ရွှေပြည်သာမြို့နယ်တရားရုံးမှာ တရားစွဲဆိုခြင်းခံထားရတဲ့ YFA ( Yangon Fukuyama Apparel) စက်ရုံပိုင်ရှင်ဟာ တရားရုံးက ဆင့်ခေါ်ထားတဲ့ ရုံးချိန်း သုံးချိန်းလုံးပျက်ကွက်ခဲ့တယ်လို့ အလုပ်သမားဘက်က ကူညီဆောင်ရွက်ပေးနေတဲ့ သွေးစည်းညီညွတ်သောသမဂ္ဂများအဖွဲ့ချုပ်(STUM)ထံက သိရပါတယ်။
" မလာပါဘူး။ ရုံးချိန်းသုံးကြိမ်တိတိပျက်ကွက်ထားပါတယ်။ မလာဘူး။ ၈ရက်နေ့ပြန်ချိန်းထားတယ်။ အဲ့နေ့တော့အလုပ်သမားဘက်က စာတင်တာ တစ်ခုခုလုပ်ပါမယ်" လို့ ဆိုပါတယ်။
YFA စက်ရုံအလုပ်သမားဖြစ်တဲ့ မအိပိုပိုလှိုင်က တရုတ်နိုင်ငံသား စက်ရုံပိုင်ရှင်ကို
အလုပ်ခန့်ထားမှုဆိုင်ရာသဘောတူစာချုပ်ချိုးဖောက်မှုအတွက် မြို့နယ်အလုပ်သမားရုံးရဲ့ခွင့်ပြုချက်နဲ့ အလုပ်ရှင်ကို ရွှေပြည်သာမြို့နယ်တရားရုံးမှာ ဇန်နဝါရီလ ၃၁ ရက်က တရားစွဲဆိုခဲ့တာဖြစ်ပါတယ်။
အဲဒီလိုတရားစွဲဆိုခဲ့တာကြောင့် ရုံးချိန်းချိန်းဆိုခဲ့ပေမဲ့ ရောက်ရှိလာခြင်းမရှိဘဲ
မတ်လ ၁ရက်အထိ ရုံးချိန်းသုံးချိန်းခေါ်ယူခဲ့ရာမှာလည်း ထပ်မံပျက်ကွက်ခဲ့တာလို့သိရပါတယ်။
YFA စက်ရုံဟာ အလုပ်သမားတွေကိုအကြောင်းမဲ့အလုပ်ထုတ်ပယ်မှုအတွက်လည်း အငြင်းပွားမှုတွေရှိနေတဲ့စက်ရုံဖြစ်သလို အလုပ်သမား ၁၅၀ ခန့်နဲ့လည်ပတ်နေတာဖြစ်ပြီး အထည်အော်ဒါနည်းတဲ့အကြောင်းပြချက်နဲ့ အလုပ်သမားဥပဒေအရ စက်ရုံပိတ်ရန်ကြိုတင်အသိမပေးဘဲ အလုပ်သမားတွေကို
နို့တစ်ကြေးမပေးဘဲ ပြီးခဲ့တဲ့နိုဝင်ဘာလကုန်က အလုပ်သမား ၁၅၀ နီးပါးကို အလုပ်ကရပ်စဲလိုက်တာပါ။
#MyanmarLabourNews
