အားကောင်းတဲ့ အပူပိုင်းမုန်တိုင်း “ဘူအလွိုင်” ဟာ လာမယ့် စက်တင်ဘာ ၃၀ရက် နံနက်ပိုင်းမှာ မြန်မာနိုင်ငံအရှေ့ပိုင်း နယ်စပ်ဒေသတွေကို အပူပိုင်းမုန်တိုင်းငယ်အဖြစ် ဖြတ်ကျော်နိုင်တယ်လို့ ခန့်မှန်းထားကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက စက်တင်ဘာ ၂၉ရက် မွန်းတည့်၁၂နာရီမှာ သတင်းထုတ်ပြန်ထားပါတယ်။
ဗီယက်နမ်နိုင်ငံ ကုန်းတွင်းပိုင်းဒေသတွေကို ဖြတ်ကျော်ဝင်ရောက်ခဲ့တဲ့ အားကောင်းတဲ့ အပူပိုင်းမုန်တိုင်း “ဘူအလွိုင်”ဟာ အနောက်-အနောက်မြောက်ဘက်ကို ရွေ့လျားခဲ့ပြီး ဗီယက်နမ်နဲ့ လာအိုနိုင်ငံ နယ်စပ်ဒေသတွေကို ဆက်လက်ဖြတ်ကျော်လျက်ရှိတယ်လို့ဆိုပါတယ်။
၎င်းမုန်တိုင်းဟာ စက်တင်ဘာ ၃၀ ရက် နံနက်ပိုင်းမှာ လာအို နိုင်ငံနဲ့ မြန်မာ နိုင်ငံအရှေ့ပိုင်း နယ်စပ် ဒေသတွေကို အပူပိုင်းမုန်တိုင်းငယ်အဖြစ် ဆက်လက်ဖြတ်ကျော်နိုင်တယ်လို့ ခန့်မှန်းကြောင်း ထုတ်ပြန်ထားပါတယ်။
ပြင်ပမိုးလေဝသ လေ့လာစောင့်ကြည့်သူ ဦးဝင်နိုင်ကလည်း"" စက်တင်ဘာလ ၂၈ ရက် ည ၁၀ နာရီ ၂၀ မိနစ်မှာ တိုင်ဖွန်းမုန်တိုင်းဗဟို ဗီယက်နမ်ကမ်းခြေကို ဖြတ်ကျော်ဝင်ရောက်ပြီးတဲ့နောက် အောက်တိုဘာ ၁ ရက်နေ့ နံနက် ၂ နာရီ ၃၀ မိနစ်အထိ မြန်မာပြည်မှာ နေရာအနှံ့အပြားမိုးရွာနိုင်၊ နေရာကွက်ပြီး မိုးများနိုင်ပါမယ်။ ၂၀၂၄ ခုနှစ် တိုင်ဖွန်းမုန်တိုင်းယာဂိမုန်တိုင်းအကြွင်းအကျန်များလောက် မိုးများနိုင်ခြင်းမဖြစ်သလို ရေကြီးရေလျှံခြင်းဆိုးရွားစွာဖြစ်ခြင်း မရှိနိုင်ပါဘူး""လို့ သုံးသပ်ပြောကြားထားပါတယ်။
မုန်တိုင်းအရှိန်ကြောင့် ယနေ့နံနက်မှ အောက်တိုဘာလ ၁ ရက်နေ့အတွင်း နေပြည်တော်၊ ရန်ကုန်တိုင်း၊ မန္တလေးတိုင်း၊ ပဲခူးတိုင်း၊ မကွေးတိုင်း၊ စစ်ကိုင်းတိုင်း၊ ဧရာဝတီတိုင်း၊ တနင်္သာရီတိုင်း၊ ကချင်၊ ကယား၊ ကရင်၊ ချင်း၊ မွန်၊ ရခိုင်ပြည်နယ်နဲ့ ရှမ်းပြည်နယ်တို့မှာ နေရာစိပ်စိပ်ကနေ နေရာအနှံ့အပြား မိုးထစ်ချုန်းရွာပြီးအချို့ဒေသတွေမှာ ဒေသအလိုက်နေရာကွက်ပြီး မိုးကြီးနိုင်တယ်လို့ မိုး/ဇလ က ထုတ်ပြန်ထားပါတယ်။
မြန်မာ့ကမ်းရိုးတန်းတစ်လျှောက်နဲ့ ကမ်းလွန်ပင်လယ်ပြင်တို့မှာ ရံဖန်ရံခါ မိုးသက်လေပြင်းကျရောက်ပြီး လှိုင်းကြီးမှာ ဖြစ်သလို တိုင်းဒေသကြီးနဲ့ပြည်နယ်တွေမှာ မိုးသည်းထန်စွာ ရွာသွန်းခြင်းနဲ့အတူ လေပြင်းတိုက်ခတ်ခြင်း၊ မိုးထစ်ချုန်းခြင်း၊ မိုးကြိုးပစ်ခြင်း၊ လျှပ်စီးလက်ခြင်း၊ မိုးသီးကြွခြေင်း၊ လျှပ်တစ်ပြက်ရေကြီးခြင်းနဲ့ မြေပြိုခြင်း ဖြစ်ပေါ်နိုင်တာကြောင့် မြေပြိုမှုအန္တရာယ်၊ ရေကြီး၊ ရေလျှံမှုတွေကို ကြိုတင်သတိပြု ရှောင်ရှားကြဖို့ကိုလည်း သတိပေးထားပါတယ်။
