ကိုရီးယားနိုင်ငံကို ကုန်ထုတ်လုပ်ငန်းနဲ့သွားရောက်လုပ်ကိုင်နိုင်အတွက် EPS TOPIK စာမေးပွဲဖြေဆိုသူ(၄၈၀၀၀)ဦးရှိခဲ့ပါတယ်။
လက်ရှိမှာအစိုးရပြည်ပအလုပ်အကိုင် အေဂျင်စီထုတ်ပြန်တဲ့ပထမအကြိမ်စာရင်းအရအောင်မြင်သူအရေအတွက်ဟာ(၅၅၄၀)ဦးသာရှိတာကြောင့်ဆယ်ပုံတစ်ပုံကျော်သာအောင်မြင်ေသးတာဖြစ်ပါတယ်။
လက်ရှိမှာတော့ကိုရီးယားနိုင်ငံကိုသွားရောက်လုပ်ကိုင်လိုသူအများအပြားရှိနေပြီးအမှတ်ပြည့်(၁၀၀)မှာ(၉၇.၅)မှတ်နဲ့အောင်မှတ်ကိုစံချိန်တင်သတ်မှတ်ခဲ့တာဖြစ်ပါတယ်။
"အမှတ် ၉၂.၅ လောက်ရထားတော့စိတ်ကိုတကယ်လျှော့ထားတာပါ။အောင်တယ်ပေါ့။စိတ်မပူတော့ဘူး။အခုကျ ၉၇.၅နဲ့ အောင်မှတ်ဖြတ်တာဆိုတော့အရမ်းခံပြင်းတယ်။ပြောမယ်ဆိုအချိန်ကုန်၊ ငွေကုန်တွေခံထားရတော့အရမ်းကိုမျှော်လင့်ထားတာ။ဖောင်ရဖို့ကိုမနက်အစောကြီးတွေတန်းစီခဲ့ရတာ။အခုအမှတ်ဖြတ်တာကိုကြည့်ပြီးစိတ်ဓာတ်တော်တော်ကျသွားတယ်"လို့စာမေးပွဲဖြေဆိုခဲ့သူတစ်ဦးကပြောပါတယ်။
လက်ရှိမှာအောင်မှတ်ဖြတ်နှုန်းဟာမြင့်လွန်းတာကြောင့်စာမေးပွဲစနစ်ကိုသင်တန်းကျောင်းတစ်ချို့ကလည်းဝေဖန်မှုတွေရှိနေပါတယ် ။
"အခုကတော့ skill test ပါဆက်စစ်မယ်ပေါ့။အောင်တဲ့သူတွေကတော့ ထပ်ဖြေကြပေါ့။ကျတဲ့သူတွေကလည်းပြန်ဖြေမလား။နောက်တစ်နိုင်ငံရွေးမလားပေါ့။အမှတ်ဖြတ်တာကမြင့်လွန်းတော့တကယ်တော့အဆင်မပြေဘူး။မူဝါဒတွေဘယ်လိုဆက်ဖြစ်မလဲတော့စောင့်ကြည့်ရမှာပေါ့။ လောလောဆယ်စာမေးပွဲစနစ်ကို ဝေဖန်တာတွေရှိနေတာ့ပေါ့"လို့ ဘာသာစကားသင်ကြားရေးပိုင်းမှာလုပ်ကိုင်သူတစ်ဦးကပြောပါတယ်။
ကိုရီးယားနိုင်ငံကိုနှစ်နိုင်ငံအစိုးရချင်းချိတ်ဆက်ပြီးစိုက်ပျိုးရေး ၊ မွေးမြူရေးနဲ့ကုန်ထုတ်လုပ်ငန်း တွေအတွက်အမျိုးသားလုပ်သားတွေစေလွှတ်ခဲ့တာပါ။
အခုနှစ်မှာတော့ဝန်ဆောင်မှုလုပ်ငန်းတွေအတွက်ပါလုပ်သားတွေခေါ်ယူနေပြီးအမျိုးသမီးအလုပ်သမားတွေပါစတင်ခေါ်ယူနေတာဖြစ်ပါတယ်။
ကိုရီးယားနိုင်ငံမှာပြည်တွင်းကသွားရောက်လုပ်ကိုင်လိုသူများတဲ့နိုင်ငံဖြစ်ပြီးစာမေးပွဲမှတ်ပုံတင်ကြေးပေးသွင်းဖို့ကိုညအိပ်စောင့်ခဲ့ရတဲ့အထိဖြစ်ခဲ့ပါတယ်။
