ထိုင်းနိုင်ငံ၊ ချာချင်ဆောင်ခရိုင်က ကော်အရည်ကျိုစက်ရုံမှာ မြန်မာအလုပ်သမား ၁၉ ဦး အလုပ် ထုတ်ခံရတာကြောင့် နစ်နာကြေးရရှိဖို့ NUG အလုပ်သမားဝန်ကြီးဌာနနဲ့ MHACမဟာမိတ်အဖွဲ့တို့က ကူညီဖြေရှင်းပေးခဲ့တယ်လို့ ထုတ်ပြန်ထားပါတယ်။
ပြီးခဲ့တဲ့ ဧပြီ လ ၂၉ရက်က မြန်မာလုပ်သား ၁၉ဦး အလုပ်ထုတ်ခံခဲ့ရတာ ဖြစ်ပြီး လုပ်အားခကျန်ငွေ နဲ့ နစ်နာကြေးတွေ ပြန်လည်ရရှိဖို NUG အလုပ်သမားဝန်ကြီးဌာနဆီ အကူအညီတောင်းလာတဲ့ အတွက် ချာချင်ဆောင် မြို့နယ်၊ အလုပ်သမားကူညီရေးရုံး (ဆဝါဒီကန်ရုံး)မှာ အလုပ်သမားဝန်ကြီးဌာနက တာဝန်ရှိသူတွေနဲ့ MHAC အဖွဲ့တိုက အလုပ်ရှင်ကို အမှုဖွင့်တိုင်ကြားပေးခဲ့တယ်လို့ သိရပါတယ်။
ဒီလို တိုင်ကြားခဲ့ပြီးနောက် မေလ ၂၈ ရက်မှာ လုပ်အားခကျန်ငွေတွေ၊ နစ်နာကြေးနဲ့ အထောက် အထား စာရွက်စာတမ်းတွေကို ဆဝါဒီကန်ရုံးမှာပဲ အလုပ်ရှင်က အလုပ်သမားတွေကို ပေးအပ်ခဲ့တယ်လို့ သိရပါတယ်။
"ရွှေ့ပြောင်းအလုပ်သမားတွေ သိထားရမှာက အလုပ်ထုတ်ခံရရင် အထူးသဖြင့် နှစ်ကြီးသမားတွေ အနေနဲ့ စက်ရုံက မလိမ့်တပတ်နဲ့ အလုပ်ထုတ်ခဲ့ရင် ကိုယ်မသိနားမလည်တဲ့ စာတွေကို လက်မှတ် မထိုးကြဖို့ လိုတယ်"လို့ ထိုင်းရောက်မြန်မာအလုပ်သမားအရေး ကူညီပေးနေတဲ့ MHACမဟာမိတ်အဖွဲ့ တာဝန်ရှိသူတစ်ဦးက ပြောပါတယ်။
ပြည်ပရောက် မြန်မာလုပ်သားတွေ အနေနဲ့ အလုပ်သမားအခွင့်အရေးချိုးဖောက်ခံရမှု ဖြစ်ပေါ်က အမျိုးသားညီညွတ်ရေး အစိုးရအလုပ်သမားဝန်ကြီးဌာန ရဲ့ Email address - complaint@ molmyanmar.org နဲ့ ထိုင်း ဖုန်းနံပါတ် +66 969801067 ၊ +66 969801346 ၊+66 953950769 နဲ့မလေးရှားနိုင်ငံ ဖုန်းနံပါတ် +6011-1675 4215 ၊+60 1162167739၊ +60 109660273 တို့ကို တိုင်ကြားနိုင်တယ်လို့ ထုတ်ပြန်ထားပါတယ်။
