လုပ်ခလစာတိုးပေးဖို့ တောင်းဆိုမှုတွေ ဖြစ်ပွားပြီးနောက် နေ့စားလုပ်သား ၅၀ ဝန်းကျင်ကို Dishang Fashion Myanmar အထည်ချုပ်စက်ရုံက အလုပ်ကနေ ရပ်နားလိုက်တယ်လို့ အလုပ်သမားတွေက ပြောပါတယ်။ စက်ရုံမှာ နေ့စားလုပ်သား ၁၀၀ ဝန်းကျင် လုပ်ကိုင်နေပြီး ဒီထဲက နေ့စားလုပ်သား တဝတ်လောက်ကို ဒီကနေ့မှာ စက်ရုံက အလုပ်ရပ်နားလိုက်တာ ဖြစ်ပါတယ်။
“ ၃၀ ရက်နေ့က နေ့စားခတွေ ရှင်းပေးတော့ တခါတည်း အလုပ်မလာဖို့ ပြောလိုက်တာ။ အကြောင်းပြချက်မရှိလည်း မရှိဘူး။ တစ်ပတ်အလုပ်နားလိုက်တယ်တဲ့။ ဘာမှ ကြိုမပြောခဲ့ဘူး။ အလုပ်ဖြုတ်တဲ့ HR မန်နေဂျာကလည်း စက်ရုံမှူးနဲ့ မရီရီ (စကားပြန်၊ လက်ထောက် စက်ရုံမှူး) က အဲလို ပြောခိုင်းလို့ ဆိုပြီး ထုတ်လိုက်တာပဲ” လို့ အလုပ်သမားတွေက ပြောပါတယ်။
Iron ဌာနက နေ့စားအလုပ်သမားတွေကို အမြဲတမ်းခန့်အပ်ခဲ့ပြီး ကျန်တဲ့ အလုပ်သမားတွေကို အလုပ်မခန့်ဘဲ အခုလို မကြာခဏ အလုပ်ထုတ်တာလို့ အလုပ်သမားတွေက ပြောပါတယ်။
နေ့စားလုပ်သားတွေထဲမှာ လုပ်သက် တစ်နှစ်ပြည့်တဲ့ အလုပ်သမားတွေနဲ့ လုပ်သက် ၃ လကေျာ် အလုပ်သမားတွေပါဝင်နေပြီး လခစားအလုပ်သမားအဖြစ် မခန့်ထားတဲ့ အပြင် အခုလို အလုပ်ရပ် နားလိုက်တာလို့ ဆက်ပြောပါတယ်။ ဒါ့အပြင် ဒေးကြေး ကျပ်တစ်သောင်း နဲ့အချိန်ပိုနာရီ တနာရီ ကျပ် ၂၁၀၀ ပဲ ခံစားခွင့်ရှိပြီး ကျန်တဲ့ ဥပဒေပါ အခွင့်အရေးတွေ မရဘူလို့ နေ့စားအလုပ်သမားတွေက ပြောပါတယ်။
“ လစား မခန့်တဲ့အပြင် အလုပ်ပါနားလိုက်တယ်။ အလုပ်ပြုတ်တော့ လာမဲ့ ငါးရက်နေ့ ပေးရမဲ့ အဆောင်ခတွေ၊ စားကြွေးတွေ ပေးဖို့ ရှိနေတာ၊ ဒုက္ခတွေ ရောက်နေပြီ” လို့ အလုပ်သမားတွေက ပြောပါတယ်။
Dishang Fashion Myanmar က နေ့စား အလုပ်သမားတွေမှာ ခွင့်တစ်ရက်ယူလည်း အလုပ်ပြုတ်တဲ့ အပြင် ရက်ပေါင်ကြေးပါ တင်ထားရတာလို့ ဆိုပါတယ်။ ဒါ့အပြင် အော်တစ် (ကုန်အမှတ်တံဆိပ် ကိုယ်စားလှယ်) တွေလာလို့ စက်ရုံက အိမ်ပြန်လွှတ်ပြီး နေ့တဝက်စာ ကျပ် ငါးထောင်ပဲ ပေးထားတယ် လို့ နေ့စားလုပ်သား တချို့က ပြောပါတယ်။
“ Wcc ကို ပြောခိုင်းတော့လည်း တစ်ပတ်ဆိုလည်း တစ်ပတ်နားလိုက်ပေါ့တဲ့၊ တစ်ပတ်ပြည့်ရင် ပြန်ခေါ်မှာလားဆိုတော့လည်း အသေအချာမသိဘူးလို့ ပြောနေတာ။” လို့ အလုပ်သမားတွေက ပြောပါတယ်။
နေ့စားလုပ်သားတွေ ရပ်နားထားတာက အလုပ်လိုအပ်ချက် ကြောင့် ရပ်နားထားတာ ဖြစ်ပြီး လာမဲ့ ဗုဒ္ဓဟူးနေ့မှာ ပြန်လည်လုပ်ကိုင်ခိုင်းမှာ ဆိုတာကို ကြားသိထားတယ်လို့ စက်ရုံဘက်က တာဝန်ရှိသူ တဦးကပြောပါတယ်။
“ စက်ရုံမှာ နေ့စားမရှိလို့မရဘူး။ နှစ်ယောက်လုပ်ရမဲ့နေရာမှာ တစ်ယောက်တည်း နွားလိုခိုင်းချင် နေတာ။ ဒါမျိုး မလုပ်နိုင်ပါဘူး” လို့ စက်ရုံအလုပ်သမားတဦးက ပြောပါတယ်။
Dishang Fashion Myanmar အထည်ချုပ် စက်ရုံက လှိုင်သာယာမြို့နယ်၊ ရွှေသံလွင်စက်မှုဇုန် ၊ မင်းကြီးမဟာမင်းခေါင်လမ်းမှာရှိပြီး နေ့စားလုပ်သားအပါအဝင် အလုပ်သမား ၁၀၀၀ ဝန်းကျင် လုပ်ကိုင်နေပါတယ်။ ပြီးခဲ့တဲ့ ရက်ပိုင်းက အချက်အလက်တွေအရု Bestseller တံဆိပ် အထည်တွေ ချုပ်လုပ်နေတယ်လို့ Myanmar Labour News က သိထားပါတယ်။
