ဆေးခွင့်မရလို့ အလုပ်သမားရုံးကို တိုင်ကြားခဲ့တဲ့ အလုပ်သမားတဦးကို Sheng Mei Garment Co;Ltd စက်ရုံက  တာဝန်ရှိသူတွေက လုင်ငန်းခွင်အတွင်း ဖိနှိပ်မှုတွေ ပြုလုပ်နေတယ်လို့ သွေးစည်းညီညွတ်သော သမဂ္ဂများ အဖွဲ့ချုပ် STUM ဆီက သိရပါတယ်။ 

အဲဒီ စက်ရုံကတော့  အမှတ် ၁၂၊ မြေတိုင်းအမှတ် ၄၉၊ ဝါးတရာစက်မှုဇုန်မှာ ရှိပြီ အထည်ချုပ် စက်ရုံဖြစ်တယ်လို့ သိရပါတယ်။ 

အဲဒီ အလုပ်သမားဟာ  ၂၀၂၂ခုနှစ် ဇွန်၁ရက်မှာ အဲဒီစက်ရုံမှာ စတင်လုပ်ကိုင်ခဲ့တာဖြစ်ပြီး အခုနှစ် ဩဂုတ်လ  ၂၃ ရက်မှာ စက်ရုံတာဝန်ရှိသူဆီ ဆေးခွင့်တောင်းခံခဲ့ရာမှာ ခွင့်မပေးခဲ့တာလို့ အဲဒီ အလုပ်သမားက ပြောပါတယ်။ 

ဆေးခွင့်မရတာကြောင့် အလုပ်သမားဆက်ဆံရေး ဦးစီးဌာနဆီ  ကိုယ်တိုင်သွားရောက်တိုင်ကြားခဲ့ပြီး အဲဒီနောက် မှာ  စက်ရုံတစ်ရုံလုံးရဲ့ တာဝန်ခံ မပန်းအိဆိုသူက ခွင့်ယူတဲ့အလုပ်သမားကို အလုပ်ဌာန ရွေ့ပြောင်းတာ မကြာ ခဏ ပြုလုပ်ခဲ့တဲ့ အပြင် လူအများကြား အော်ဟစ်ငေါက်ငမ်းတာ၊” မလုပ်နိုင်ရင် ထွက်သွား” ဆိုပြီး ပြောဆို တာတွေကို လက်ရှိအချိန်အထိဆက်တိုက်ပြုလုပ်နေတာဖြစ်တယ်လို့ သိရပါတယ်။  

အခု နိုဝင်ဘာ ၂၄ ရက်မှာ စက်ရုံ HR မန်နေဂျာက ခေါ်ယူပြီး " ခွင့်ယူတာ များနေပြီ ၊နေမကောင်းဘူးဆိုရင်လည်း အလုပ်ထွက်ပြီး နားလိုက်တော့ ၊ မနားချင်ရင်နောက် ရက်မပျက်တော့ကြောင်း ခံဝန်ကတိ လက်မှတ်ထိုးပေး" ဆိုပြီး အတင်းအကြပ် လက်မှတ်ထိုးခိုင်းခဲ့တဲ့အပြင် တိုင်ချင်ရာ သွားတိုင်လိုက် ငါကတော့ လိုက်ရှင်းနိုင်တယ် ဆိုပြီး ပြောဆိုခဲ့တယ်လို့  STUM အဖွဲ့က ပြောဆိုပါတယ်။ 

အခုနှစ် နိုဝင်ဘာ  ၂ ရက်၊ ၃ ရက်နဲ့  ၂၁ ရက်တွေမှာ ကျန်းမာရေးမကောင်းတာကြောင့်  ခွင့်တိုင် အလုပ်နားခဲ့တာ ဖြစ်တယ်လို့ အဲ့ဒီ အလုပ်သမားက ပြောပါတယ်။   

Sheng Mei Garment Co;Ltd စက်ရုံဟာ FB SISTER၊  CLOSSHI၊ sinsay စတဲ့ အထည်တွေ ချုပ်လုပ်နေပြီး စက်ရုံတွင်း ခွဲခြားဆက်ဆံတာနဲ့  မတရားဖိအားပေးစေခိုင်းတာ စတဲ့ ချိုးဖောက်မှုတွေ ဖြစ်ပေါ်နေသလို   စက်ရုံတွင်း ဖွဲ့စည်းထားတဲ့  အလုပ်သမားသမဂ္ဂတဖွဲ့လုံးကို အလုပ်ဖြုတ်ခဲ့တဲ့စက်ရုံ ဖြစ်တယ်လို့ လည်း STUM အဖွဲ့က ပြောဆိုထားပါတယ်။

#MyanmarLabourNews