ရွှေပြည်သာမြို့နယ်အတွင်း နေထိုင်တဲ့ အိမ်ရှင်မိသားစုက ၁၅ နှစ်အရွယ် အမျိုးသမီး အိမ်အကူလုပ်သားတဦးကို ခန္ဓာကိုယ်မှာ ဒဏ်ရာအပြင်းအထန် ရရှိပြီး ဆေးရုံ ပြသရတဲ့အထိ ရိုက်နှက်ခဲ့တယ်လို့ ကျူးလွန်ခံရသူ မိသားစုနဲ့ နီးစပ်သူတဦးက ပြောပါတယ်။ ကျူးလွန်သူခံရသူမှာ စုစုပေါင်း မိသားစုဝင် ၄ ဦးရှိပြီး ဒဂုံဆိပ်ကမ်းမြိုနယ်က ကျူးကျော် ရပ်ကွက်တခုမှာ နေထိုင်ကြပြီး မိန်းကလေးငယ်အနေနဲ့ ထပ်မံခြိမ်းခြောက်ခံနေရတာတွေ ရှိနေတယ်လို့ လည်း သိရပါတယ်။
ဒီလို ရိုက်နှက်တာကို ကျူးလွန်ခံရသူ မိသားစုဝင်တွေက မသိရဘဲ ဒီဇင်ဘာ ၁၃ ရက်မှာမှ သမီးဖြစ်သူကို ရပ်ကျေးအဖွဲတွေ လာရောက် ခေါ်ယူသွားတယ်ဆိုပြီး ဆက်သွယ်ပြောဆိုတာကြောင့် အဲဒီအိမ်ကို သွားရောက်ခဲ့တာလို့ ပြောပါတယ်။ ဆေးရုံတက်ကုသနေရတဲ့ အိမ်အကူလုပ်သားမှာ ဝဲချိုဆောင်း ပေါက်ပြဲ၊ ဝဲနားထင်ဖူးရောင်၊ ကျောကုန်းဖူးရောင် ညိုမဲစွဲ၊ ယာဘက်ပုခုံး ဒဏ်ရာ၊ ဝဲဘက် လက်မောင်းနာကျင် ဒဏ်ရာ၊ ယာဘက် လက်ဖျံ ဒဏ်ရာ၊ ဝဲဘက် ဒူးခေါင်း ပေါက်ပြဲဒဏ်ရာ၊ ညာဘက်ခြေသလုံး ဒဏ်ရာတွေအပြင် နံရိုး ၂ ချောင်း ကျိုး၊ လက်ချောင်းတချောင်းကျိုးဒဏ်ရာ နဲ့ အင်းစိန်ဆေးရုံကြီးမှာ တက်ရောက်ကုသခဲ့ရပြီး နာကျင်မှုဒဏ်ကို အပြင်းအထန်ခံစားနေရတယ်လို့ သိရပါတယ်။
ကျူးလွန်ခံရမှုကို လှော်ကားရဲစခန်းမှာ အမှုဖွဲတိုင်ကြားထားပြီး ပုဒ်မ ၃၂၃ သာမာန်နာကျင်စေမှု၊ ပုဒ်မ ၃၂၅ အပြင်းထန် နာကျင်စေမှု၊ ပုဒ်မ ၃၅၄ ကာယိန္ဒြေပျက်စီးစေပြီး အနိုင်အထက်ပြုမှုနဲ့ ပုဒ်မ ၁၁၄ အားပေး ကူညီမှု တွေနဲ့ အမှုဖွင့်ထားတယ်လို့ သိရပါတယ်။ ကျူးလွန်ခံရသူကို ဆေးစစ်မှုတွေ ဆက်လက်လုပ်ဆောင်နေပြီး အမှုဖွင့်ခံထားရတဲ့ မိသားစုဝင််တွေကတော့ အာမခံနဲ့ လွှတ်ပေးထားတယ်လို သိထားရပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
