Hundred Garment Myanmar အထည်ချုပ် စက်ရုံမှာ အသက်မပြည့်တဲ့ ကလေးလုပ်သားတွေဆီက လာဘ်ငွေယူပြီး စက်လိုင်းမန်နေဂျာက အလုပ်သွင်းပေးနေတယ်လို့ Maynmar Labour News ကို အလုပ်သမားတွေက ပြောပါတယ်။
“ ကလေးတွေကို အလုပ်မခိုင်းရဘူးဆိုတဲ့ ဥပဒေကြားဖူးလို့ပါ။ Hundred Garment ဆိုတဲ့စက်ရုံမှာ အသက်မပြည့်သေးတဲ့ ကလေးတွေဆီက ပိုက်ဆံတောင်းပြီး အလုပ်သွင်းပေးနေတဲ့ ဂျာကြီးရှိနေပါတယ်။ စက်လိုင်း မန်နေဂျာပေါ့။ အသက်မပြည့်သေးလည်း ပိုက်ဆံ ၃၀,၀၀၀ ပေးရင် ကလေးတွေကို အလုပ်သွင်းပေးထားပါတယ် ။အခု ဆိုရင် ၅၀,၀၀၀ အထိ တောင်းနေတာပါ။” လို့ ပြောပါတယ်။
စက်ရုံအတွင်း အချိန်ပိုတွေကို အဲ့ဒီ အသက်မပြည့် လုပ်သားတွေပါ လုပ်ကိုင်ရတယ်လို့ ဆိုပါတယ်။ နေ့စဉ် ည ၇ ခွဲအထိ လုပ်ကိုင်ရပြီး တချို့ နေ့တွေမှာတော့ ည ၁၀ ခွဲအထိလုပ်ကိုင် ရတယ်လို့ အလုပ်သမားတွေက ပြောပါတယ်။
“ကလေးလုပ်သားတွေ ၁၈ နှစ်မပြည့်ကြသေးတဲ့ လူတွေပါ။ အချိန်ပိုကတော့ခိုင်းပါတယ် တစ်ရုံလုံးအခုဆို ၇ခွဲ ထိဆင်းရပါတယ်။ အဲ့ ၇ခွဲထိဆင်းပြီးရင် တချို့ ညဆိုင်းဆင်း နိုင်တဲ့လူတွေဆို ၁၀ခွဲထိခေါ်ပါတယ်။ ညဆိုင်းသမား တွေကို ညနေစာနဲ့မနက်စာ စားဖို့ ၅၀၀၀ ပေးပါတယ်။ နေစရာအဆောင်တော့ စီစဥ်ပေးပါတယ်။” လို့ ပြောပါတယ်။
စနေနေ့တိုင်း ည ၄ ခွဲအထိ လုပ်ကိုင်ရပေမဲ့ တနင်္ဂနွေနေ့လို့ နားရက်လုပ်ကိုင်ရတာ နှစ်ပတ်ရှိနေပြီလို့ အလုပ်သမားတွေက ပြောပါတယ်။ ည ၇ ခွဲအထိ လုပ်ကိုင်ရတိုင်း နားချိန် ၅ မိနစ်/ ၁၀ မိနစ် ဝန်းကျင် အနားပေးတယ်လို့လည်း သိရပါတယ်။
လုပ်ငန်းခွင်အတွင်း အဆင်မပြေမှုတွေကို အငြိုအတေးနဲ့ သတိပေးလက်မှတ်ထိုးခိုင်းတာ၊ အလုပ်ထုတ်တာတွေ အပြင် အုပ်စုဖွဲ့ ကိုယ်ထိ လက်ရောက် ပြုမူတာတွေကို အဲ့ဒီ စက်လိုင်းမန်နေဂျာက ပြုလုပ်တယ်လို့ လည်း ပြောပါတယ်။
“ဂျာကြီးဆိုတဲ့လူက သူနဲ့အဆင်ပြေတယ် တည့်ဆိုရင်ကောင်းပါတယ်။ သူနဲ့အဆင်မပြေဘူး ဆိုရင်တော့ အထည်မရလို့၊ အာဝါဒီမပေးနိုင်ဘူးဆိုပြီး အမြဲ အော်ဟစ်ဆဲဆိုတက်ပါတယ်။ သူနဲ့မတည့်တော့ဘူးဆိုရင် ဝိမ်ထိန်ထိုးတာတွေ အလုပ်ထုတ်ပစ်တဲ့အထိ လုပ်ပါတယ် ။ တလောက ဂျာကြီးတို့ အဖွဲ့က စူပါတစ်ယောက်ကို ဝိုင်းပြီး ကိုယ်ထိလက်ရောက် လုပ်ကြတယ်။ အဲ့စူပါဆိုရင် လက်သန်းထိခိုက်တာ လှုပ်လို့ မရတော့ဘူး။ တကိုယ်လုံးလည်း ကုတ်ရာ ခြစ်ရာတွေနဲ့” လို့ ပြောပါတယ်။
စက်ရုံအတွင်း စက်လိုင်း ၇ လိုင်းရှိပြီး စက်လိုင်း မန်နေဂျာ ကိုယ်တိုင်က အလုပ်သမားတွေခြား ခွဲခြားဆက်ဆံမှုတွေ လုပ်ဆောင်နေတာလို့ အလုပ်သမားတွေက ပြောပါတယ်။
Hundred Garment Myanmar မှာ အလုပ်သမား ၇၀၀ ဝန်းကျင်ရှိပြီး စက်ရုံပိုင်ရှင်ကတော့ တရုတ်နိုင်ငံသားလို့ သိရပါတယ်။ စက်ရုံကတော့ ရန်ကုန်မြို့၊ ရွှေပြည်သာမြို့နယ်၊ သာဓုကန်စက်မှုဇုန် (သဘာဝမှတ်တိုင်အနီး)မှာ လုပ်ငန်းလုပ်ကိုင်နေတယ်လို့ အလုပ်သမားတွေက ပြောပါတယ်။
