Casico Garment Limited အထည်ချုပ်စက်ရုံက ဥပဒေမှာ သတ်မှတ်ထားတဲ့ ဒေးကြေး အပြည့်မပေးဘဲ လုပ်ကိုင်ခိုင်းနေတယ်လို့ အလုပ်သမားတွေက ပြောပါတယ်။
“အလုပ်သမားတွေကို ဒေးကြေးပေးတာကို ခွဲခြားပေးတယ်။ စက်ချုပ်တွေကိုပဲ ၅၈၀၀ ၊ ၆၈၀၀ ၊ ၇၂၀၀ အဲလိုတွေ မတူအောင် ပေးတယ်။ ဟက်ပါ(အကူလုပ်သား)တွေကိုလည်း ဒေးကြေး၄၈၀၀ ပဲပေးတယ်။ အလုပ်ကတော့ ၇၂၀၀ ဖြစ်ဖြစ် ၄၈၀၀ ဖြစ်ဖြစ် အလုပ်ချိန်အတူတူ၊ စံချိန်လည်း အတူတူ လုပ်ပေးရတာ။ ဒေးကြေးမှာဘဲ ခွဲခြားတာ”လို့ အလုပ်သမားတွေက ပြောပါတယ်။
မြန်မာအလုပ်သမားဥပဒေအရ အနည်းဆုံးလုပ်ခလစာ တရက် ၄၈၀၀ ဖြစ်ပေမဲ့ ပြီးခဲ့နှစ်အတွင်း ထောက်ပံကြေး ကျပ် ၂၀၀၀ ထပ်တိုးပေးဖို့ အလုပ်သမားဝန်ကြီးဌာနက ညွှန်ကြားထားပါတယ်။
နေ့စဉ် စက်ရုံမှာ အချိန်ပို ၂ ကျော် ပုံမှန်လုပ်ကိုင်ရတဲ့ အပြင် ညနက်အချိန်ပိုတွေလုပ်ကိုင်ခိုင်းတယ်လို့ အလုပ်သမားတွေက ပြောပါတယ်။ အချိန်ပို ဆင်း၊ မဆင်း အလုပ်သမားတွေရဲ့ ဆန္ဒကို မေးမြန်းတာမရှိဘဲ စက်ရုံဘက်က ဖိအားပေး လုပ်ကိုင်ခိုင်းတယ်လို့ အလုပ်သမားတွေက ပြောပါတယ်။
“အလုပ်သမားတွေ ည ၁၂အထိ အချိန်ပို ဆင်းချင်ကြဘူး။ ဒါကို အလုပ်ရှင်ဘက်က ဖိအားပေး ဆင်းခိုင်းတယ်။ အချိန်ပိုအတွက် လက်မှတ် ထိုးခိုင်းတာလည်းမရှိဘူး။ ဆင်းချင်လား ဆိုတာလဲ မမေးဘူး။ အလုပ်သမားရုံး တိုင်တာလည်း ၃ ခါ၊ တခါမှလာမစစ်ဘူး” လို့ အလုပ်သမားတွေက ပြောပါတယ်။
ဥပဒေမှာပါတဲ့ ခွင့်ရက်အမျိုးအစားတွေ အလုပ်သမားတွေ မရဘဲ ရက်ပျက်သတ်မှတ်ပြီး ဒေးကြေး၊ ရက်မှန်ကြေး ကျပ် ၃၀၀၀၀ ဖြတ်တောက်ခံရတယ်လို့ အလုပ်သမားတွေက ပြောပါတယ်။ စက်ရုံဘက်က ဂိတ်ပတ်စ် မပေးတာကြောင့် မိသားစုကိစ္စ အရေးပေါ် ဖြစ်လာတိုင်း အလုပ်သမားတွေမှာ လူမှုဒုက္ခတွေ ခံစားရတယ်လို့ ပြောပါတယ်။
စက်ရုံတာဝန်ရှိသူတွေက အလုပ်သမားတွေ မချုပ်နိုင်တဲ့ အထိ ဖိအားပေး အထည်စံချိန်တောင်းပြီး စက်ရုံ ရုံးလုပ်ငန်းမှာ တာဝန်ရှိတဲ့ HR မန်နေဂျာပါ စက်လိုင်းထဲဝင်ပြီးစံချိန်တောင်းတယ်လို့ သိရပါတယ်။
“စက်လိုင်းတစ်လိုင်းမှာ လူ ၅၀ ကျော်ချုပ်တယ်။ ဝယ်လွန်လို အထည်ကို တစ်နာရီကို ၃၅ ထည် အထိတောင်းတယ်။ အထည်စံချိန် မရဘူးဆိုတာနဲ့ အောစူပါ၊ စူပါတွေက ဆဲတော့တာပဲ။ မရမချင်း ဆဲနေတာ။ “ လို့ အလုပ်သမားတွေက ပြောပါတယ်။
Casico Garment Limited အထည်ချုပ်စက်ရုံက ရန်ကုန်မြို့၊လှိုင်သာယာမြို့နယ်၊ ဆိပ်ကမ်းသာလမ်း၊ စက်မှုဇုန်၃ မှာ အလုပ်သမား ၄၀၀ ကျော်နဲ့ SPAO တံဆိပ်တွေ ချုပ်လုပ်နေတယ်လို့ သိရပါတယ်။ စက်ရုံကို ကိုရီးယားနိုင်ငံသားပိုင်ဆိုင်ပြီး အလုပ်သမား သမဂ္ဂအဖွဲ့တော့ ဖွဲ့စည်းထားတာမရှိဘူးလို့ အလုပ်သမားတွေက ပြောကြားထားပါတယ်။
