NEWS

Sanyuan over sea 1 အထည်ချုပ်စက်ရုံ အချိန်ပိုလုပ်ကိုင်ခိုင်းပြီး လုပ်ခမပေး

CoverLogo
628 Views

ရန်ကုန်တိုင်း အစိုးရအဖွဲ့ဝင် လာရောက်လေ့ရှိတဲ့  Sanyuan over sea 1 အထည်ချုပ်စက်ရုံမှာ အချိန်ပိုလုပ်ကိုင် ခိုင်းပြီး လုပ်ခပေးတာမရှိဘူးလို့ စက်ရုံအလုပ်သမားတွေက ပြောပါတယ်။

အဲဒီစက်ရုံကတော့ တရုတ်နိုင်ငံသားပိုင် ဖြစ်ပြီး ရန်ကုန်မြို့ ရှေ့ဒဂုံ စက်မှုဇုန်က မင်းသိဒ္ဓိကျော်စွာလမ်းမှာ အလုပ်သမားအင်အား ၂၅၀၀ လောက်နဲ့ လုပ်ကိုင်နေတယ်လို့  အထည်ချုပ် အလုပ်သမား တစ်ဦးက ပြောပါတယ်။

“စူပါ အောစူပါ တွေက နေ့ခင်းဘက် အာဝါတီ မပေးနိုင်ရင် ညဘက် အိုတီ ဆင်းခိုင်းပြီး ပိုက်ဆံ မပေးပါဘူး”  လို့ အထည်ချုပ်အလုပ်သမားတစ်ဦးက ပြောဆိုပါတယ်။

စက်ရုံတာဝန်ရှိသူတွေက အလုပ်သမားတွေကို လုပ်ခမပေးဘဲ ခိုင်းစေတာတွေဟာ စစ်အာဏာသိမ်းပြီး ပိုမို များပြားလာတယ်လို့ ဆက်ပြောပါတယ်။ ညဘက် အချိန်ပိုဆင်းပါက အိမ်ဝေးတဲ့ အလုပ်သမားတွေဆို မပြန်ရဘဲ စက်ရုံမှာပဲ ဖြစ်သလို အိပ်ရတယ်လို့ ပြောဆိုပါတယ်။

“အလုပ်ထဲမှာ စူပါတွေက ဆဲရင်လည်း ဖာနဲ့ ဖေနဲ့ ကိုင်ဆဲပါတယ် ညဘက် အိုတီ ဆင်းရင် ဝေးတဲ့သူဆို အိမ်မပြန်ရပါဘူး စက်ရုံ မှာ အိပ်ခိုင်းတယ် အိပ်ရင်လည်း ခွေးအိပ် နွားအိပ် အိပ်ရပါတယ် ပြန်လိုက်ပို့တဲ့ ကားဆိုရင်လည်း လမ်းကြောင်းအစုံတင်ပြီး ည ၁၁ နာရီ လောက်မှ အိမ်ရောက်ပါတယ်” လို့ စက်ရုံ အထည်ချုပ်အလုပ်သမားတွေက Myanmar Labour News ကို ပြောဆိုပါတယ်။

အရေးပေါ်ကိုယ်ရေးကိုယ်တာအတွက် ဂိတ်ပတ်စ်တောင်းရင် မပေးတဲ့ အပြင် ခွင့်ပေးတာတွေလည်းမရှိဘူး အလုပ်သမားတွေက ပြောပါတယ်။

အခြေအနေအရပ်ရပ်ကြောင့် လိုအပ်လို့ ခွင့်တောင်းပါကလည်း မပေးတဲ့အပြင် ပြောဆိုခံရတယ်လို သိရပါတယ်။

စက်ရုံအတွင်း ဈေးမရောင်းရ၊ ငွေတိုးမချေးလို့ တာဝန်ရှိသူတွေက ထုတ်ပြန်ထားပေမဲ့ စူပါ၊ အောစူပါ၊ စက်ရုံစာရေးမနဲ့ ဒုတိယ စက်ရုံမှူးအမျိုးသမီးက အလုပ်သမားတွေကို ဂုတ်သွေးစုတ် အမြတ်ယူပြီးရောင်းချပြီး စက်ရုံစည်းကမ်းကို ချိုးဖောက်နေတယ်လို့လည်း အလုပ်သမားတွေက ပြောပါတယ်။

“စူပါ၊အောစူပါ နဲ့ စာရေးမများက စက်ရုံအလုပ်သမားတွေကို အဝတ်အစား ၅၀၀၀ တန်ကို ၁၈၀၀၀နဲ့ မယူမနေရ စနစ်နဲ့ ရောင်းပါတယ် ။ ဒုတိယစက်ရုံမှူးက လိုင်း စူပါတွေကို ရောင်းခိုင်းပါတယ်။ အဲဒီ ဒုတိယ စက်ရုံမှူးကပဲ ၂၀  တိုးနဲ့ ငွေတိုးလည်းချေးပါတယ်။  အလုပ်သမား တွေ အပေါ် ဂုတ်သွေးစုတ် အမြတ်ယူပြီး မတရား လုပ်ဆောင် နေတာပါ” လို့ ကိုယ်တိုင်ကြုံတွေနေရတဲ့ စက်ရုံအလုပ်သမားအမျိုးသမီး တစ်ဦးက  ပြောဆိုပါတယ်။

