Casico Garment Co.,Ltd အထည်ချုပ်စက်ရုံက နိုဝင်ဘာလအတွက် လုပ်ခစာ လက်ရှိအချိန်အထိ ထုတ်ပေးတာမရှိဘူးလို့ မြန်မာနိုင်ငံကုန်ထုတ်နှင့် စက်မှုလက်မှု အလုပ်သမားများ အဖွဲ့ချုပ် (IWFM) ကို အလုပ်သမားတွေက ပြောပါတယ်။ အထည်ချုပ်စက်ရုံတွေ ပုံမှလစာတွေကို လဆန်း ၅ ရက်မှာ ထုတ်ပေးလေ့ရှိတယ်လို့ အထည်ချုပ် အလုပ်သမားအသိုင်းအဝိုင်းက ပြောပါတယ်။
"လစာ ထုတ်ရက် ၅ ရက်နေမပေးတာ ၃လရှိ နေပြီ။ အခု ၁၁လပိုင်း လ စာဆို ဒီကနေ့ အထိ မရသေးတာ။ အဆောင်ခ၊ စာကြွေးတွေဆို လကုန်ပြီး ၅ ရက်နေ့ဆို တောင်းကြတယ်။ အခုတော့ အရှက်လည်းရတယ်။ ယုံကြည်မှုလည်း မရှိကြတော့ဘူး။ တလည်းမဟုတ် နှစ်လလည်း မဟုတ်နဲ့ ဒုက္ခရောက်နေတယ်” လို့ အလုပ်သမားတွေက ပြောပါတယ်။
ဒီလို လစာမရတာ ၊ ပေးရမဲ့ လစာတွေမပေးတာတွေကို အလုပ်သမားရုံးမှာ တိုင်ကြားထားတယ်လို့လည်း အလုပ်သမားတွေက ပြောပါတယ်။
Casico Garment Co.,Ltd စက်ရုံက ဆိပ်ကမ်းသာလမ်း၊ စက်မှုဇုန်၃၊ လှိုင်သာယာမြို့နယ်မှာ ဖွင့်လှစ်ထားပြီး အလုပ်သမားများ ၄၀၀ ကျော် လုပ်ကိုင်နေတယ်လို့ သိရပါတယ်။ လုပ်ငန်းခွင်အတွင်း အထည်စံချိန် ကို ဆဲဆိုတောင်းခံလို့ ဖိအားတွေနဲ့ လုပ်ကိုင်နေရတယ်ဆိုပြီးလည်း အလုပ်သမားတွေက ပြောပါတယ်။
“စက်လိုင်းမှာ ၄၅ ယောက်ချုပ်တယ်၊ ဘဲမွှေးထည် တနာရီ ၆၀အထိတောင်းတယ်၊ ချုပ်သမားတစ်ဦးကို သုံးပွိုင့်ကနေ လေးပွိုင့်အထိချုပ်ရတယ်။ တနေကုန်ချုပ်ပြီး တောင်းတဲ့ စံချိန်က အချိန်ပို မပါဘဲ ချုပ်ရတာ ။ မပြည့်တာနဲ့ စူပါ၊ အောစူပါတွေက အကုန်ဆဲတော့တာ၊ နားမခံနိုင်ပဲ” လို့ ပြောပါတယ်။
ဒါ့မပြင် ဥပဒေပါ ခံစားခွင့် ၊ ဆေးခွင့်အပါအဝင် ခွင့်ရက်တွေ အလုပ်တစ်ရက်ပျက်ပါက ဒေးကြေးအပြင် တခြားခံစားခွင့်တွေ ဖြတ်တောက်နဲ့ ကျပ် ၁၀၀၀ တိုးမြှင့်ပေးရမယ်လို့ အလုပ်သမားဝန်ကြီးဌာနရဲ့ ထုတ်ပြန်ချက်ကိုလည်း စက်ရုံဘက်က လိုက်နာတာ မရှိဘူးလို့ အလုပ်သမားတွေက ပြောပါတယ်။
“ရက်ပျက်တာနဲ့ ဒေးကြေး ရက်မှန်ကြေး ၆၀,၀၀၀ ဖြတ် တယ်။ တိုးပေးရမယ်ဆိုတဲ့ စကစက ထောက်ပံ့ကြေး ကျပ် ၁၀၀၀ ကို မပေးဘူး.” လို့ ပြောပါတယ်။
လုပ်ငန်းခွင်အတွက် သောက်ရေမှာ သန့်ရှင်းမှု မရှိဘဲ သောက်သုံးနေရလို့ ကျန်းမာရေးပြဿနာတွေ လည်း ဖြစ်ပွားနေတယ်လို့ အလုပ်သမားတွေက ပြောကြားထားပါတယ်။ Casico Garment Co.,Ltd အထည်ချုပ်စက်ရုံက တရုတ်နိုင်ငံသားပိုင် စက်ရုံဖြစ်ပြီး KENTA တံဆိပ် ဘဲမွှေးထည်တွေ ချုပ်နေတယ်လို့ သိထားပါတယ်။
