ရွှေပြည်သာမြို့နယ်၊ ၀ါးတရာစက်မှုဇုန်၊ ငမိုးရိမ်လမ်းက Chuan Qi အထည်ချုပ်စက်ရုံအလုပ်သမားတွေ စုပေါင်းတောင်ဆိုမှု ပြုလုပ် နေတယ်လို့ သိရပါတယ်။ ပြီးခဲ့တဲ့ ဖေဖော်ဝါရီ ၂၇ ရက်နေ့လယ်ပိုင်းမှာ စတင်ခဲ့တာဖြစ် လက်ရှိအချိန်အထိ တောင်းဆိုမှု ပြုလုပ်နေတယ်လို့ အလုပ်သမားတွေက ပြောပါတယ်။
“ပေးထားတဲ့ ရက်မှန်ကြေးတွေလျှော့လိုက်တယ်။ နောက် တစ်ကက်ကြေးတွေရော အပြည့်အဝ၊ ရက်မှန်ကြေးလည်း ပြောထားတဲ့ အတိုင်းပေးဖို့ တောင်းဆိုတာပါ။ ပိုတောင်းတာလည်း မဟုတ်ဘူး။ လျှော့ပေးလို့ပါ ။ ” လို့ စက်ရုံအလုပ်သမားတဦးက ပြောပါတယ်။
စက်ရုံဘက်က လုပ်ခတန်းတူပေးရေးအပါအဝင် ဥပဒေအရ၊ အခွင့်အရေးအရ ချိုးဖောက်ခံထားရဲ့ အချက် ၁၆ ချက်ကို ဖြည့်ဆည်းပေးဖို့ တောင်းဆိုထားတာကို တွေ့ရပါတယ်။ လက်ရှိတောင်းဆိုမှုမှာ အလုပ်သမား ၂၀၀ ဝန်းကျင် ပါဝင်နေပြီး အတင်းအကျပ် ခိုင်းစေမှုတွေ ရှိခဲ့လို့ အခုလို ပါဝင်နေတာလို့ အမျိုးသမီး အလုပ်သမားတဦးက ပြောပါတယ်။
“အထည်ကြေး ၃၀၀၀၀ ပြည့်အောင်ချုပ်မထားရင် မပေးဘူး ပြောတယ်။ အထည်ကြေးအတွက်ဆို စုပေါင်း ချုပ်ရတာတွေလည်း ရှိတယ်။ ရတာက တစ်ကျပ်/ နှစ်ကျပ်နဲ့ ဆိုတော့ ရဖို့တောင်မရှိတော့ဘူး.” လို့ ပြောပါတယ်။
Chuan Qi အထည်ချုပ်စက်ရုံက ရှောင်ဖအိပ်ချုပ်စက်ရုံ အပေါ်ထပ်မှာ ဖွင့်လှစ်ထားတာ တစ်နှစ်ဝန်းကျင်ရှိပေမဲ့ EC စာချုပ် ချုပ်ပေးတာလည်း မရှိဘူးလို့ ပြောပါတယ်။ စက်ရုံဘက်က ရက်မှန်ကြေး အပါအဝင် တောင်းဆို ချက်တွေ လိုက်ရောမှုမရှိသေးဘဲ အလုပ်သမားဦးစီးဌာနက လာရောက်ညှိနှိုင်းပေးမယ်ဆိုပြီး အကြောင်းပြန် ထားပါတယ်။
