လှိုင်သာယာမြို့နယ် စက်မှုဇုန် ၅၊ အနော်ရထာလမ်းမှာ ဖွင့်လှစ်ထားတဲ့ E&P Fashion အထည်ချုပ်စက်ရုံက အလုပ်သမား (၄၀၀) ကျော်ဟာစက်ရုံတွင်းခြိမ်းခြောက်မှုတွေခံနေရတယ်လို့ သိရပါ တယ်။
အဆိုပါစက်ရုံဟာ တရုတ်နိုင်ငံသားပိုင်ဆိုင်ပြီး အလုပ်သမားလူဉီးရေ (၄၀၀)ကျော်ဖြင့် House၊ xc တံဆိပ်ဖြစ်တဲ့ ဂျင်းအနွေးထည်၊ လက်ပျက်ဂျာကင်ထည်များ ချုပ်လုပ်နေတဲ့စက်ရုံဖြစ်တယ်လို့ သိရပါတယ်။
၎င်းစက်ရုံမှမန်နေဂျာဆိုသူဟာ ပြီးခဲ့တဲ့စက်တင်ဘာ ၃၀ ရက်နေ့က အလုပ်ရှင်သဘောမကျတဲ့အလုပ်သမားများ၊ ငြိမ်မခံဘဲပြန်ခံပြီးပြောတဲ့ အလုပ်သမားများကို "နောက်စက်ရုံတွေမှာ အလုပ်လျှောက်မရအောင်လုပ်ပစ်မယ်"လို့ ခြိမ်းခြောက်ခဲ့သလို အလုပ်သမားတွေကို pdf ပါလို့ စစ်တပ်ကိုတိုင်ပြီး ဖမ်းခိုင်းမယ်လို့လည်း လုပ်ငန်းခွင်ထဲတွင် ရည်ရွယ်ချက်ရှိရှိ ခြိမ်းခြောက်မှုများ ပြုလုပ်ကာ စေခိုင်းနေတယ်လို့ အလုပ်သမားတွေကပြောဆိုပါတယ်။
အဲဒီလိုခြိမ်းခြောက်မှုများရှိနေခြင်းကြောင့် အလုပ်သမားများဟာ လုပ်ငန်းခွင်ထဲမှာ လုံခြုံမှုမရှိသလို ခံစားနေရပြီး စိုးရိမ်မှုများဖြင့် လုပ်ကိုင်နေရတာဖြစ်တယ်လို့ဆိုပါတယ်။
ဒါ့အပြင် အော်ဒါအရေးကြီးတယ်ဆိုကာ အချိန်ပိုအိုတီများကို အောနိုက်၊ အောလင်းများဆင်းခိုင်းပြီး လစာပေးချေရာမှာလည်း ဒေးကြေးနဲ့ပေးချေမယ်လို့ အသိပေးထားပြီး လစာပေးရာတွင် အထည်ကြေးနဲ့ ရှင်းပေးတာမျိုး ပြုလုပ်လေ့ရှိတာကြောင့် အခက်တွေ့နေရတယ်လို့အလုပ်သမားကပြောဆိုပါတယ်။
"လစာကို ဘယ်လိုပေးမလဲမေးရင် ၁ ရက်နေ့ကနေ ၃၀ ရက်နေ့ထိကို ဒေးကြေး ၄၈၀၀ နှုန်းနဲ့ပေးမယ်ပြောတယ် လကုန်လို့ ၅ ရက်နေရင်တော့ အထည်ကြေးနဲ့ပေးမယ်ဆိုပြီး ပြောင်းသွားတယ် အလုပ်လုပ်လို့ရမဲ့ပမာဏနဲ့ အလုပ်ရှင်တွက်ပေးတဲ့ လစာပမာဏက ကွာနေတော့အဆင်မပြေဘူး"လို့ အလုပ်သမားကပြောပါတယ်။
အဆိုပါ လုပ်ငန်းခွင်အတွင်း ကိစ္စရပ်တွေနဲ့ပတ်သက်လို့ ကျေနပ်မှုမရှိသော်လည်း တိုင်ကြားရန် ခက်ခဲနေခြင်း အလုပ်သမားတွေရဲ့ ဓါတ်ပုံကို အလုပ်မရအောင် လုပ်မယ်လို့ခြိမ်းခြောက်တာနဲ့ စစ်တပ်ကို ဖမ်းခိုင်းမယ်ဆိုပြီးခြိမ်းခြောက်ပြောဆိုနေလို့ အကြောက်တရားတွေနဲ့ ငြိမ်ခံနေရတယ်လို့အလုပ်သမားတွေကပြောဆိုပါတယ်။
"စက်ရုံကို ၉ လပိုင်း ၂၀ ရက်နေ့က ယာယီပိတ်တယ်ဆိုပြီးကြေညာတယ် ၁၀ လပိုင်း ၂ ရက်နေ့မှာ ပြန်ဖွင့်တယ် အလုပ်ပိတ်ထားတဲ့ရက်တွေကိုတော့ အလုပ်သမားတွေရဲ့ သဘောမပါဘဲ ၂၄၀၀ ပဲပေးတယ် အဲဒါကိုထောက်ပြတဲ့ အလုပ်သမား တစ်ဝက်လောက်ကို အလုပ်မခိုင်းဘဲ ငုတ်တုတ်ထိုင်ခိုင်းထားတယ်"လို့ အလုပ်သမားတစ်ဦးကပြောဆိုပါတယ်။
စက်ရုံယာယီပိတ်ရက်အတွက် ဒေးကြေး ၂၄၀၀ သာ ပေးချေမှုအပေါ် ထောက်ပြတဲ့အလုပ်သမား ဦးရေဟာ ၁၈၀ ကျော်ရှိပြီး ပြန်လည် တွက်ချက်ပေးတာမျိုးလည်းမရှိဘူးလို့ ဆိုပါတယ်။
အလုပ်သမားတွေရဲ့တောင်းဆိုချက်အနေနဲ့ လုပ်ငန်းခွင်ထဲမှာ မန်နေဂျာမှ အလုပ်သမားများကို စစ်တပ်ဖြင့်ဖမ်းခိုင်းမည်ဟု ခြိမ်းခြောက်မှုများ မပြုလုပ်ရန် အလုပ်မခိုင်းဘဲ ငုတ်တုတ်ထိုင်ခိုင်းထားတဲ့ အလုပ်သမားက (၁၈၇)ယောက်ကို အငြိုးအတေးထားပြီး မဆက်ဆံရန် အလုပ်သမားများ အသုံးပြုသောအိမ်သာများကို ပြင်ဆင်ပေးရန် လစာပေးရာတွင် ရှင်းလင်းမှုရှိရန်နှင့် လစာထုတ်ခါနီးမှ အပြောင်းအလဲပြုလုပ်ပြီး မရှင်းရှင်းမပြုလုပ်ရန် အချိန်ပိုအိုတီများကို အောနိုက်၊ အောလင်းများဆင်းခိုင်းရာတွင် အလုပ်သမားများ သဘောဆန္ဒကို မေးမြန်ရန်နှင့် ဖိအားပေးဆင်းခိုင်းခြင်း မပြုလုပ်ရန်တို့ တောင်းဆိုလိုတယ်လို့ ဆိုပါတယ်။
