ရန်ကုန်၊ အရှေ့ဒဂုံမြို့နယ်၊ အင်းဝလမ်းမပေါ်က Myanmar Handsome အထည်ချုပ်စက်ရုံမှာ အလုပ်စတင်ဝင်ရောက်တဲ့ အလုပ်သမား အသစ်တွေဆီက နည်းမျိုးစုံနဲ့ တရားမဝင် ငွေကြေး ကောက်ခံနေတယ်လို့ စက်ရုံအလုပ်သမားတွေက ပြောပါတယ်။
“လက်ရှိမှာပဲ အလုပ်သမားအသစ်တွေဆီက တစ်ယောက် ၂၀၀၀၀ ဆိုပြီး ကောက်တယ်။ ပွဲလုပ်ဖို့ဆိုပြီး ကောက်တယ်။ “ လို့ အလုပ်သမားတဦးက ပြောပါတယ်။
စက်ရုံဘက်က ငွေကြေးကောက်ခံမှုတွေကြောင့် သတင်းတွေမှာ မကြာခဏ ဖော်ပြခံနေရပေမဲ့ တာဝန်ရှိသူ တချို့က အမည်အမျိုးမျိုး တပ် ငွေကောက်ခံတာ ကို မရပ်ဘဲ ဆက်လက်လုပ်ဆောင်နေတယ်လို့လည်း ပြောပါတယ်။
“စက်ရုံက "အေဂျင်စီ" အမည်ခံပြီး အလုပ်သမားအသစ်တွေက ကျပ် ၅၀,၀၀၀ ကနေ ၇၀,၀၀၀ အထိ ကောက်ခဲ့ဘူးတယ်။ ဒါသတင်းတက်လည်း သူတို့က ဆက်ကောက်နေတုန်းပဲ။ “
စက်ရုံဘက် ငွေကောက်ခံမှုတွေ အပြင် လူမှုဖူလုံရေးကတ် (SSB Card) မရရှိသေးတဲ့ အလုပ်သမား အများအပြား ရှိနေပြီး လစာထဲက လူမှုဖူလုံရေးကြေး ပေးသွင်းနေပေမဲ့ ကတ်ပြားကို လက်ဝယ်မရရှိဘူးလို့လည်း ပြောပါတယ်။
"ညီမဆို လုပ်သက် ၂ နှစ်ကျော်ပြီ မရသေးဘူး။ တချို့ လုပ်သက် ၃ နှစ်၊ ၄ နှစ်ရှိတဲ့ သူတွေလည်း မရသေးဘူး" လို့ အမျိုးသမီး အလုပ်သမားတဦးက ပြောပါတယ်။
Myanmar Handsome စက်ရုံက LCW Brand များကို အဓိကချုပ်လုပ်နေပြီး အလုပ်သမား ၁၅၀၀ ဝန်းကျင်နဲ့ လည်ပတ်နေတဲ့ စက်ရုံဖြစ်တယ်လို့ သိထားပါတယ်။
