ပြည်ပမှ ခွင့်ဖြင့် ပြန်လာတဲ့ လုပ်သားတွေ ကစစ်ကော်မရှင် လက်အောက် ရှိ အလုပ်သမားဝန်ကြီးဌာနထံ ပြည်ပအလုပ်အကိုင် အလုပ်သမားသက်သေခံလက်မှတ် (OWIC)ကတ် လျှောက်ထားရာ မှာ လျှောက်ထားလာတဲ့ လုပ်သားတွေရဲ့ ပြည်ပမှ အလုပ်ရှင် နဲ့ HR တွေထံ ဖုန်းဆက်တာမှာ ဆက်သွယ်မရ လို့ဆိုပြီး လုပ်သားအချို့ကို OWIC ကတ် ပြုလုပ်ခွင့်မပေးဘူးလို့ Safe Migration တယ်လီဂရမ်ရဲ့ ဒီကနေ့ ထုတ်ပြန်အသိပေးချက်အရ သိရပါတယ်။
မလေးရှား နိုင်ငံမှ ခွင့်ပြန် လာတဲ့ လုပ်သားတွေမှ OWIC ကတ် လျှောက်ထားရာ လုပ်သား အချို့ ကို ၎င်းတို့ရဲ့ ပြည်ပရှိ အလုပ်ရှင်နဲ့ HR ကို ဖုန်းအဆက်သွယ်မရ လို့ ဆိုကာ OWIC ကတ် ပြုလုပ်ခွင့် မပေးဘူးလို့ သိရပါတယ်။
" လုပ်ငန်းရှင် ဆိုတာက အလုပ်များတယ် အစည်းအဝေး တတ်နေတာမျိုးတို့ဆိုလည်း ဖုန်း မကိုင်နိုင်တာရှိတယ် တချို့ ဆိုလည်း နိုင်ငံခြား ဖုန်းတို့ မသိတဲ့ ဖုန်း စိမ်းတို့ ဝင်လာရင် တော်ရုံ မကိုင်ကျဘူး အခုက အချက်အလက် စုံပြန်တော့လည်း ဖုန်းမကိုင်လို့ဆိုပြီး OWICကတ် ပြုလုပ်ခွင့် မပေးပြန်ဘူး ပြည်ပ ပြန်ထွက်ဖို့ တမင်ကြန့်ကြာအောင် လုပ်နေတာလို့မြင်တယ်"လို့ ခွင့်ပြန်လုပ်သား တစ်ဦးကပြောပါတယ်။
ခွင့်ပြန် လုပ်သားတွေ OWIC ကတ် လျှောက်ထားတာရာမှာ ပြည်ပက အလုပ်ရှင်နဲ့ HR တို့ရဲ့ ဖုန်းနံပတ် အီးမေး လိပ်စာ တွေ ပါ ထည့်ပေးဖို့ ပြီးခဲ့တဲ့ ဇန်နဝါရီ ၁၅ရက်က စစ်ကော်မရှင်ရဲ့ အလုပ်သမားဝန်ကြီးဌာန က ထုတ်ပြန်ကြေညာ ပြီးနောက် ဇန်နဝါရီ ၂၂ရက်မှာ လုပ်ငန်းရှင်တွေ ဖုန်းမကိုင်တဲ့ လုပ်သားတွေကို OWIC ကတ် ပြုလုပ်ခွင့် မပေးဘဲ ပြန်လည် လျှောက်ထား ဖို့ အသိပေး ထုတ်ပြန်လာပါတယ်။
စစ်ကော်မရှင် အနေနဲ့ စစ်မှုထမ်းဥပဒေ အကြောင်းပြ ပြီး ပြည်တွင်းမှ လူငယ်တွေကိူ ပြည်ပ ထွက် အလုပ်လုပ်ခွင့် ကန့်သက်ပိတ်ပင်တာတွေ ပြုလုပ် သလို လက်ရှိမှာလည်း ပြည်ပကနေ ခွင့်ဖြင့် ပြန်လာတဲ့ လုပ်သားတွေကို အနည်းအမျိုးမျိုး နဲ့ ကြန့်ကြာအောင် ပြုလုပ်နေတဲ့ အတွက် ခွင့်ပြန်လုပ်သားတွေမှာ လုပ်ငန်းခွင်ကို အချိန်မီ မပြန်နိုင်တာကြောင့် ဆုံးရှုံး နစ်နာ သလို ပြည်ပရောက် မြန်မာလုပ်သားတွေလည်း မိသားစု အရေးကြောင့် ပင် ပြည်တွင်းကို ပြန်လာဖို့ စိုးရွံ နေကျရတယ်လို့ သိရပါတယ်။
