ထိုင်းနိုင်ငံက မြန်မာရွှေ့ပြောင်း အလုပ်သမားတွေကို အကူညီပေးနေတဲ့ AAC-ဂေဟာ ကို အာဏာပိုင်တွေက အပြီးပိတ်သိမ်းပြီး မသန်စွမ်း မြန်မာအလုပ်သမားတွေကို ညတွင်းချင်း ပြောင်းရွှေ့ဖို ဖိအားပေးနေတယ်လို့ AAC-မဟာမိတ်အဖွဲ့ ဒါရိုက်တာ ဦးခိုင်ကြီးရဲ့ လူမှုကွန်ရက်စာမျက်နှာ ဖေ့ဘွတ်မှာ ရေးသားထားပါတယ်။
ဒီကနေ့ ဧပြီ ၂၂ ရက် မနက်ပိုင်းမှာ ထိုင်းအာဏာပိုင်တွေက ဂေဟာ ပိတ်သိမ်းဖို့ ညွှန်ကြားထားတာ ရက်ပေါင်း(၆၀) လို့ လက်ရှိ အဆောက်အဦကို ဖြိုပေးဖို ဒုတိယအကြိမ်လာရောက် အမိန့်ပေးခဲ့တယ်လို့ ဆိုပါတယ်။ ဒါ့အပြင် ဂေဟာ မှာ နေထိုင်နေတဲ့ ခြေလက်မသန်စွမ်း အလုပ်သမားတွေကို .ည ၇-နာရီ နောက်ဆုံးထား ပြောင်းရွေ့ပေးဖို့ပါ ပြောဆိုခဲ့တာလို့ သိရပါတယ်။
"ဂေဟာမှာက ခြေလက်မသန်စွမ်းတဲ့ မြန်မာ လုပ်သား၂၀ဦးရှိတယ်။ ၇ဦးက မိုးပျံတံတားပြိုကျတုန်းက ဖြစ်ခဲ့တဲ့ သူတွေ။ ကျန် ၁၃ဦး လုပ်ငန်းခွင် ထိခိုက်ဒဏ်ရာရရှိသူတွေပါ။ ညနေ ၅နာရီ နောက်ဆုံးထားပြောင်းပေးဖို လာပြောတယ်။ အခု ညနေငါးနာရီ မှာ တခါလာကြည့်ပြီး။ ၇နာရီ မှာ လာစစ်မယ်ဆိုပြီး ဖိအားပေးသွားတယ်"လို့ ဦးခိုင်ကြီးက ရေးသားထားပါတယ်။
ပြီးခဲ့တဲ့ ဖေဖေါ်ဝါရီ လ ၂၀ရက်က AAC မဟာမိတ်ရုံး ကို ထိုင်းဥပဒေအရ တရားဝင် အသင်းပင်း ဖွဲစည်းခွင့်မရှိ တာကြောင့်ဆိုကာ ဂေဟာကို ထိုင်းအာဏာပိုင်တွေက ပထမအကြိမ် ဝင်ရောက် ချိတ်ပိတ်ကာ ရက်ပေါင်း ၆၀ အတွင်း ပိတ်သိမ်းဖို အမိန့်ထုတ်ခဲ့တာ ဖြစ်ပါတယ်။
"ပထမအကြိမ် ပိတ်သိမ်းဖို အမိန့်ထုတ်ကတည်းက တရားရုံးမှာ အယူခံဝင်ဖိုတင်ထားတယ်။ တကယ်ဆို တရားရုံးရဲ့ အမိန့် မချမချင်း၊ ဒီမှာနေလိုရသေးတာ။ အခု ချက်ချင်းကြီး ပြောင်းဖို အဖွဲအစုံလာပြီး ဖိအားပေး ခြိမ်းခြောက်လိုက်၊ ချော့ပြောလိုက်နဲ့ ပြောင်းခိုင်းနေတာ""လို့ ဦးခိုင်ကြီးက ပြောပါတယ်။
လက်တွဲကူညီ AAC မဟာမိတ်အဖွဲ့က ထိုင်းနိုင်ငံရောက် မြန်မာရွှေ့ပြောင်းလုပ်သားတွေအရေး ကူညီဆောင်ရွက် နေတာမှာ ၁၀နှစ် ကျော် ရှိပြီ ဖြစ်ပြီး အခုလို ချက်ချင်း ပြောင်းရွှေ့ခိုင်းတဲ့ အတွက် မသန်စွမ်းတဲ့ မြန်မာအလုပ်သမားတွေ နေထိုင်ဖို့ အခက်ခဲဖြစ်နေတယ်လို့ ဦးခိုင်ကြီးက ရေးသားထားပါတယ်။
Photo- Hla Khaing (FB)
