ပြည်ပကို မထွက်ခွာရသေးတဲ့ လုပ်သားသစ်(Fresh Worker)များဟာ ဝန်ကြီးဌာန မှ သတ်မှတ်ထားတဲ့ စနစ်တကျစုဆောင်းခြင်း၊ ပြည်ပသို့မထွက်ခွာမီ သင်တန်းတက်ရောက်ခြင်းနဲ့ ဆေးစစ်ခံခြင်း လုပ်ငန်းစဉ်များကို ကျော်လွှားနိုင်ရန် အတွက် ခွင့်ပြန် အလုပ်သမား အဖြစ် အသွင်ဆောင်ပြီး ပြည်ပထွက်ခွာဖို့ လုပ်ဆောင်လာတာတွေရှိနေတယ်လို့ အလုပ်သမားညွန်ကြားမှုဦးစီးဌာနမှ မတ်လ၂၅ရက်မှာထုတ်ပြန်တဲ့ ခွင့်ပြန်အလုပ်သမားများ၏ပြည်ပထွက်ခွာခွင့်များနှင့်စပ်လျဉ်း၍ ကြေညာချက်မှာ ဖေါ်ပြလာတာတွေ့ရပါတယ်။
အခုလို လုပ်ငန်းခွင်အာမခံချက် မရှိဘဲ ခွင့်ပြန် လုပ်သား အဖြစ်တရားမဝင်သွားရောက်သူ တွေဟာ ဥပဒေကြောင်းအရ အကာကွယ်မဲ့ခြင်း၊လုပ်အားခေါင်းပုံဖြတ်ခံရခြင်း၊ပြည်နှင်ဒဏ်ခံရခြင်း စတဲ့ အန္တရာယ် တွေ နဲ့ ကြုံတွေ့နိုင်တယ်လို့ အလုပ်သမားညွှန်ကြားမှုဦးစီးဌာနက အသိပေးထားပါတယ်။
"ဒီလို ပြသာနာတွေက တရားဝင် ပြည်ပ လုပ်သား စေလွှတ်ခွင့်ကို ကန့်သတ်ပိတ်ပင်တာတွေရဲ့ နောက်ဆက်တွဲ ပြသာနာတွေပဲ။ ဌာနဘက်က အသက် ၃၅ နှစ်အောက်အမျိုးသားတွေ ထွက်ခွင့်ပိတ်ထားတယ် ပြည်ပထွက်ခွင့်ကြန့်ကြာအောင် လုပ်ထားတော့ သွားချင်တဲ့ လူငယ်တွေက လည်း ရသလိုသွားတယ် ဒီအပေါ် အမြတ်ထုတ်ဖို့ စောင့်နေတဲ့ ပွဲစားတွေက မမှန်ကန်တဲ့ နည်းအမျိုးမျိုးနဲ့ ထွက်လို့ရအောင် လုပ်တယ် တစ်ခုခုဖြစ်တာနဲ့ တကယ်တမ်းနစ်နာဆုံးရှုံးတာက လုပ်သားပဲလေ ပွဲစားတွေကတော့ ရသလိုရှောင်ထွက်ကျမှာပဲ ""လို့ ပြည်ပအလုပ်ကိုင်အကျိုးဆောင်လိုင်စင်ရအေဂျင်စီတစ်ခုမှ တာဝန်ရှိသူတစ်ဦးက သူ့အမြင်ကို ပြောပါတယ်။
အလုပ်သမားဝန်ကြီးဌာန ၊အလုပ်သမားညွှန်ကြားရေးဦးစီးဌာန အနေနဲ့ပြည်ပထွက်ခွာခွင့်များနှင့်စပ်လျဉ်း၍ မမှန်မကန် လိမ်လည်တင်ပြလာသူနဲ့ မမှန်မကန် လိမ်လည်မှုများရဲ့ နောက်ကွယ်မှပါဝင်ကူညီသော သက်ဆိုင်ရာအဖွဲ့အစည်း၊ ပုဂ္ဂိုလ်များကို စုံစမ်းဖော်ထုတ်၍ ၁၉၉၉ ခုနှစ်၊ ပြည်ပအလုပ်အကိုင်ဆိုင်ရာဥပဒေ အပါအဝင် တည်ဆဲဥပဒေ၊ စည်းမျဉ်းစည်းကမ်းများအရ အရေးယူဆောင်ရွက်ခြင်းများ ပြုလုပ်မှာ ဖြစ်သလို လိမ်လည်တင်ပြသူကိုလည်း ကာလ သတ်မှတ်ချက်တစ်ခုဖြင့် ပြည်ပထွက်ခွာခွင့်ပိတ်ပင်ခြင်း၊ အမည်မည်းစာရင်း (Blacklist) ထည့်သွင်းဆောင်ရွက်သွားမယ်လို့ အသိပေးထုတ်ပြန်ထားပါတယ်။
အလုပ်သမားဝန်ကြီးဌာနအနေနဲ့ ပြည်ပထွက်ခွာမယ့် အလုပ်သမား အသစ်တွေ အပေါ်မှာ ကန့်သတ်ပိတ်ပင်တာတွေ ပြုလုပ်သလို ခွင့်ဖြင့်ပြည်ပကပြန်လာတဲ့ လုပ်သားတွေ အပေါ်မှာလည်း အမျိုးမျိုးသော စည်းကမ်းသတ်မှတ်ချက်တွေ ထုတ်ပြန်ခြင်း ထွက်ခွာရန် ခွင့်ပြုချက် ကြန့်ကြာတာတွေ ကြောင့် လည်း ခွင့်ပြန်လုပ်သားတွေမှာ ဆုံးရှုံးနစ်နာတာတွေ များစွာ ဖြစ်ပေါ်နေတယ်လို့ သိရပါတယ်။
