အလုပ်ခန့်ထားကတည်းက အလုပ်ရှင်နဲ့ အလုပ်သမားကြား သဘောတူထားတဲ့ လုပ်ခလစာ အပြည့်မပေးတာကြောင့် HC အထည်ချုပ်စက်ရုံမှာ တောင်းဆိုမှုဖြစ်ပွားခဲ့တယ်လို့ အလုပ်သမားတွေက ပြောပါတယ်။
“အလုပ်ခန့်ကတည်းက ၅၈၀၀ ပေးမယ်လို့ ပြောလို့ အလုပ်ဝင်ထားတာပါ။ အခုတော့ ၄၈၀၀ နဲ့ ရှင်းပေးတော့ လုပ်ခလစာတွေကို လက်မခံပဲ တောင်းဆိုမှုတွေ ပြုလုပ်တာပါ။ စက်ရုံဝန်းထဲမှာပဲ တောင်းဆိုတာပါ၊ လုပ်ငန်းခွင်ထဲမဝင်ကြပါဘူး ။ ” လို့ အမျိုးသမီး အလုပ်သမားတဦးက ပြောပါတယ်။
ဒီကနေ့ ဖေဖော်ဝါရီ ၁၀ ရက် မနက်ပိုင်းမှာ HC အထည်ချုပ်စက်ရုံဝန်းအတွင်းမှာ အလုပ်သမား ၄၀၀ ဝန်းကျင်က တောင်းဆိုမှုတွေ ပြုလုပ်ခဲ့တာလို့ ပြောပါတယ်။ လုပ်ခလစာ အပြည့်မပေးဘဲ ဖြတ်တောက်မှုကြောင့် အလုပ်သမားတဦးကို ကျပ် ၅၀၀၀၀ ကနေ ၈၀၀၀၀ ကြား နစ်နာရတယ်လို့လည်း အလုပ်သမားတွေက ပြောပါတယ်။
“ညီမတို့က ကိုယ့်ရဲ့ လုပ်ခကိုပဲ ပြန်တောင်းနေတာပါ။ အလုပ်ခန့်ကတည်းက သတ်မှတ်ထားတဲ့ လုပ်ခအတိုင်း တောင်းတာ။ ပိုတောင်းနေတာလည်း မဟုတ်ပါဘူး။”လို့ ပြောပါတယ်။
အလုပ်သမားတွေကို ထောက်ပံကြေး တရက် ကျပ် ၂၀၀၀ ပေးဖို့ ဝန်ကြီးဌာနက ညွှန်ကြားထားပေမဲ့ အဲ့ဒီကျပ်နှစ်ထောင်ကိုလည်း ရရှိတာ မရှိဘူးလို့ အလုပ်သမားတွေက ပြောဆိုပါတယ်။ ဒီထောက်ပံကြေးနဲ့ ရမရနဲ့ ပတ်သက်ပြီး သီးခြားအတည်ပြုနိုင်တာ မရှိပါဘူး။
စက်ရုံဘက်က တောင်းဆိုမှုတွေကို ငြင်းပယ်ထားပြီး မူလသတ်မှတ်ထားတဲ့ လုပ်ခလစာနဲ့ ပတ်သက်တဲ့ ညှိုနှိုင်းမှုတွေကို မြို့နယ် အလုပ်သမားရုံးကနေ တဆင့်ပြုလုပ်ဖို့ ပြောဆိုတယ်လို့ အလုပ်သမား တဦးက ပြောပါတယ်။
“ အလုပ်သမားရုံးကို သွားတိုင်ဆိုပြီး စက်ရုံတာဝန်ရှိသူကပြောတယ်၊ စက်ရုံဘက်ကတော့ ဒီလအတိုင်း ကြိုက်ရင်ယူ၊ မကြိုက်ရင်ထွက်ဆိုပြီး ပြောနေတယ်။ ညီမတို့က အခုအထိ အဲ့ဒီလုပ်လစာကို လက်မခံရသေးဘူး” လို့ ပြောပါတယ်။
လက်ရှိအချိန်အထိ အလုပ်ရှင်၊ အလုပ်သမားကြား ညှိနှိုင်းမှုတွေမလုပ်ရသေးသလို စက်ရုံတာဝန်ရှိသူနဲ့ လုံခြုံရေးဝန်ထမ်းတွေရဲ့ ခြိမ်းခြောက်မှုတွေ ရှိနေတယ်လို့ အမျိုးသမီး အလုပ်သမားတဦးက ပြောပါတယ်။
“သူဌေးက လစာတွေ ထပ်မဖြည့်ဘူး၊ ဒီတိုင်းပါဘဲ။ တိုင်ချင်တဲ့ ရုံးတိုင်ပေါ့ ။ စက်ရုံလုံခြုံရေးတွေကလည်း အပြင်ထွက်ဖို့ ခြိမ်းခြောက်တယ်၊ နှင်ထုတ်တယ်။ အလုပ်သမားတွေကလည်း ကတိအတိုင်း လစာကို အပြည့်ပေး၊ မပေးနိုင်ရင် မထွက်နိုင်ဘူး ဆိုပြီး ပြောထားတယ်”လို့ ပြောဆိုပါတယ်။
HC အထည်ချုပ်စက်ရုံက ရန်ကုန်မြို့ ၊တောင်ဒဂုံမြို့နယ်၊ ကျီစု စက်မှုဇုန်မှာရှိတယ်လို့ သိရပါတယ်။
