ETEC စက်ရုံ အလုပ်သမားတောင်းဆိုမှု ပြီးပြတ်မှု မရှိဘူးလို့ အလုပ်သမားတချို့က ပြောပါတယ်။ အလုပ်သမား ၂၀၀၀ ကျော်က ဒေးကြေး ၅၈၀၀ ကနေ ကျပ် ၁၃၀၀၀ တိုးပေးဖို့ ဇွန် ၂ ရက်နေ့က တောင်းဆိုခဲ့ကြပါတယ်။
“သူတို့က ၉ ရက်နေ့ကျမှ အဖြေပေးမယ် ပြောတာ။ ချက်ချင်း မပေးဘူး။ အလုပ်ကြ တော့ ဆက်လုပ်တဲ့ လေ” လို့ အမျိုးသမီး အလုပ်သမားတဦးက ပြောပါတယ်။
စက်ရုံဘက် အခြေခံလစာ ၅၈၀၀၊ ထောက်ပံ့ကြေးက ၁၀၀၀ ၊ ထပ်တိုး ပေးတာက ၁၄၀၀ စုစုပေါင်း ဒေးကြေး ၈၂၀၀ တိုးပေးတာ ဖြစ်တယ်လို့ အလုပ်သမားတွေက ပြောပါတယ်။ ရက်မှန်ကြေး ကျပ် ၅၀၀၀၀ ကို အရင် ရက်ပျက်ပါက အကုန်လုံးဖြတ်ပြီး ၊ အခုနောက်ဆုံး တစ်ရက်ပျက် ၃၅၀၀၀နဲ့. နှစ်ရက်ပျက်ပါက ရက်မှန်ကြေး အားလုံး ဖြတ်မှာဆိုပြီး ညှိနှိုင်းထားတယ်လို့ အလုပ်သမားတွေက ပြောပါတယ်။
“ညှိနှိုင်းထားတဲ့ အတိုင်းဆို လက်ခံတဲ့ အလုပ်သမားများတယ်။ အများဆန္ဒ အတိုင်းလိုက်နာရမှာ။ အရင်လ ကတော့ ရက်မှန်ကြေးမပါ လစာ၂သိန်းဝန်းကျင် ပဲရတာပါ။ တောင်ဒဂုံထဲမှာ ညီမတို့ စက်ရုံက လုပ်ခ အနည်းဆုံးပါ။ ” လို့ ပြောပါတယ်။
ETEC စက်ရုံက အီလက်ထရောနစ် ပစ္စည်း ထုတ်လုပ်တဲ့ စက်ရုံဖြစ်ပြီး ရန်ကုန်မြို့၊တောင်ဒဂုံမြို့နယ်၊ စက်မှုဇုန် ၁ မှာ ရှိပါတယ်။ စက်ရုံဝန်းအတွင်းက Earth စက်ရုံအလုပ်သမားတွေကလည်း ဇွန်လ ၃ ရက်က လုပ်ခတိုးမြှင့်ပေးဖို့ တောင်းဆိုနေပါတယ်။
