မြန်မာနိုင်ငံအထည်ချုပ်လုပ်ငန်းရှင်များအသင်း (MGMA)အနေနဲ့ ILO ရဲ့ဥပဒေပုဒ်မ-၃၃အရဆုံးဖြတ်ချက် အတွက် ILO အပါအဝင် အလုပ်ရှင်၊ အလုပ်သမား အစိုးရကိုယ်စားလှယ်တွေနဲ့ ဆက်လက် ပူးပေါင်း ဆောင်ရွက်သွားမယ်လို့ MGMA က ထုတ်ပြန်ပါတယ်။
ဇွန်လ ၂ရက်ကနေ ဇွန်လ ၁၅ရက်အထိ ကျင်းပခဲ့တဲ့ ၁၁၃ကြိမ်မြောက် အပြည်ပြည်ဆိုင်ရာ အလုပ်သမား ညီလာခံမှာ ILO က မြန်မာနိုင်ငံအပေါ် ILO Constitution Article 33 ကျင့်သုံးမှုအစီအမံတွေနဲ့ စောင့်ကြည့်ဖို ဆုံးဖြတ်ချက်ချခဲ့တာ ဖြစ်ပါတယ်။
ဒီလိုဆုံးဖြတ်ချက်ချမှုအပေါ် အလုပ်သမားများစွာ မှီခိုလုပ်ကိုင်နေတဲ့ မြန်မာ့ CMP လုပ်ငန်းကဏ္ဍ အတွက် စိတ်မကောင်း ဖြစ်ရတယ်လို MGMA က ဆိုပါတယ်။
မြန်မာ့CMP လုပ်ငန်းကဏ္ဍမှာ အထည်ချုပ်လုပ်ငန်း၊ အိတ်ချုပ်လုပ်ငန်း ၊ဖိနပ်လုပ်ငန်းနဲ့ လျှပ်စစ်ပစ္စည်းတပ်ဆင်တဲ့လုပ်ငန်း ပါဝင်ပါတယ်။
CMP လုပ်ငန်းစက်ရုံတွေဟာ ကုန်ကြမ်းပေး ကုန်ချောယူ (CMPလက်ခစား) စနစ်နဲ့ လုပ်ကိုင်နေ ကြတာဖြစ်ပြီးCMP စက်ရုံတွေမှာ လုပ်သားဦးရေ ၇သိန်း ဝန်းကျင်နဲ့ ဆက်စပ်လုပ်ငန်းတွေမှာ အဲဒီအလုပ်သမားဦးရေရဲ့ ၂ဆ ဝန်းကျင်လုပ်ကိုင်နေတယ်လို့ MGMA က ဆိုပါတယ်။
မြန်မာ့ CMP လုပ်ငန်း အထည်ချုပ်ကဏ္ဍမှာ MGMA ရဲ့ အသင်းဝင်စက်ရုံပေါင်း ၅၂၃ ရုံရှိတဲ့ထဲက ၆၀ ရာခိုင်နှုန်းကို ဥရောပဈေးကွက်၊ ၂၀ရာခိုင်နှုန်းကို ဂျပန်ဈေးကွက် နဲ့ တခြားဈေးကွက်တွေကို ၂၀ ရာခိုင်နှုန်းစီ တင်ပို့နေပါတယ်။
ဒါကြောင့် လုပ်သားအင်အားအများအပြားနဲ့ လုပ်ကိုင်နေတဲ့ CMP ကဏ္ဍရှိ စက်ရုံအလုပ်ရုံတွေဟာ MGMA က ဆောင်ရွက်နေတဲ့ ကျင့်ဝတ်စည်းကမ်းလိုက်နာမှု စဉ်ဆက်မပြတ် ဖွံဖြိုးတိုးတက်ရေး ကြီးကြပ်မှုအစီအစဉ်ကို လိုက်နာဆောင်ရွက်ကြရတယ်လို့ ထုတ်ပြန်ချက်မှာ ဖော်ပြထားပါတယ်။
Myanmar Labour News မှာ တနှစ်အတွင်း ဖော်ပြထားတဲ့သတင်းတွေကို လေ့လာရာမှာတော့ CMP စက်ရုံ ၂၀၀ ဝန်းကျင်က ချိုးဖောက်မှုတွေမှာ နှစ်စဉ် ပါဝင်နေပါတယ်။
အပြည်ပြည်ဆိုင်ရာ အလုပ်သမားအဖွဲချုပ် (ILO) က Article-33နဲ့ မြန်မာနိုင်ငံကို အရေးယူဖို့ ဇွန်လ ၅ ရက်မှာ ကျင်းပခဲ့တဲ့ ညီလာခံမှာ အတည်ပြု ဆုံးဖြတ်ခဲ့တာ ဖြစ်ပါတယ်။
