NEWS

Full Win Safety စက်ရုံမှာအလုပ်သမားအခွင့်အရေးချိုးဖောက်ခံပြီးလုပ်ကိုင်နေရဟုဆို

CoverLogo
864 Views

ရန်ကုန်တိုင်း လှိုင်သာယာ စက်မှုဇုန် ၄ ဦးထွန်းညိုလမ်းမှာ အလုပ်သမား ၅၀၀ ကျော်နဲ့ လည်ပတ်နေတဲ့ Full Win Safety အထည်ချုပ်စက်ရုံမှာ အလုပ်သမားအခွင့်အရေးချိုးဖောက်ခံရတဲ့အခြေအနေတွေနဲ့ အလုပ်လုပ်ကိုင်နေရတယ်လို့ အလုပ်သမားတွေထံကသိရပါတယ်။

အဆိုပါ လုပ်ငန်းခွင်ထဲမှာ နံနက် အလုပ်ချိန် ၇ နာရီ ၁၅ မှ ည ၈ နာရီ ၄၅ အထိ လုပ်ကိုင်ရတာဖြစ်ပြီး အလုပ်သမားတစ်ဦးချင်းစီချုပ်လုပ်နိုင်တာထက် ပိုမိုတောင်းခံတာ မပြည့်ပါက အိုတီအခမဲ့ဆင်းခိုင်းတာ၊ တနင်္ဂနွေပိတ်ရက်များပါ ငြင်းဆန်ခွင့်မရှိဘဲ အိုတီဆင်းရတာ လုပ်ငန်းခွင်ထဲမှာ ဆဲဆိုရိုင်းပျစွာ အော်ဟစ်ခိုင်းစေတာ၊ ကျန်းမာရေးကိစ္စတွေ ဖယ်ရီကားပြသနာ နဲ့ အလုပ်သမားဥပဒေပါ ခံစားခွင့်ရှိသော ခွင့်ရက်နှင့်အလုပ်ပိတ်ရက်ခံစားခွင့်တွေ မရရှိတာ စတာတွေချိုုးဖောက်ခံနေရတယ်လို့ အလုပ်သမားတွေကပြောဆိုပါတယ်။

အဲ့ဒီလိုချိုးဖောက်ခံနေရမှုနဲ့ပတ်သက်ပြီး စက်ရုံဘက်မှ ဖြေရှင်းပေးခြင်းမရှိသလို လက်ရှိကြုံတွေ့နေရတဲ့ ကုန်ဈေးနှုန်းကြီးမြင့်မှုကြောင့် စားဝတ်နေရေးအကျပ်အတည်းတွေကို ဖြေရှင်းဖို့ ကြိတ်မှိတ်ပြီးလုပ်ကိုင်နေရတယ်လို့ အလုပ်သမားတွေကပြောပါတယ်။ 

စက်ရုံမှာ တရုတ်နိုင်ငံသားပိုင်ဖြစ်ပြီး DeFacto, Reserved, So Cute အမှတ်တံဆိပ်ကို ချုပ်လုပ်တင်ပို့နေတာဖြစ်တယ်လို့ သိရပါတယ်။

အထည်ချုပ်လုပ်သမားတွေကို ချုပ်လုပ်တဲ့ အထည်စံချိန်တောင်းခံရာမှာ တစ်ဦးလျင် တစ်နာရီကို  ဝယ်လွန်အထည် ၃၅ ထည်အထိ တောင်းခံထားတာဖြစ်ပြီး သတ်မှတ်ချိန်တွင်မပြီးစီးပါက အချိန်ပိုဆင်းပေးပြီးချုပ်လုပ်ရတာဖြစ်သလို အချိန်ပိုကြေးပေးချေခြင်းမရှိဘဲ အလကားချုပ်ပေးနေရတာလို့ အလုပ်သမားကပြောပါတယ်။

"ဝယ်လွန်သားတွေက ချုပ်ရတာလက်ဝင်ပြီးခက်ခဲပါတယ်။ အဲ့တော့ အလုပ်ရှင်ဘက်ကတောင်းတဲ့စံချိန်အတိုင်းရဖို့ ခက်ခဲတယ် သူတို့က အော်ဒါအရေးကြီးတယ်ဆိုပြီး ဖိအားပေးပြီးဆင်းခိုင်းတယ် အောနိုက်၊ အောလင်း( ညလုံးပေါက်) မဆင်းမနေရ အဆက်မပြတ်ဆင်းခိုင်းတယ် အဲ့လို ၂၄ နာရီပတ်လည်ခိုင်းပြီးတာတောင် အလုပ်သမားတွေကို အနားမပေးဘဲနဲ့ ဆက်တိုက်ဆင်းခိုင်းတာတွေလုပ်ပါတယ်။ မဆင်းဘူးဆိုရင် ခွဲခြားဆက်ဆံတယ် ဆဲဆိုခံရတယ် ဘာမှလည်း ပြန်မပြောရဲဘူး"လို့ ကိုယ်တိုင်ကြုံတွေ့နေရတဲ့ အလုပ်သမားကပြောဆိုပါတယ်။

အခုလိုချိုးဖောက်မှုခံစားနေရတဲ့အလုပ်သမားအနေနဲ့ စားဝတ်နေရေးနဲ့ လုံခြုံရေးအခြေအနေအရ အမည်နဲ့ ရာထူးနဲ့ စက်လိုင်းကို ထုတ်ဖော်ပြောဆိုဖို့ အဆင်မပြေဘူးလို့ လည်း ပြောဆိုပါတယ်။

