အဓမ္မခိုင်းစေ ခံရပါက စစ်ကောင်စီရဲ့ အမျိုးသားအဆင့် အဓမ္မခိုင်းစေမှု ဆိုင်ရာ တိုင်ကြားရေးယန္တရားကို တိုင်ကြားနိုင်တယ် လို့ စစ်ကောင်စီလက်အောက်ခံ အလုပ်သမားဝန်ကြီးဌာနက ဩဂုတ် လ ၂၁ရက်မှာ အသိပေးကြေညာထားပါတယ်။
မည်သူမဆို အဓမ္မခိုင်းစေမှု ဆိုင်ရာ တိုင်ကြားမှု ကို နိုင်ငံတော် စီမံအုပ်ချုပ်ရေးကောင်စီရုံး၊ တိုင်းဒေသကြီး/ပြည်နယ်အစိုးရအဖွဲ့ ၊ နေပြည်တော်ကောင်စီ၊ မြန်မာနိုင်ငံ အမျိုးသားလူ့အခွင့်ရေးကော်မရှင်၊ ILO ဆက်သွယ်ရေးရုံး(ရန်ကုန်)နဲ့ အခြားအဖွဲ့အစည်းများက တစ်ဆင့်လည်းကောင်း အလုပ်သမားဝန်ကြီးဌာန ရုံးအမှတ် ၅၁ နေပြည်တော်ကို လူကိုယ်တိုင် သို့မဟုတ် စာဖြင့်လည်းကောင်း ဖုန်းနံပတ် ၀၆၇-၃၄၃၀၁၈၄၊၀၆၇-၃၄၃၀၂၂၉ နဲ့ E-mail လိပ်စာ directorgeneral.dol@gmail.com ,research .org.dol.mm@gmail.com သို့လည်းကောင်း တိုင်ကြားသူနဲ့ အဓမ္မခိုင်းစေခံရသူတို့ လုံခြုံစိတ်ချစွာဆက်သွယ်တိုင်ကြားနိုင်တယ်လို့ အသိပေးထားပါတယ်။
စစ်ကောင်စီ လက်အောက်ခံဝန်ကြီးဌာနက အခုလိုကြေညာပေမဲ့ လက်တွေ့မှာတော့ စက်မှုလုပ်ငန်းတွေဖြစ်တဲ့ စက်ရုံအလုပ်ရုံတွေမှာ အလုပ်သမားတွေ ညလုံးပေါက် အချိန်ပိုတွေ မဖြစ်မနေဆင်းပေးနေရတာတွေ၊ ဖိအားပေးခြိမ်းခြောက်ခိုင်းစေခံနေရတာတွေ၊ တိုင်းနဲ့ပြည်နယ်အသီးသီးမှာ အရွယ်ရောက် အမျိုသားတွေကို အဓမ္မစစ်မှုထမ်းခိုင်းတာတွေ ဖြစ်ပေါ်နေတာပါ။
"ခုကာလ မဟုတ်ဘူး ၊ ဟိုးတုန်းကတောင် ဒီအစီအစဥ်က အသက်မဝင်ခဲ့ဘူး ခုတော့ ပိုတောင် မှဘဲ ခက်မယ် အောင်မြင်တယ်ဆိုတာကအသုံးပြုမှ အောင်မြင်တယ်လို့ပြောရမှာ ခုက ဒီယန္တရားကိုဘယ်သူမှအသုံးမပြုဘူး
မတရား ဖိအားပေးစေခိုင်းတယ်ဆိုတာ OT ညလုံးပေါက်ခေါ်တာတွေအကျုံးဝင်တယ် ဝန်ကြီးဌာနကိုယ်တိုင် ဒါကိုမကြီးကြပ်ထားဘူး လွှတ်ပေးထားတာ အဲ့တော့ ချိုးဖောက်တဲ့အထဲ ဦးစီးတွေလဲပါတယ် အရေးမယူဘဲနဲ့တော့ ဘာ်သူ့မှတိုင်ခိုင်းမနေနဲ့တော့ ILO က ဘာမှ လုပ်တာမဟုတ်ဘူး ကလေးအထာ နဲ့ပြောရရင်တော့ သူတို့အလုပ်လုပ်နေပါတယ်ပေါ့ကွာ တကယ်တော့ ဘယ်အလုပ်သမားကမှစိတ်မဝင်စားတာပါ ဘာမှလဲအားကိုးရတာမဟုတ်ဘူး"လို့ အလုပ်သမားအရေးဆောင်ရွက်သူက မှတ်ချက်ပြုပါတယ်။
အာဏာသိမ်းကာလ ၃ နှစ်ကျော်ကြာလာချိန်မှာ အလုပ်သမားတွေအနေနဲ့ သက်ဆိုင်ရာအလုပ်သမားရုံးတွေကို သွားရောက်တိုင်ကြားပေမဲ့ ဦးစီးဌာနတွေက ငြင်းပယ်တာ၊ အလုပ်သမားကို ပြန်လည်ခြိမ်းခြောက်တာနဲ့ တိုင်ကြားတဲ့အလုပ်သမားကို အလုပ်ထုတ်တာတွေကျူးလွန်နေတယ်လို့ လည်း အလုပ်သမားတွေ က ပြောဆိုထားပါတယ်။
