ထိုင်းရောက်မြန်မာအလုပ်သမားတွေ အတွက် မည်သူမည်ဝါဖြစ်ကြောင်း သက်သေခံလက်မှတ် CI စာအုပ် ပြုလုပ်နိုင်ရန် အတွက် ပြုလုပ်ပေးမယ့် ရုံးတွေ ကို မကြာခင်မှာ ဖွင့်လှစ်ဆောင်ရွက်ပေးမယ်လို့ ထိုင်းအလုပ်သမားဝန်ကြီးဌာန ၊ စီမံခန့်ခွဲရေးဦးစီးဌာနက  ထုတ်ပြန်လိုက်ပါတယ်။

ထိုင်းရောက်မြန်မာရွှေ့ပြောင်းလုပ်သားတွေ ကို CI စာအုပ် ပြုလုပ်ပေးရန် အတွက် မြန်မာအစိုးရနဲ့ ထိုင်းအာဏာပိုင်တွေ ဆွေးနွေးလျက်ရှိပြီး မြန်မာဘက် နဲ့ ညှိနှိုင်းသဘောတူညီမှုရရှိပါက  အသေးစိတ်အချက်အလက်တွေကို မကြာမီ ကြေငြာပေးမယ်လို့ ဆိုပါတယ်။

""အခုက ဘတ်အသစ် ရိုက်ထားတဲ့သူတွေ မြန်မာဘက်က ပတ်စပို့စာအုပ်အနီ မပါလာတဲ့သူတွေ အနေနဲ့ CI စာအုပ် လုပ်လို့ရတော့မယ် လို့ ထိုင်းဘက်က ကြေညာပေးတာ ကြားသိတာတော့ ၆ လပိုင်းထဲ စမယ်လို့ သိရပါတယ် CI စာအုပ် လုပ်မယ့် သူတွေ အနေနဲ့တော့ ပိုက်ဆံ စုထားပြီး CI ရုံးတွေ ဖွင့်မယ့် ရက်ကို စောင့်ကြည့်ဖို့လိုမယ် "" လို့ ထိုင်းရောက်မြန်မာအလုပ်သမားတွေကို အထောက်အထားများပြုလုပ်ရန်အကျိုးဆောင်ပေးသူတစ်ဦးကပြောပါတယ်။

ထိုင်းအလုပ်သမားဝန်ကြီးဌာနရဲ့ဧပြီ ၁၁ရက်က  ထုတ်ပြန်ချက်မှာတော့ မည်သည့်လပိုင်းနေ့ရက်တွေ နဲ့ မည်သည့် နေရာ တွေ မှာ လုပ်ဆောင်ပေးမယ်ဆိုတာ ထုတ်ပြန်ခြင်း
မရှိသေးတဲ့ အပြင် ကုန်ကျစရိတ် ကိုလည်း ထုတ်ပြန်ထားတာမရှိသေးပါဘူး။

ဒါကြောင့် CI စာအုပ် ပြုလုပ်လိုတဲ့ မြန်မာရွှေ့ပြောင်း လုပ်သားတွေ အနေနဲ့ ထိုင်းအစိုးရရဲ့ အသေးစိတ်အချက်အလက် ထုတ်ပြန်ချက်တွေကို စောင့်ကြည့်ဖို့နဲ့  CIစာအုပ်ပြုလုပ်ရန် ပွဲစားများ ကို ငွေကြိုတင်ပေးချေတာမျိုးတွေ မပြုလုပ်ဖို့ ထိုင်းရောက်မြန်မာအလုပ်သမားအရေးကူညီသူတွေက သတိပေးထားပါတယ်။