ထိုင်းနိုင်ငံ အတွင်း အလုပ်လုပ် ကိုင်နေတဲ့ မြန်မာလုပ်သားတွေအနေနဲ့ CI စာအုပ်မှ PJ နိုင်ငံကူးလက်မှတ် ပြောင်းလဲ ရာမှာ စာအုပ်အတွင်း ထိုင်းနိုင်ငံအတွက်သာအသုံးပြုခွင့်ပေးသည်ဆိုတဲ့ စာတမ်းကိုစက်တင်ဘာ၂၅ ရက်မှစတင် ရိုက်နှိပ်ကာ ကန့်သက်လိုက်တယ်လို့ ဗီဇာနှင့် ဘတ်လျှောက်ထားမှု အတွက်ဝန်ဆောင်မှုပေးနေတဲ့ အေးဂျင့် တွေထံကသိရပါတယ်။

 

မဟာချိုင်မြို့နယ် မှာ CI ( Certificate of Identity) စာအုပ်စိမ်းမှ PJ (Passport for Job ) စာအုပ်နီ လဲလှယ်ရန် ရက်ချိန်းယူပြီးလုပ်ဆောင်တဲ့ မြန်မာလုပ်သားတွေ ရဲ့ နိုင်ငံကူးလက်မှတ် စာအုပ်ထဲ မှာ Passport For Thailand Only တုံးကို ထုပေး လိုက်တယ်လို့ သိရပါတယ်။

 

""ဒီနေ့ မဟာချိုင်မှာ PJ စာအုပ်အသစ်တွေကို Passport For Thailand Only ဆိုပြီးစတင် Stamp ထုပေးနေပြီ ဒါကြောင့် ထိုင်းမှာ ပတ်စပို့ အသစ်ပြုလုပ်တာဖြစ်စေ သက်တမ်းကုန်လို့ အသစ်တိုးတာဖြစ်စေ ပြုလုပ်ပါက ထိုင်းမှာဘဲနေထိုင်ရမှာ ဖြစ်တယ်""လို့ ဗီဇာနှင့် ဘတ်လျှောက်ထားမှု အတွက်ဝန်ဆောင်မှုပေးနေတဲ့ အေးဂျင့်မှတာဝန်ရှိသူတစ်ဦးကပြောပါတယ်။

 

လက်ရှိမှာ CIမှ PJ ပြောင်းလဲသူတွေ ကို သာ Passport For Thailand Only စာသားပါတဲ့ တုံး ထုပေးပေမယ့် မြန်မာသံရုံးမှ ထုတ်ပေးတဲ့ သက်တမ်းတိုး နိုင်ငံကူးလက်မှတ်တွေ ကိုတော့ ၎င်းစာသားပါ တုံးထုပေးတာမရှိသေးဘူးလို့ သိရပါတယ်။

 

""အခုလို လုပ်လိုက်တာဟာ မြန်မာအလုပ်သမားတွေ တခြားနိုင်ငံကို အလုပ်ပြောင်းလို့ မရတော့ဘဲ အလုပ်သမားတွေရဲ့ အခွင့်ရေးတွေ ဆုံးရှုံးသွားတာပေါ့ ထိုင်းမှာရှိတဲ့ မြန်မာလုပ်သားတွေကို နည်းမျိုးစုံနဲ့နှိပ်ကွပ်တယ်လို့မြင်တယ်""လို့ ထိုင်းရောက်မြန်မာလုပ်သားရေးကူညီပေးသူတစ်ဦးကပြောပါတယ်။

 

အခုလို မြန်မာ စစ်ကော်မရှင် ဘက်က ထိုင်းရောက်မြန်မာလုပ်သားတွေကို နည်းမျိုးစုံနဲ့ ကန့်သက်မှု လုပ်ဆောင်တဲ့ အတွက် မြန်မာရွှေ့ပြောင်းလုပ်သားများကြား မကျေနပ်မှုတွေ ဖြစ်ပေါ်လျက်ရှိပါတယ်။

 

"သူတို့က အဲ့လို ကန့်သက်တယ်ဆိုရင် ပိုက်ဆံအကုန်ခံပြီး PJ ဘာလို့ပြောင်းနေမှာလဲ CI စာအုပ်နဲ့ဘဲ သက်တမ်းကုန်တဲ့ အထိ နေတော့မယ် ပြည်ပကိုထွက်ဖို့ လုပ်နေသူတွေအတွက်လည်း သူတို့ ဘယ်လိုဘဲ ပိတ်ပင် ပါစေ နည်းလမ်းတွေက သူ့ဟာသူပေါ်လာမှာပါ ""လို့ထိုင်းရောက်မြန်မာလုပ်သားတစ်ဦးကပြောပါတယ်။

 

လက်တလောအခြေနေအရ ယခင်က CI မှ PJ ပြောင်းထားသူတွေ မှာ ပြည်ပနိုင်ငံ တွေကို ဆက်လက်ထွက်လို့ရနေမှာဖြစ်ပြီး ယခုမှ CIမှ PJ ပြောင်းသူတွေ ကတော့ မြန်မာနိုင်ငံမှ လွဲပြီး အခြားနိုင်ငံကို ဆက်လက်သွားလာခွင့်မရဘူးလို့သိရပါတယ်။