ရန်ကုန်မြို့၊ ရွှေပြည်သာစက်မှုဇုန်၊ ၁၄ လမ်းဆုံအနီး က တရုတ်နိုင်ငံသားပိုင် CHI MEI Garment အထည်ချုပ်စက်ရုံက အလုပ်သမားတွေကို အချိန်ပို အောလင်း အတင်းအကျပ်ဆင်းခိုင်းနေတယ်လို့ အလုပ်သမားတွေ က STUM ကို ပြောပါတယ်။
ဇူလိုင်လအတွင်းမှာ အလုပ်သမားတွေကို အောလင်း အချိန်ပို ၁၀ ရက်ကျော်ထိ ဆင်းခိုင်းခဲ့ပြီး ဩဂုတ်လ ဆန်းပိုင်းအထိ ဆင်းခိုင်းနေတာဖြစ်ပါတယ်။အချိန်ပိုအလွန်ဆင်းရတာကြောင့် ကျန်းမာရေးထိိခိုက်မှုတွေ ရှိနေတယ်လို့ လည်း အလုပ်သမားတွေကပြောထားပါတယ်။
အချိန်ပို အောလင်းမဆင်းပါက ဂရိတ်ကြေး ဖြတ်မယ့်အပြင် အလုပ်သမားတွေ အနေနဲ့ တိုင်ကြားမယ် ဆိုရင်လည်း အထက်လူကြီးတွေက အလုပ်ပိုပြီးဖိအား ပေးခိုင်းမယ်လို့ စက်ရုံမန်နေဂျာက ပြောဆို ခဲ့တယ်လို့ သိရပါတယ်။
အချိန်ပို အလုပ်ကို ဇူလိုင်လ ၈ ရက်နေ့ကနေ ဩဂုတ်လ ၂ ရက်နေ့ထိ အတွင်းမှာ ရက်ခြား ဆင်းခိုင်း နေတာဖြစ်ပြီးတော့ အလုပ်အချိန်ပို ဆင်းသူဟာ တစ်ရက်နားခွင့်ရှိပေမယ့် နားရက်တစ်ရက်ကိုလည်း နားခွင့် မပေးဘူးလို့ အလုပ်သမားတွေက ပြောပါတယ်။
အောလင်းဆင်းသူ အလုပ်သမားတွေကို ထမင်းဖိုးလို့ဆိုပြီး တစ်ရက်သုံးထောင် ပေးပေမယ့် နားချိန် နာရီဝက်သာ ရတယ်လို့ ဆိုပါတယ်။အဆိုပါ လုပ်ငန်းခွင်မှာ လုပ်ငန်းခွင်ဆိုင်ရာ ညှိနှိုင်းရေးကော်မတီ WCC လည်းဖွဲ့စည်းထားတာမရှိဘူးလို့ သိရပါတယ်။
ပြီးခဲ့တဲ့ဇူလိုင်လထဲမှာလည်း အချိန်ပိုခွင့်ပြုချက်မရှိဘဲ ခိုင်းစေတာ၊ စစ်ဆေးမှုတွေကို လိမ်လည်ဖြေကြားခိုင်းတာနဲ့ အချိန်ပိုကို ဖိအားပေးခိုင်းစေနေတာတွေ ကြောင့် အလုပ်သမားတွေက တိုင်ကြားခဲ့ပေမယ့် ချိုးဖောက်မှုတွေ ထပ်မံကျူးလွန်နေတာဖြစ်တယ်လို့ အလုပ်သမားတွေကပြောပါတယ်။
အဆိုပါ စက်ရုံဟာ အလုပ်သမား ၉၀၀ ကျော်နဲ့ ကုတ်အင်္ကျီအရှည်၊ ဖလန်ထည်နဲ့ ဝယ်လွန်အင်္ကျီတွေ ထုတ်လုပ်တဲ့ စက်ရုံဖြစ်ပါတယ်။
