NEWS

အတင်းအကျပ် အချိန်ပိုခေါ်ယူမှုများ ဖြစ်ပေါ်နေပြီး၊ လုပ်သားတဦး နာရီ ၁၂၀ အထိ အချိန်ပို လုပ်ကိုင်နေရ

CoverLogo
122 Views

အထည်ချုပ် စက်ရုံတာဝန်ရှိသူတွေရဲ့ အတင်းအကျပ် အချိန်ပိုခေါ်ယူနေတာတွေကြောင့် လုပ်သားတဦး တလ နာရီ ၁၂၀ ဝန်းကျင် အချိန်ပိုလုပ်ကိုင်နေရတယ်လို့ Myanmar Labour News က စုံစမ်း သိရှိရပါတယ်။ လက်ရှိ အထည်ချုပ် စက်ရုံတွေမှာ နေ့စဉ် အချိန်ပိုတွေအပြင် ရက်သတ္တပတ်အလုပ်ပိတ်ရက်တွေမှာပါ လုပ်ကိုင်ခိုင်း တာတွေ ရှိနေတယ်လို့လည်း အလုပ်သမားတွေက ပြောပါတယ်။

“စက်ရုံမှာ နေ့တိုင်း  အချိန်ပို သုံးနာရီ၊ စနေနေ့တိုင်း အောလင်း၊ ပိတ်ရက်(တနင်္ဂနွေ)  ၂ ရက်ဆင်းရတယ်။ လစာထွက်တော့ အချိန်ပို နာရီ ၁၀၀ ကျော် ၁၂၀ အထိရှိနေတယ်၊ တချို့ ဌာနတွေဆို အဲ့ထက်များတာပေါ့” လို့ ပြောပါတယ်။

၂၀၂၂ ခုနှစ် အလုပ်သမားဝန်ကြီးဌာနရဲ့  ညွှန်ကြားချက်မှာ အချိန်ပိုကို ရက်သတ္တပတ် နာရီ ၂၀ အထိသာ လုပ်ကိုင်ခိုင်းဖို့ ဖော်ပြထားပြီး အလုပ်သမားတွေရဲ့ သဘောတူညီမှုမှတ်တမ်း၊  အလုပ်ရှင်၊ မန်နေဂျာတွေက ခွင့်ပြုထားတဲ့ အချိန်ပိုထက် ပိုမိုလုပ်ကိုင်ခဲ့ပါက ဥပဒေအရ အရေးယူခံရမှာကို သိရှိကြောင်း ဝန်ခံကတိပြု လက်မှတ်တွေ ပူးတွဲတင်ပြရမယ်လို့ ဖော်ပြထားပါတယ်။ 

စက်ရုံတွေက အလုပ်သမားတွေ ရဲ့ သဘောတူညီမှု မှတ်တမ်းရယူမှာ အချိန်ပို နှစ်ပတ်အတွက်ကြိုတင် ရယူတာတွေရှိသလို၊ အလုပ်ဆင်းချိန် ရောက်မှ အချိန်ပို ဆင်းခိုင်းတာတွေလည်းရှိတယ်လို့ အလုပ်သမားတွေက ပြောပါတယ်။ 

“အချိန်ပိုလက်မှတ်တွေ အခုနောက်ပိုင်းတော့ ကောက်လာတယ်။ ဒါပေမဲ့ ခြိမ်းခြောက်တာ၊ ကြမ်းကြမ်း တမ်းတမ်း ပြောဆိုတာတွေ ရှိနေတုန်းပဲ။ အတင်းအကျပ် ဆန်တာပေါ့။ အခွင့်အရေး၊ အလုပ်ကိုင်ပိုင်းကို ခြိမ်းခြောက်တာ။ အလုပ်သမားတွေက လူသားတွေမို့ ခန္ဓာကိုယ် ပင်းပန်းတာတွေ ရှိတယ်၊ မိသားစုဘဝတွေ ရှိတယ်တာပေါ့၊ နားချင်တိုင်း အနားမရလို့ ကျန်းမာရေး ထိခိုက်တာတွေ စက်ရုံထဲမှာ ဖြစ်နေတာ” လို့ အမျိုးသမီးအလုပ်သမားတဦးက ပြောပါတယ်။