လုပ်ငန်းခွင်အတွင်း တနေ့ကုန် အိမ်သာသွားခွင့်မရအောင် တင်းကျပ်ထားပြီး  အလုပ်ဆင်းချိန် အိမ်သာမှာ လူရှိရင် စူပါတွေက အော်ဟစ် ဆဲဆိုတယ်လို့ ပြောဆိုပါတယ်။

Brand ဘက်က စစ်ဆေးရေးဝင်ပါကလည်း စက်ရုံဘက်က သင်ထားပေးတဲ့ အတိုင်း ဖြေဆိုရလို့ ချိုးဖောက်ခံရတာတွေကို တိုင်ကြားခွင့် မရဘူးလို့ အလုပ်သမားတွေက ပြောဆိုပါတယ်။

“ Brand ဘက်က Qc တွေ လာစစ်တော့  HR တွေ သင်ပေးတဲ့အတိုင်း ဖြေရပါတယ်။ မဖြေလာရင် တွေ့မယ်လို့လည်း စူပါ တွေ အောစူပါ တွေက ကြိမ်းမောင်းပါတယ်။ ကြောက်တော့ စက်ရုံမှာ အလုပ်သမားတွေ ခံစားနေရတာကို မပြောရဲ ကြတော့ဘူး “ လို့ အလုပ်သမားတွေက ပြောပါတယ်။

Sanyuan over sea 1 အထည်ချုပ်စက်ရုံဟာ နိုင်ငံခြားသားရင်းနှီးမြုပ်နှံမှုနဲ့ တည်ထောင်ထားပြီး ပိုင်ရှင်ကတော့ တရုတ်လူမျိုးဖြစ်တယ်လို့ သိရပါတယ်။ 
စက်ရုံကနေ Mango၊ Adidas အပါအဝင်  STRADIVARIUS၊ Piazza Italia စတဲ့ ကမ္ဘာကျော် အမှတ်တဆိပ်တွေအပါအဝင် အမှတ်တံဆိပ် ၈ ခုလောက် ချုပ်လုပ်နေတယ်လို့ အလုပ်သမားတွေက ပြောပါတယ်။

#MyanmarLabourNews


Related posts

Cover
အလုပ်သမားအခွင့်အရေးချိုးဖောက်မှုများအတွက် စစ်ကောင်စီ တာဝန်ခံရမည်ဟု CTUM ထုတ်ပြန်
Oct 03, 2023
Cover
ဟွမ်မြောင်အထည်ချုပ်စက်ရုံအလုပ်သမားတွေ လုပ်ခလစာရရှိဖို့ စက်ရုံတွင်းညအိပ်စောင့်ဆိုင်းခဲ့ပေမဲ့ အလုပ်ရှင်ကလစ်လျူရှုကာ စက်ပစ္စည်းများသာသယ်ယူနေ
Oct 03, 2023
Cover
လုပ်ခလစာနဲ့စက်ရုံပိတ်နစ်နာကြေးရဖို့ စက်ရုံအတွင်းညအိပ်စောင့်ဆိုင်းနေစဥ် အလုပ်သမား ၂ ဦးဖမ်းဆီးခံထားရ
Oct 02, 2023
Cover
HONG MIAO အထည်ချုပ်စက်ရုံမှာ လုပ်ခလစာနဲ့ နစ်နာကြေးပေးချေဖို့ကိစ္စ အလုပ်သမားတွေ လာရောက်စောင့်ဆိုင်း ၊ စက်ရုံဘက်က ရဲတပ်ဖွဲ့ခေါ်ထား
Oct 02, 2023
Cover
အွန်လိုင်းပေါ်မှ  အလုပ်အကိုင်ရှာဖွေပေးမည်ဟု မက်လုံးပေးကာ ငွေတောင်းခံမှုတွေ သတိပြုဖို့လို
Oct 01, 2023
Cover
အစိုးရဝန်ထမ်းများကို အပိုထောက်ပံ့ကြေး ခေါင်းစဉ်ဖြင့် ကျပ် ၃၀၀၀၀ တိုးပေး ပုဂ္ဂလိကကဏ္ဍအတွက် သတင်းထုတ်ပြန်ခြင်း မရှိသေး
Sep 30, 2023
Cover
လှိုင်သာယာက SYNERGY အထည်ချုပ်စက်ရုံ ပိတ်ရက်မပေးဘဲ  အလုပ်ဆင်းခိုင်းနေတယ်လို့အလုပ်သမားတွေပြော
Sep 30, 2023
Cover
Galaxy ( Myanmar ) စက်ရုံ အလုပ်သမားအခွင့်အရေးချိုးဖောက်နေ
Sep 29, 2023