၂၀၂၄ ခုနှစ်မှာ အိမ်နီးချင်းနိုင်ငံကို ဦးတည်ပြီး အငှားကိုယ်ဝန်ဆောင် လူကုန်ကူးမှုတွေ ဖြစ်ပွားနေတယ်လို့ စစ်ကောင်စီရဲ့ ပြည်ထဲရေးဝန်ကြီးက ပြောပါတယ်။ စက်တင်ဘာ ၁၃ ရက်မှာ စစ်ကောင်စီရဲ့ မီဒီယာမှာ ၁၂ ကြိမ်မြောက် မြန်မာနိုင်ငံလူကုန်မှု တိုက်ဖျက်ရေးနေ့ အတွက် ပေးပို့တဲ့ ပြည်ထဲရေးဝန်ကြီးရဲ့ သဝဏ်လွှာမှာ အခုလို ဖော်ပြထားတာဖြစ်ပါတယ်။ 

ဒါ့အပြင် မြန်မာနိုင်ငံ၏ လူကူးမှုပြဿနာတွေက အိမ်နီးချင်းနိုင်ငံတွေနဲ့ အရှေ့အလယ်ပိုင်း ဒေသက တချို့ နိုင်ငံတွေက ဈေးကွက်လိုအပ်ချက်အရ ဖြစ်ပွားနေတယ်လို့ လည်း ပြောဆိုပါတယ်။ ပြည်ပလူကုန်ကူးမှုတွေကို ကျူးလွန်သူတွေဟာ ရန်ကုန်၊ဧရာဝတီ၊ ပဲခူး ၊ နေပြည်တော် နဲ့ နိုင်ငံအတွင်း တခြားဒေသတွေက အမျိုးသမီးငယ် ကို လိမ်လည် စုဆောင်းနေတယ်လို့ ဆိုပါတယ်။ 

နှစ်စဉ် ဖြစ်ပွားနေတဲ့ ကိန်းဂဏန်းတွေအရ ပြည်တွင်းမှာ လူကုန်ကူးမှု  ၅၆ ရာခိုင်နှုန်း၊ ပြည်ပ လူကုန်ကူးမှု ၄၄ ရာခိုင်နှုန်း ဖြစ်ပွားတယ်လို့ ဖော်ပြထားပါတယ်။ 

ဖြစ်ပွားတဲ့ကိန်းဂဏန်းတွေကိုတော့ ဖော်ပြထားတာမရှိသလို ပြည်တွင်း လူကုန်မှုတွေက အဓမ္မလက်ထပ် ထိမ်းမြားတာ၊ ပြည့်တန်ဆာပြုမှု၊ အဓမ္မ ခိုင်းစေမှု၊ ကြွေးမြီနဲ့ နှောင်ဖွဲ့ ခိုင်းစေမှု၊ အဓမ္မမွေးစားမှု၊ ကလေး ရောင်းစားမှုနဲ့ တောင်းရမ်းခိုင်းစေမှုတွေ ဖြစ်ပွားနေတယ်လို့ သိရပါတယ်။

ပြည်တွင်း  လူကုန်ကူးသူတွေက ရခိုင်၊ ရန်ကုန်၊ဧရာဝတီ၊ ပဲခူး၊ နေပြည်တော်က အမျိုးသမီးငယ်တွေကို လိမ်လည် သွေးဆောင်ပြီး ရှမ်းမြောက်၊ ရှမ်းအရှေ့ ဒေသတွေကို ပို့ဆောင်ပြီး အဓမ္မ ပြည့်တန်ဆာအဖြစ် ခိုင်းစေတာ၊ အဓမ္မခိုင်းစေတာတွေ ကျူးလွန်တယ်လို့ ဆိုပါတယ်။ စစ်ကောင်စီရဲ့ ဖော်ပြချက်တွေအရ မူဆယ်၊ လောက်ကိုင်၊ မိုင်းပေါက် နဲ့ တာချီလိတ်ဒေသတွေမှ လူကုန်ကူးမှုတွေ ဖြစ်ပွားနေတယ်လို့  ပြောဆိုပါတယ်။

Facebook၊ Wechat၊ Telegram  ၊ Tik Tok  စတဲ့ လူမှုကွန်ရက်တွေကို အသုံးပြုပြီး လူကုန်ကူးမှုကို ကျူးလွန်နေတယ်လို့လည်း ဖော်ပြထားပါတယ်။ အွန်လိုင်းလိမ်ညာမှုနဲ့ အွန်လိုင်းလောင်းကစားလုပ်ငန်းတွေ မြန်မာနိုင်နဲ့ ဒေသတွင်းနိုင်ငံတွေမှာ လုပ်ကိုင်နေတာကိုတွေ့ရပြီး လုပ်အားခေါင်းပုံဖြတ် လူကုန်ကူးမှု တွေလည်းဖြစ်ပွားနေတယ်လို့  စစ်ကောင်စီ ပြည်ထဲရေးဝန်ကြီးက ပြောဆိုပါတယ်။ 

၂၀၂၃ ခုနှစ်အတွင်း လူကုန်ကူးမှုတားဆီးကာကွယ်ရေး ဥပဒေ၊ လူကုန်ကူးမှုတားဆီးနှိမ်နင်းရေး ဥပဒေတွေနဲ့ ပြစ်ဒဏ်ချမှတ်မှု ၆၄ မှုရှိခဲ့ပြီး အဲဒီထဲက တရားခံ ၁၁၁ ဦးကို အမြင်ဆုံး ထောင်ဒဏ် တသက်နဲ့ အနိမ့်ဆုံး ထောင် ၁၅ နှစ် ချမှတ်ခဲ့တယ်လို့ ဖော်ပြထားပါတယ်။

ပြည်ပ အလုပ်အကိုင်ဆိုင်ရာ ဥပဒေနဲ့ အရေးယူမှု ၁၉၉ မှု ရှိခဲ့ပြီး အမျိုးသား ၁၇၄ ဦးနဲ့ အမျိုးသမီး ၂၀၉ ဦး စုစုပေါင်း ၃၈၃ ဦးကို အရေးယူထားတယ်လို့ စစ်ကောင်စီဝန်ကြီးရဲ့ သဝဏ်လွှာမှာ ဖော်ပြထားပါတယ်။