြီး Sunday Coffee၊ Rich Creamy ထုတ်လုပ်နေတယ်လို့ သိထားပါတယ်။
