GYSen (Myanmar) စက်ရုံက အလုပ်ထုတ်ခံခဲ့ရတဲ့ အလုပ်သမားတွေ တနှစ်ပြည့်တဲ့အထိ လုပ်ငန်းခွင်ကို ပြန်လည်ဝင်နိုင်တာ မရှိဘူးလို့ သိရပါတယ်။ အလုပ်သမားတွေကို ပြီးခဲ့တဲ့ ၂၀၂၄ခုနှစ် ဧပြီ ၈ ရက် မှာ လုပ်သား အင်အားလျော့ချတယ်ဆိုတဲ့ အကြောင်းပြချက်နဲ့ အလုပ်သမားအဖွဲအစည်း ဥက္ကဋ္ဌ အပါအဝင် အလုပ်သမား ၅၀ကို GYSEN စက်ရုံက အလုပ် ရပ်စဲခဲ့တာဖြစ်ပါတယ်။
“ ခွဲခြားဆက်ဆံတာ တနှစ်ပြည့်ခဲ့ပြီ။ သမဂ္ဂခေါင်းဆောင်တွေ ခုထိ လုပ်ငန်းခွင် ပြန်ဝင်ခွင့်မရသေးပါဘူး။ တခြား စက်ရုံတွေကို တရားစွဲဖို စာထုတ်ပေးပေမဲ့၊ GYSEN ကတော့အောင်ပွဲခံနေဆဲပါဘဲ။ ဝန်ကြီးဌာနကို တင်ထားပါ တယ်ဆိုတဲ့ အဖွဲစုံ စစ်ဆေးချက်ကလည်း ဝန်ကြီးအပြောင်းအလဲမှာ အသံတိတ် သွားခဲ့ပါပြီ” လို့ အလုပ်သမားတွေ ကို ကူညီဆောင်ရွက်ပေးနေတဲ့ သွေးစည်းညီညွတ်သောသမဂ္ဂများအဖွဲ့ချုပ် STUM က လူမှုကွန်ရက် စာမျက်နှာ ဖေ့ဘွတ်မှာ ရေးသားထားပါတယ်။
GYSEN ပိုင်ရှင်ရဲ့ အဖွဲအစည်း ဖြိုခွဲမှုနဲ့ အရေးယူပေးဖို့ အလုပ်သမားတွေက တိုင်ကြားခဲ့ရာမှာ တိုင်းရုံးမှာ စေ့စပ်ဖြေရှင်းမှု ၂ ကြိမ်ပြုလုပ်ခဲ့ပေမဲ့ တနှစ်အကြာ လက်ရှိအချိန်ထိ အလုပ်ရှင်ကအလုပ်သမားတွေကို လုပ်ငန်းခွင်ကို ပြန်လည်ဝင်ခွင့် မပြုတာ ဖြစ်ပါတယ်။ တခြား စက်ရုံလုပ်ငန်းရှင်တွေကို တရားစွဲဆိုဖို့ အလုပ်သမားရုံးတွေက စာထုတ်ပေးပေမဲ့ GYSEN ပိုင်ရှင်ကိုတော့ တရားဆွဲဆိုဖို့ စာ ထုတ်ပေးတာ မရှိခဲ့ဘူးလို့ သိရပါတယ်။
စက်ရုံပိုင်ရှင်က တရုတ်နိုင်ငံသားဖြစ်ပြီး ရွှေပြည်သာဝါးတရာ စက်မှူဇုန်မှာ အထည်ချုပ် စက်ရုံ ၃ ရုံ ဖွင့်လှစ်ထားတယ်လို့ သိရပါတယ်။ GYSEN အထည်ချုပ်စက်ရုံဟာ ဝါးတရာလမ်း၊ဝါးတရာ စက်မှုဇုန်မှာ ၂၀၁၉ ခုနှစ်မှာ စတင် ဖွင့်လှစ်ခဲ့ပါတယ်။ စက်ရုံ အလုပ်သမား ၈၀၀ ဝန်းကျင်က KAKAO FRIENDS ,TERRANOVA, CALLIOPE, Procera အမှတ်တံဆိပ် တွေ ချုပ်လုပ်နေတယ်လို့ အလုပ်သမားတွေက ပြောထားပါတယ်။