အချိန်ပိုဆင်းရတာတွေဟာ ဧပြီလ သင်္ကြန်ကာလကနေ ယနေ့အချိန်ထိ မနားမနေဆင်းနေရတာဖြစ်ပြီး အများပြည်သူရုံးပိတ်ရက်ဖြစ်တဲ့ တနင်္ဂနွေနေ့လိုနေ့မျိုးတွေမှာပါ မနားရဘဲ ဆင်းပေးနေရတာ အခါကြီးရက်ကြီးတွေမှာပါ ငြင်းဆန်လို့မရဘဲ ဖိအားပေးခြိမ်းခြောက်ပြီးဆင်းပေးနေရတာလို့ အလုပ်သမားကပြောပါတယ်။

အခုလို တရားမျှတမှုကင်းမဲ့စွာစေခိုင်းနေမှုကို ဖီဆန်ရန်ကြိုးစားပါက အလုပ်သမားခေါင်းဆောင်လည်းဖြစ် အောချုပ်လဲဖြစ်တဲ့ ကြီးကြပ်ရေးအလုပ်သမားက ဆဲဆိုခြင်း၊ ရိုင်းစိုင်းစွာပြောဆိုခြင်း၊ ကြမ်းတမ်းစွာ အော်ဟစ်ပြောဆိုခြင်းများ ပြုလုပ်တာဖြစ်တယ်လို့ ဆိုပါတယ်။

ဒါ့အပြင် ဥပဒေပါခံစားခွင့် ခံစားခွင့် များ ဆေးခွင့်များ ရရှိခြင်းမရှိသလို ကျန်းမာရေးကိစ္စကြောင့် အလုပ်တစ်ရက်ပျက်ပါက ဒေးကြေး ၄၈၀၀ ကျပ် ရက်မှန်ကြေး ၂၀၀၀၀ ကျပ် စုစုပေါင်း ၂၄၈၀၀ ကျပ် ဖြတ်တောက်ခံရတာဖြစ်တယ်လို့ သိရပါတယ်။

"အလုပ်သမားတွေကိုတော့ ၈ လပိုင်း ၁၅ ရက်နေ့မှာ ဒေးကြေး ၅၆၀၀ ကျပ်တိုးပေးမယ်ပြောတယ် စံချိန်ကို အခုချုပ်နေတာထက် ပိုပေးရမယ်တဲ့ စံချိန်မပြည့်ရင် အိုတီအလကားဆင်းပေးပြီး စံချိန်ပြည့်အောင်ဖြည့်ပေးရမယ်တဲ့ ဒါကျွန်မတို့ရဲ့ လုပ်အားတွေကို ညှစ်ယူနေတာပဲ"လို့ ကျေနပ်မှုမရှိတဲ့အလုပ်သမားကပြောပါတယ်။

ယခုလို အလုပ်သမားတွေရဲ့ လုပ်အားတွေကို ဈေးပေါပေါဖြင့် ရယူယုံသာမက လုပ်ငန်းခွင်ထဲမှာ ကျန်းမာရေးအပေါ့အပါးသွားရန် မဆင်မပြေဘဲ အနံ့အသက်တွေ မကောင်းတာ သန့်ရှင်းမှုမရှိတာ လက်ဆေးဆပ်ပြာမရှိတာ အလုပ်အသွားအပြန် ဖယ်ရီ အဆင်မပြေတာ စတဲ့ အခြေအနေတွေ လည်းကြုံတွေ့နေရတယ်လို့ အလုပ်သမားတွေက ပြောဆိုပါတယ်။

#MyanmarLabourNews

 


Related posts

Cover
UA Electronic Co.,Ltd စက်ရုံမှာ လုပ်ခလစာ တိုးမြှင့်ရေး တောင်းဆိုမှု ပြုလုပ်
May 17, 2025
Cover
Myanmar Xiang He စက်ရုံတွင် လုပ်ခတိုးမြှင့်ရေး တောင်းဆိုမှုအပြီး အလုပ်သမားနှစ်ဦးအား အလုပ်ထုတ်
May 17, 2025
Cover
ဒေးကြေးတိုးပေးဖို့ ဆန္ဒပြတောင်းဆိုတဲ့ Tianjin Fashion Milestone Garment မှာ ညှိနှိုင်းမှု မရှိသေးဘဲ စစ်ကောင်စီတပ်သားတွေသာရောက်ရှိလာ
May 17, 2025
Cover
အနည်းဆုံးအခကြေးငွေပြင်ဆင်နိုင်ရေး ပြန်လည်ဆွေးနွေးမှုများလုပ်ဆောင်ရန်လိုနေ
May 17, 2025
Cover
ချန်းရိ စက်ရုံ သုံးပွင့်ဆိုင် ညှိနှိုင်းမှုတွေ ပြုလုပ်နေ
May 16, 2025
Cover
ဒေးကြေးတိုးပေးဖို့ Tianjin Fashion Milestone Garment အလုပ်သမားတွေ ဆန္ဒပြတောင်းဆိုနေ
May 16, 2025
Cover
Tian Yu စက်ရုံ စစ်ဆေးရေး ဝင်တိုင်း လိမ်လည် ဖြေကြားခိုင်း၊ အမှန်တိုင်းဖြေမိသူ အလုပ်ထုတ်ခံရ
May 16, 2025
Cover
Dishang Fashion Myanmar စက်ရုံလုပ်သားများ တစ်လ တစ်ရက်သာ နားခွင့်ရ
May 16, 2025