မြန်မာနိုင်ငံအတွင်း ဆက်လက်ဖြစ်ပွားနေတဲ့ လက်နက်ကိုင်ပဋိပက္ခတွေနဲ့ အဓမ္မစစ်မှုထမ်းခိုင်းစေမှု ဖိအားတွေကြောင့် ၂၀၂၆ ခုနှစ် ဇန်နဝါရီလကနေ ဧပြီလအထိ ၄ လတာကာလအတွင်း မြန်မာနိုင်ငံသား ၆၈၇,၀၀၀ ခန့် (၇ သိန်းနီးပါး) ဟာ ထိုင်းနိုင်ငံထဲကို နည်းလမ်းမျိုးစုံနဲ့ ဝင်ရောက်ခဲ့တယ်လို့ ကုလသမဂ္ဂ ရွှေ့ပြောင်းသွားလာနေထိုင်ခြင်းဆိုင်ရာအဖွဲ့အစည်း (IOM) က သတင်းထုတ်ပြန်ပါတယ်။
ထိုင်းနိုင်ငံသို့ ဝင်ရောက်လာသူ တွေထဲက အများစု မှာ တရားဝင်စာရွက်စာတမ်းများ မပြည့်စုံသူတွေ ဖြစ်ပြီး စစ်ပွဲများနဲ့ စစ်မှုထမ်းဥပဒေအရ ခေါ်ဆောင်ခံရမှု များကို တိမ်းရှောင်ရန်၊ အလုပ်အကိုင်ရှာဖွေရန်၊ ကုန်သွယ်ရေးလုပ်ငန်းများ လုပ်ကိုင်ရန်နဲ့ မိသားစု၊ဆွေမျိုးများထံ လာရောက်ရန်တို့ ဖြစ်တယ်လို့ ဆိုပါတယ်။
အချို့ မြန်မာနိုင်ငံသားတွေကတော့ ထိုင်းနိုင်ငံကို ကြားခံလမ်းကြောင်းအဖြစ် သုံးပြီး မလေးရှားနိုင်ငံထဲ ဆက်လက်ဝင်ရောက်ဖို့ ကြိုးပမ်းကြရာမှာ ယခုနှစ်အတွင်း ထိုင်း-မလေးရှားနယ်စပ် လူမှောင်ခိုမှုဖြစ်စဉ်တွေအတွင်း ဖမ်းဆီးခံရသူတွေထဲ မြန်မာနိုင်ငံသား အများဆုံးဖြစ်နေတယ်လို့ IOM ရဲ့ထုတ်ပြန်ချက်မှာဖေါ်ပြထားပါတယ်။
ဒါ့အပြင် ရခိုင်ပြည်နယ်နဲ့ ဘင်္ဂလားဒေ့ရှ် ဒုက္ခသည်စခန်းတွေကနေ လည်း မလေးရှားနိုင်ငံသို့ ပင်လယ်ရေကြောင်းကနေ သွားရာမှ လမ်းခရီးအတွင်း သေဆုံး၊ ပျောက်ဆုံးနဲ့ ဖမ်းဆီးခံရမှုတွေ နှစ်စဉ်တိုးလာနေပြီး ၂၀၂၆ ခုနှစ်မှာလည်း အခြေအနေ ဆိုးရွားနေဆဲ ဖြစ်နေတယ်လို့အသိပေးထားပါတယ်။
ဒုက္ခသည်စခန်းတွေမှာ လူသားချင်းစာနာမှု အကူအညီတွေ လျော့နည်းလာခြင်းနဲ့ လုံခြုံရေးအခြေနေဆိုးရွားလာတာကြောင့် ပြည်သူတွေဟာ အသက်အန္တရာယ်မြင့်မားတဲ့ ရွှေ့ပြောင်းသွားလာမှုကို ရွေးချယ်လာရတာဖြစ်တယ်လို့ ကုလသမဂ္ဂ ရွှေ့ပြောင်းသွားလာနေထိုင်ခြင်းဆိုင်ရာအဖွဲ့အစည်း (IOM) က သုံးသပ်ထားပါတယ်။
