မေလ ၁ ရက်ကစကာ ပိတ်ပင်လိုက်တဲ့အမျိုးသားတွေပြည်ပထွက်အလုပ်လုပ်ခွင့်ထပ်မံခွင့်မပြုတော့ဘူးဆိုတဲ့အချက်ဟာ ရွှေ့ပြောင်းလုပ်သားတွေအတွက်ပိုပြီးကျပ်တည်းလာစရာအခြေအနေတွေဖြစ်ပေါ်နေပြီး တရားမဝင်ရွှေ့ပြောင်းသွားလာမှုတွေအပြင် လူကုန်ကူးမှုဖြစ်စဉ်တွေပါ ပိုဖြစ်လာနိုင်စေ တယ်လို့ ရွှေ့ပြောင်း အလုပ်သမား အရေးဆောင်ရွက်သူတွေ ကပြောပါတယ်။
မြန်မာနိုင်ငံဟာ ၂၀၂၁ခုနှစ်နောက်ပိုင်း နိုင်ငံရေးအခြေအနေမငြိမ်သက်မှုတွေကြောင့် စီးပွားရေးကျပ်တည်းလာတဲ့အတွက် ပြည်ပကိုထွက်ကာအလုပ်လုပ်ကိုင်ကြသူတွေများလာကာ ပြည်ပအလုပ်အကိုင်ထွက်လိုသူတွေလည်း တစ်ဆ နဲ့တစ်ဆများလာပါတယ်။
ပြည်ပသွားရောက်လုပ်ကိုင်လိုသူ များပြားနေ ချိန်မှာ ယခုကဲ့သို့အမျိုးသား လုပ်သားတွေပြည်ပထွက်ခွင့်ပိတ်လိုက်တာကြောင့် တရားမဝင်လမ်းကြောင်းတွေကနေ ပြည်ပသွားရောက်ဖို့ လုပ်ဆောင်လာကြပါက အလိမ်အညာပွဲစားတွေနဲ့တိုးကာ လူကုန်ကူးရောင်းစားခံရတာတွေလည်းရှိလာနိုင်တယ်လို့ ဆိုကြပါတယ်။
"ဒီလိုမျိုးရွှေ့ပြောင်းလုပ်သားတွေကို ပိတ်လိုက်ခြင်းကဘာဖြစ်လာနိုင်လဲဆိုတော့ မြန်မာနိုင်ငံမှာအခုစီးပွားရေးက အရမ်းကျပ်တည်းတယ်။ဘာမှလုပ်လို့မရတဲ့အခြေအနေမှာ နိုင်ငံခြားဝင်ငွေကို အဓိကရှာပေးတာကရွှေ့ပြောင်းလုပ်သားတွေပေါ့ ဒီလိုအခြေအနေမှာ ၁အချက် နိုင်ငံရဲ့စီးပွားရေးမှာပိုအကျပ်အတည်းတွေဖြစ်လာနိုင်သလို နောက်တချက်ကအရမ်းအရေးကြီးတယ်။ ဒါက လူငယ်တွေရဲ့ဘဝမှာ အခွင့်အလမ်းတွေအကုန်လုံးပိတ်ပစ်လိုက်သလိုဖြစ်သွားတဲ့အတွက် လူငယ်တွေရဲ့ဘဝမှာနဂိုကတည်းကအနာဂတ်ပျောက်နေတဲ့လူငယ်တွေကအခုဆိုရင်ပိုပြီးတော့ကူရာကယ်ရာမဲ့တွေဖြစ်လာမယ်လို့" ပြည်တွင်းမှာ ရွှေ့ပြောင်းအလုပ်သမား အရေး ဆောင်ရွက်သူ တဦးက ပြောပါတယ်။
မေ၁ရက်ကစလို့ အမျိုးသားများ ပြည်ပထွက်အလုပ်လုပ်ခွင့်ယာယီရပ်ဆိုင်းလိုက်ကြောင်းကြေညာချက်အရ ယခုလက်ရှိ ပြည်ပအလုပ်အကိုင်သွားရောက်ဖို့ခွင့်ပြုချက်ကျထားသူများ မပါရှိသေးကြောင်းနဲ့မေ၁ရက်နေ့နောက်ပိုင်းမှ ပြည်ပထွက်ဖို့လျှောက်ထားသူတွေအတွက်ကတော့ ပြည်ပအလုပ်အတွက် ပိတ်ပစ်လိုက်ပြီဖြစ်ကြောင်းသိရှိရပါတယ်။
အဆိုပါ ပြည်ပအလုပ်ထွက်လုပ်ခွင့်ယာယီရပ်ဆိုင်းမှုထဲမှာ တရားဝင်ပြည်ပကိုလုပ်သားစေလွှတ်နေတဲ့နိုင်ငံအားလုံးပါဝင်ပေမယ့် အစိုးရပြည်ပအလုပ်အကိုင်အေဂျင်စီ POEASမှ ကိုရီးယားနိုင်ငံကို EPSစနစ်နဲ့စေလွှတ်မှုကိုတော့အမျိုးသားလုပ်သားစေလွှတ်မှုယာယီရပ်နားတဲ့အထဲမပါရှိကြောင်းသိရပါတယ်။
