A&C အထည်ချုပ် စက်ရုံမှာ စက်ရုံက ကြီးကြပ်ရေး နိုင်ငံခြားသားတွေနဲ့ အောစူပါတွေကို ကန်တော့ဖို့ အတွက်ဆိုပြီး လစာက ဖြတ်တောက်ရယူခဲ့တယ်လို့ သိရပါတယ်။ အလုပ်သမား တဦး ကျပ် ၃၀၀၀နဲ့ အထည်ဆုကြေး ကျပ်၄၀၀၀ စုစုပေါင်း ကျပ် ၇၀၀၀ ဖြတ်တောက်ခဲ့တယ်လို့ အလုပ်သမားတွေက ပြောပါတယ်။
“ လိုင်းပိုင်တရုတ်ကျဲကျဲ နဲ့ အောစူပါကို ကန်တော့ ဖို့ဆိုပြီး လစဥ် အထည်ဆုကြေးထဲက ၄၀၀၀ ကိုနှုတ်တယ်။ အထည်ဆုကြေးက ၈၅၀၀ ရတယ်။ လစာထုတ်တုန်းကလဲ လစာထဲက ၃၀၀၀ နုတ်တယ် ။ ပေးချင်လား မပေးချင်လား မမေးခဲ့ဘူး။ လစာအစွန်းထွက် ပိုက်ဆံ တွေဆိုရင် လည်း ထုတ်မပေးဘူး တန်ဆောင်တိုင် အတွက်ဆိုပြီး ယူထားတယ် ။ ပြီးရင် ထပ်ကောက်တယ်။” လို့ ပြောပါတယ်။
စက်ရုံဘက်က ရက်ပျက်နဲ့ ဂိတ် ပတ်စ်ယူရာမှာလည်း လစာနဲ့ ရက်မှန်ကြေးဖြတ်တောက်နေတယ်လို့ ဆိုပါတယ်။
"ရက်ပျက်၊ ဂိတ်ပတ် ယူရင် ရက်မှန်ကြေး အကုန်ဖြတ်တယ်။ ဂရိတ်ချတယ် ။လစာတိုးပေးဖို့ကျ ခေါင်းဆောင်တွေက မပြောပေးဘူး ပိုက်ဆံတောင်းဖို့ဆိုရင် သူတို့က လုပ်တယ် " လို့လည်း ပြောပါတယ်။
စက်ရုံက အမျိုးသမီး သန့်စင်ခန်းတွေမှာ ဂျက်၊ မီလုံးများ ပျက်စီးနေပြိး မိုးမလုံတဲ့ အပြင် ရေညှိများ ညစ်ပတ်နေတယ်လို့ အမျိုးသမီးလုပ်သားတဦးက ပြောပါတယ်။ အပေါ်ထပ် သောက်ရေဘေစင် ပျက်စီးတာကြောင့် အလုပ်သမားတွေ ထမင်းစားသည့်နေရာကို ရေကျနေပေမဲ့ စက်ရုံ ဘက်က ပြုပြင်ပေးတာမရှိလို့ ထမင်းစားဖို့ အခက်အခဲတွေ ရှိနေတယ်လို့လည်း ပြောပါတယ်။
A&C အထည်ချုပ် စက်ရုံက ရန်ကုန်တိုင်း၊ မှော်ဘီမြို့နယ်၊ မြောင်းတကာ စက်မှုဇုန်၊ လမ်း၁ မှာရှိပြီး Camel Active တံဆိပ် အထည်တွေ ချုပ်လုပ်နေတဲ့ တရုတ်နိုင်ငံသားပိုင် အထည်ချုပ် စက်ရုံ တစ်ရုံ ဖြစ်ပါတယ်။
