ကုန်စျေးနှုန်းမြင့်တက်မှု တွေကြောင့် အနိမ့်ဆုံးလုပ်ခတစ်နေ့ ၄၈၀၀ ကျပ်ဟာ လုံလောက်မှုမရှိဘူးလို့ပြောဆိုနေစဥ်မှာပဲ အနိမ့်ဆုံးလုပ်ခ တစ်နေ့ ၄၈၀၀ ကျပ်ပြည့်မီအောင်မပေးတဲ့ စက်ရုံ အလုပ်ရုံ အချို့ရှိနေသေးတယ်လို့ သိရပါတယ်။
လက်ရှိအချိန်မှာ ကုန်စျေးနှုန်းတွေ အဆမတန်မြင့်တက်လာကာ အလုပ်သမားတစ်ဦးရဲ့တစ်နေ့ကုန်ကျစရိတ်ဟာ ကျပ်တစ်သောင်းရှိမှသာ လုံးလောက်မှုရှိနိုင်တာကြောင့် လက်ရှိတစ်နေ့လုပ်ခ ၄၈၀၀ ကျပ်ကို တစ်နေ့လုပ်ခကျပ် ၁၀၀၀၀ သို့ တိုးမြှင့်ပြောင်းလဲသတ်မှတ်ဖို့ တောင်းဆိုမှုတွေရှိခဲ့သလို ဝေဖန်ထောက်ပြပြောဆိုမှုတွေလည်း မြင့်တက်နေပါတယ်။
"ဟုတ်တယ်ဗျ အနိမ့်ဆုံးလုပ်ခလစာတိုးပေးဖို့တောင်းဆိုနေကြတာတွေရှ်ိခဲ့တာတောင်မှ ဒီလက်ရှိ၄၈၀၀ကိုတောင်အပြည့်မပေးတာတွေရှိနေပါသေးတယ်။ တစ်ချို့စက်ရုံတွေက အလုပ်သမားကို၄၈၀၀တောင်မပေးချင်လို့ နေ့စားအဖြစ်ပဲခန့်တာတွေ အသက်မပြည့်သေးတဲ့ကလေးတွေခေါ်ခိုင်းပြီး ၃၆၀၀ ပဲ ပေးတာတွေရှိနေပါသေးတယ်။ တိုးပြီးမပေးရင်တောင် အပြည့်ရသင့်ပါတယ်။ ခုချိန်က ဒေးကြေး ၅၆၀၀ တောင်ပေးနေတာတွေရှိနေပါပြီ။ ၃၆၀၀ ပေးနေတာတွေကမဖြစ်သင့်ဘူး။ အလုပ်သမားကို ဖိနှိပ်တာတွေဖမ်းဆီးတာတွေလုပ်လာလို့သာ မတိုင်ကြတော့တာပါ" လို့အလုပ်သမားအရေးကူညီဆောင်ရွက်သူတစ်ဦးက ဆိုပါတယ်။
ဒါ့အပြင်ရွှေပြည်သာ အလည ရုံး မှာလည်း အနိမ့်ဆုံးအခကြေးငွေ ပြည့်မှီအောင်မရတဲ့ အလုပ်သမား ဝန်ထမ်းတွေရဲ့ တိုင်ကြားချက် ၂ စောင် ရှိတယ်လို့ STUM ထံမှ သိရပါတယ်။
တိုင်ကြားစာတစ်စောင်ဟာ တော်ဝင်သစ်စက်က အလုပ်သမားဟာ၊ အခြေ ခံလစာ ၁၃၀,၀၀၀ ကျပ်သာရရှိထားတာဖြစ်ပြီး ဒုတိယတိုင်ကြားစာ
တစ်စောင်ကတော့ Hong Miao အထည်ချုပ်မှာ
အခြေခံ လစာ ၁၃၀,၀၀၀ ကျပ်ပဲရရှိထားတာလို့ သိရပါတယ်။
"ဘယ်လောက်ဘဲ လုပ်ငန်းရှင်က ၄,၈၀၀ နဲ့ ရှင်းပေးတယ်ပြော နေပါစေ၊ လုပ်ခလစာ စာရွက်မှာ အခြေခံ လစာ နေရာမှာ ၁၃၀,၀၀၀ ကျပ်လို့ ရေးထားတာက အနည်းဆုံးလုပ်ခလစာပြည့်မှီအောင် မပေးထားဘူးဆိုတာ ထင်ရှားနေတာပါဘဲလို့ STUM ကဆိုထားပါတယ်။
အလုပ်ရှင်အများစုက လုပ်ခလစာတိုးပေးဖို့ ငြင်းဆန်မှုတွေရှိခဲ့သလို အချို့သောစက်ရုံလုပ်ငန်းရှင်တွေက တစ်နေ့လုပ်ခ ၄၈၀၀ကျပ်ပင်မပေးဘဲ နေ့စားအဖြစ်ခန့်အပ်ကာတစ်နေ့လုပ်ခ ၃၆၀၀ကျပ် နဲ့သာ ခိုင်းစေမှုတွေရှိနေသေးတယ်လို့ အလုပ်သမားတွေထံက သိရပါတယ်။
#MyanmarLabourNews
