အလုပ်သမား ၄၀၀ ကျော်ကို နစ်နာကြေးမပေးဘဲ အလုပ်မှထုတ်ပယ်ခဲ့တဲ့ ဂျပန်နိုင်ငံသားပိုင် Honeys အထည်ချုပ်စက်ရုံဟာ အလုပ်သမား အရေးကူညီဆောင်ရွက်သူထံက ကျပ်သိန်းပေါင်းနှစ်သောင်းရလိုမှုနဲ့ တရားစွဲဆိုခဲ့ပြီး ၇နှစ်ကြာမှ အမှုပိတ်သိမ်းလိုက်တယ်လို့ သိရပါတယ်။
အဆိုပါ ဂျပန်နိုင်ငံသားပိုင် Honeys အထည်ချုပ်စက်ရုံဟာ ပြီးခဲ့တဲ့ ၂၀၁၇ ခုနှစ်က အလုပ်သမားအခွင့်အရေး တောင်းဆိုမှုကြောင့် အလုပ်သမား ၄၀၀ ကျော်ကို အလုပ်မှထုတ်ပယ်ခဲ့ရာမှ အလုပ်သမားထောင်ချီဆန္ဒပြတောင်းဆိုခဲ့ရာ အဲ့ဒီအလုပ်သမားတွေကို ကူညီဆောင်ရွက်ပေးခဲ့တဲ့ အလုပ်သမား အရေးကူညီဆောင်ရွက်သူ ဒေါ်မျိုးမျိုးအေးကို အဲဒီစက်ရုံကနေ နစ်နာကြေး သိန်းပေါင်းနှစ်သောင်းနီးပါးဖြစ်တဲ့ ငွေကျပ်သိန်းပေါင်းတစ်သောင်းရှစ်ထောင်ရှစ်ရာကျော်ရလိုမှုနဲ့ တရားစွဲဆိုခဲ့တာဖြစ်ပါတယ်။
အဆိုပါတရားစွဲဆိုခဲ့မှုအတွက် ယခု ဇန်နဝါရီ ၂၂ရက်မှာတော့ တရားစွဲဆိုခဲ့တဲ့ ၇ နှစ်ကျော်ကာလအတွင်း တရားပြိုင်ပြသက်သေများကို စစ်ဆေးရန်စောင့်ဆိုင်းနေတဲ့အဆင့်သို့ရောက်ရှိနေပြီဖြစ်ပြီး ဇန်ဝါရီ ၂၂ ရက်မှာတော့ တရားလိုစက်ရုံဘက်က တရားပြိုင်အပေါ်ဆက်လက်တရားစွဲဆိုလိုစိတ်မရှိတော့တာကြောင့် အမှုကိုခြွင်းချက်မရှိ အမှုပိတ်သိမ်းခွင့်ပြုဖို့ တရားရုံးသို့လျှောက်ခဲ့တာဖြစ်တယ်လို့ သိရပါတယ်။
"သူတို့ကအလုပ်သမားကို မလျော်ဘူး။ သူတို့ Order cancel ဖြစ်လို့လျော်ကြေးတောင်းတရားစွဲတာ။ Human Rights Now က statement ထုတ်လိုက်လို့ အမှုပိတ်သွားတာ"လို့ ဆိုပါတယ်။
အဆိုပါ Honeys Garment အထည်ချုပ် စက်ရုံက မင်္ဂလာဒုံမြို့နယ်မှာရှိတာဖြစ်ပြီး အလုပ်သမား ၄ဝဝကျော် ကို အလုပ်ထုတ်ခဲ့ရာက အလုပ်သမားထောင်ကျော်က ဥပဒေမဲ့အလုပ်ထုတ်မှုရပ်တန့်ရေး၊ ဥပဒေပါအခွင့်အရေးများရရှိရေး နှင့် ခွဲခြားဖိနှိပ်မှုများရပ်တန့်ရေး စသည့်စာသားပါ ဗီနိုင်းပိုစတာ များကို ကိုင်ဆောင်ကာ Honeys အထည်ချုပ်စက်ရုံမှ အလုပ်ထုတ် ခံရတဲ့ အလုပ်သမား ၄၀၀ကျော်ကို လုပ်ငန်းခွင်သို့ ပြန်လည်ဝင်ခွင့်ရ ရန် တောင်းဆိုခဲ့ကြတာဖြစ်ပါတယ်။