အချိန်ပိုအချိန် အများအပြားကို စက်ရုံတာဝန်ရှိသူတွေက ခိုင်းစေတာကြောင့် အလုပ်သမားတွေ ကျန်းမာရေးနဲ့ ပင်ပန်းမှု ဒဏ်ခံစားနေရတယ်လို့ အလုပ်သမားတွေက ပြောပါတယ်။ ဒီလို ခံစားမှုတွေကြောင့် အလုပ်ထုတ် ခံရပြီး နစ်နာမှုတွေပါ ကြုံတွေ့နေရတယ်လို့ အလုပ်သမားတွေက ပြောပါတယ်။ 

“အချိန်ပိုတွေ ခေါ်တယ်၊  အလုပ်ထုတ်ခံရတာတွေလည်း ရှိလာတယ်။ အထည်ချုပ် စက်ရုံထဲမှာ ကြယ်သီးရိုက်၊  အထည်စစ်တို့၊ ထုတ်ပိုးဌာနတွေလို Finishing ဌာနတွေမှာ အချိန်ပိုအများဆုံးလုပ်ရတယ်။ အချိန်ပို ခိုင်းတာ များတော့ ငိုက်တာတို့၊ ကျန်းမာရေမကောင်းတာလို့ မဆင်းနိုင် ဖြစ်နေတယ်။ ဒါဆို စက်ရုံတွေက ရုံးခန်းခေါ် ချက်ချင်းအ လုပ်ထုတ်လိုက်တာ၊ မျက်မြင်ပါပဲ” လို့ အလုပ်သမားတဦးက ပြောပါတယ်။ 

စက်ရုံတာဝန်ရှိသူတွေက အချိန်ပိုလုပ်ကိုင်ခိုင်းရာမှာ အလုပ်အကိုင်တည်မြဲရေး ခြိမ်းခြောက်မှုတွေ အများဆုံး ဖြစ်ပွားနေပြီး ရပိုင်ခွင့် ငွေကြေး ဖြတ်တောက်တာတွေရှိတဲ့ အပြင် ညနက်စက်ရုံမှာပဲ အိပ်ခိုင်းတာ၊ အစားအသောက်မပေးတာနဲ့ ကြိုပို့ယာဉ် စီစဉ်မပေး စတဲ့ ဥပဒေဖောက်ဖျက်မှုတွေပါ ကြုံတွေ့ နေရတာလို့ အလုပ်သမား အဖွဲ့အစည်းဝင်တွေက ပြောဆိုထားပါတယ်။

ဓါတ်ပုံ- ပုံဟောင်း


Related posts

Cover
ဒေးကြေးနဲ့အချိန်ပိုကြေးတွေတိုးပေးဖို့ အလုပ်သမားတွေ ဆန္ဒဖော်ထုတ်
Jul 12, 2024
Cover
Heng Li Garment စက်ရုံအလုပ်သမားတွေ နားရက်မရှိလုပ်ကိုင်နေရပြီး အခွင့်အရေးချိုးဖောက်ခံရမှုများရှိနေ
Jul 11, 2024
Cover
JOC Myanmar Knitwear အထည်ချုပ်စက်ရုံအလုပ်သမားတွေ ဒေးကြေးတိုးပေးဖို့တောင်းဆို၊ အလုပ်သမား ၂ ဦးအလုပ်ထုတ်ခံရ
Jul 11, 2024
Cover
လူမှုဖူလုံရေးအကျုံးဝင်အလုပ်သမားများ မိမိတို့ရဲ့ဖူလုံရေးအထောက်အပံ့ရပိုင်ခွင့်တွေအပေါ် ပိုမိုသိရှိရန်လိုအပ်နေသေး
Jul 11, 2024
Cover
အခြေခံအလုပ်သမားတွေ ဆိုင်ဖျော်လဘက်ရည်တခွက် သောက်နိုင်ဖို့ အလှမ်းဝေးလာ
Jul 10, 2024
Cover
pepsi အချိုရည် ကုမ္ပဏီကိုထပ်တိုးတရားစွဲဆိုမှု ၁၈ ရက်နေ့သို့ပြန်လည်ချိန်းဆို
Jul 10, 2024
Cover
Wonderful Apparel အထည်ချုပ် အလုပ်သမားတွေ အခွင့်အရေးချိုးဖောက်ခံနေရ
Jul 09, 2024
Cover
၃ ရက်အတွင်း ဝမ်းပျက်ဝမ်းလျှောရောဂါ ဖြစ်ပွားသူ (၁၆၀) ကျော်ထိမြင့်တက်လာလို့ စက်ရုံအလုပ်သမားတွေ စိုးရိမ်နေရ
Jul 09, 2024