ရှမ်းပြည်နယ်တောင်ပိုင်း ညောင်ရွှေမြို့ ၊ အင်းလေးဒေသမှာ စက်တင်ဘာ ၁၁ ရက်ကစကာ ရေကြီးမှုဖြစ်ပေါ်တာကြောင့် လူ၂၀ခန့်နီးပါးသေဆုံးခဲ့ရသလို ဒေသရဲ့အဓိကစီးပွားရေး ထွက်ကုန်ဖြစ်တဲ့ခရမ်းချဥ်သီးများလည်း ပိဿာချိန်များစွာ ဆုံးရှုံးခဲ့ရတယ်လို့ အင်းလေးဒေသတွင်း သတင်းတွေအရသိရပါတယ်။
အင်လေးဒေသအတွင်း ရေကြီးနစ်မြုပ်မှုကြုံရတဲ့စက်တင်ဘာ၁၆ရက်အထိ ၆ရက်ကြာအချိန်အတွင်း သေဆုံးသူရုပ်အလောင်း၁၉လောင်းကို ဆယ်ယူတွေ့ရှိထားသလို ရေဘေးကြောင့် အိမ်ထောင်စုပေါင်း၂သောင်းကျော်ရေဘေးဒုက္ခဒဏ်ကို ခံစားနေရတယ်လို့လည်းဆိုပါတယ်။
" ညောင်ရွှေကခုထိတော့ရေမကျသေးဘူး။သေသွားတာတွေက အင်းတိမ်ရွာဘက်က လို့ကြားတယ်။ အင်းလေးထဲကအိမ်တွေဆိုလည်း တစ်ထပ်အိမ်တွေကမြုပ်သွားပြီ ။ အခု လူမှုကွန်ယက်မှာတက်နေတဲ့ခရမ်းချဥ်သီးတွေရေမျောနေတာကတော့ ညောင်ရွှေဘက်က ခရမ်းချည်သီးပွဲရုံတွေရှိတဲ့နန်းပန်းဘက်ကပြောတယ်။ရေတက်လာတော့ ပစ္စည်းတွေလည်းမရွှေ့နိုင်တော့ပဲဆုံးရှုံးကုန်တာ လို့ ရှမ်းပြည်နယ်တောင်ပိုင်း ညောင်ရွှေမြို့က ဒေသခံတစ်ဦးကပြောပါတယ်။
အဆိုပါ ညောင်ရွှေမြို့နယ် အင်းလေးဒေသတွင် ကျေးရွာအုပ်စုပေါင်း ၃၅ စုမှ ကျေးရွာပေါင်း ၄၄၅ ရွာ၊ အိမ်ခြေပေါင်း ၃၈,၄၃၈ လုံး၊ အိမ်ထောင်စုပေါင်း ၄၂,၈၃၀ စု၊ လူဦးရေပေါင်း ၁၆၇,၂၅၇ ရှိတဲ့အနက် လက်ရှိတွင် ကျေးရွာပေါင်း ၁၇၇ ခန့်၊ အိမ်ခြေပေါင်း ၁၇,၈၀၀ မှ အိမ်ထောင်စုပေါင်း ၂၀,၇၂၇ စုလောက်မှာ ရေဘေးဒဏ်ခံနေရတာလို့ သိရပါတယ်။
ရေဘေးသင့်ပြည်သူတွေ အနေနဲ့ လက်ရှိမှာ ဘုန်ကြီးကျောင်းနဲ့ အထပ်မြင့်အဆောက်အဦးရှိနေအိမ်များတွင် နေထိုင်နေကြရကာ စားနပ်ရိက္ခာအပါအဝင် ဆေးဝါးနဲ့အသုံးအဆောင်ပစ္စည်းတွေ လိုအပ်နေတယ်လို့ဆိုပါတယ်။
အင်းလေးကန်ကို စီးဝင်တဲ့ ချောင်းပေါင်း ၂၉ ခုလောက်ရှိတဲ့အနက် နွေ၊ မိုး၊ ဆောင်း သုံးရာသီလုံး ပုံမှန်စီးဝင်သော ချောင်းသုံးခုရှိသလို လတ်တ လောအချိန်တွင် ပုံမှန်စီးဝင်တဲ့ချောင်း၃ခုအပြင် ချောင်းပေါင်း ၂၉ ခုစလုံးမှရေတွေ အကုန်စီးဝင်နေတဲ့ အခြေအနေမျိုးကြုံရပြီး အဆိုးရွားဆုံးရေကြီးရေလျှံမှုဖြစ်ခဲ့တဲ့ကလော၊ အောင်ပန်း၊ ဟဲဟိုး၊ ရပ်စောက်၊ တောင်ကြီး၊ နောင်တရား၊ တီကျစ်၊ ပင်လောင်း စတဲ့ရေဝေရေလဲဒေသများမှ အင်းလေးကန်ကိုရောက်ရှိတာကြောင့် ရေကြီးနေရတာဖြစ်ကြောင်းသိရပါတယ်။
"အင်းလေးကန်ရဲ့ရေထွက်ပေါက်ကမိုးဗြဲဆည် ပဲရှိတာ အခုက အရင်ရက်တွေကရှမ်းပြည်တောင်ပိုင်းကနေ စီးလာတဲ့ရေကြီးမှုဖြစ်ရတဲ့ရေတွေက ကန်ထဲကိုရောက်လာတော့ ရေကြီးနေတာ ညောင်ရွှေဆိုလည်း အင်လေးကန်ရေလျှံတော့ရေတက်လာတယ်။ ဝင်းရပ်၊ ကံသာရပ်၊ မြို့လည်ရပ်၊ နန်းပန်ရပ် စတဲ့ရပ်ကွက်တွေ ခုထိရေမကျသေးဘူး။" လို့နန်းပန်ရပ် က ဒေသခံတစ်ဦးကပြောပါတယ်။
ညောင်ရွှေမြို့ရဲ့၃ပုံတွင်၂ပုံခန့်က ယနေ့စက်တင်ဘာလ ၁၆ရက်အထိ ရေနစ်မြုပ် မှုရှိနေဆဲဖြစ်ကာ အင်းလေးကန် ဒေသဟာ အနိမ့်ပိုင်းဖြစ်သလို ပုံမှန်အချိန်မှာလည်း ရေများရှိနေတက်လို့ လက်ရှိကန်အတွင်းစီးဝင်လာတဲ့ရေများ ပြန်လည်ကျဆင်းရန် လအတော်ကြာအချိန်ယူရနိုင်ကြောင်း ဒေသခံတွေ က သုံသပ်ပြောဆိုနေကြပါတယ်။
