ရွှေပြည်သာမြို့နယ် သာဓုကန်စက်မှူဇုန်ရှိ Hosheng (Myanmar) Garment Company Limited မှာ အလုပ်သမား သမဂ္ဂခေါင်းဆောင် ၇ ဦးကို အကြောင်းမဲ့ အလုပ်ထုတ်လိုက်လို့ စက်ရုံအလုပ်သမား ၆၀၀ ကျော် ဆန္ဒပြတောင်းဆိုနေကြတယ်လို့ သိရပါတယ်။
အလုပ်ထုတ်ခံရတဲ့ အလုပ်သမား ခေါင်းဆောင် ၇ဦးဟာ လုပ်သက်လေးနှစ်၊ နှစ်နှစ်၊ သုံးနှစ်နဲ့ တစ်နှစ်ကျော်ဖြစ်ပြီး အကြောင်းပြချက်မပေးဘဲ အလုပ်ထုတ်လိုက်တာကြောင့် စက်ရုံကအလုပ်သမားတွေကလည်း လုပ်ငန်းခွင်ပြန်လည်ဝင်ရောက်ရေးအတွက်ဆန္ဒပြနေကြတာလို့ သိရပါတယ်။
" ပြတာက အလုပ်သမား ၇ယောက်ကိုအကြောင်းမဲ့အလုပ်ထုတ်လို့ပြတာပါ။ ဆန္ဒပြတာက ၆၀၀ ကျော်။ အထဲမှာတစ်ရာလောက်ကျန်ခဲ့တယ်ပြောတယ်။ ကျွန်တော်တို့ကိုစနေကထုတ်လိုက်တာ။ ဆန္ဒပြတာ နှစ်ရက်ရှိပြီ " လို့ဆိုပါတယ်။
အလုပ်ထုတ်ခံရတဲ့ အလုပ်သမားတွေဟာ စက်ရုံတွင်းဝမ်တိမ်ထိုးထားတာမရှိသလို အမှားတစ်စုံတစ်ရာပြုလုပ်ထားခြင်းလည်းမရှိတာကြောင့် အကြောင်းမဲ့အလုပ်ထုတ်ခံလိုက်ရတာဖြစ်လို့ ဖြေရှင်းချက်တစ်စုံတစ်ရာသိရှိလိုသလို အလုပ်ထုတ်နစ်နာကြေးနဲ့ လျှော်ကြေးကိုရရှိလိုတာမဟုတ်ဘဲ လုပ်ငန်းခွင်မှာသာ အလုပ်လုပ်ကိုင်လိုတာဖြစ်တယ်လို့ သိရပါတယ်။
" ကျွန်တော်ဘာအမှားမှလည်းမလုပ်ထားဘူး။ စက်ရုံထဲမှာ ဘာဝမ်တိမ်မှလည်းမထိုးထားဘူး။ စက်ရုံဖွင့်ထားတာဆို လေးနှစ်ကျော်သွားပြီ။ ကျွန်တော်ဘာအမှားမှမလုပ်ထားဘဲ အကြောင်းမဲ့ အလုပ်ထုတ်ထားတော့ ကျွန်တော်သိချင်တာဘာကြောင့်လဲ ဘာအမှားကြောင့်လဲ အဲ့ဒါကိုဖြေရှင်းချက်တောင်းတာ ခုထိလည်းဖြေရှင်းချက်မရသေးဘူး။ ဘာကြောင့်မှန်းလည်းမသိဘူး။ကျွန်တော်တစ်ယောက်တည်းမဟုတ်ဘူး ၇ယောက်။ ရုံးခန်းထဲခေါ်ထားတာက ကျန်တဲ့လူတွေကတော့ ဖယ်ရီတွေနဲ့ပြန်တော့ပါသွားတော့ ဆွဲခေါ်ဖို့မမီလိုက်ကြဘူး။ ကျွန်တော်တို့လေးယောက်ကိုတော့အမိအရဆွဲခေါ်ထားလိုက်တာ" လို့ ဆိုပါတယ်။
Hosheng စက်ရုံရဲ့ ထုတ်ပြန်စာမှာတော့ အဆိုပါ အလုပ်သမား ၇ ယောက်ကို စက်ရုံတွင်းတည်ငြိမ်နေသောအနေအထား ကို ဆူပူမှုဖြစ်ပေါ်စေရန် ရည်ရွယ် ၍ သွေးထိုးလှုံ့ဆော်ခြင်း၊ စက်ရုံမှူးအား ခြိမ်းခြောက်ပြောဆိုခြင်း ကုန်ထုတ်လုပ်မှုကျဆင်းစေရန် တမင်လုပ်ဆောင်ခြင်းတို့ကြောင့် အလုပ်မှထုတ်ပယ်ကြောင်း ဖော်ပြထားပါတယ်။
အလုပ်ထုတ်ခံရတဲ့အလုပ်သမား ၇ ဦးဟာ ဇွန်လ ၁၀ ရက်နေ့က အလုပ်ထုတ်လိုက်တာဖြစ်ပြီး စက်ရုံတွင်းအလုပ်သမား၇၀၀ ကျော်ရှိတဲ့အနက် ၆၀၀ ကျော်က အဆိုပါလုပ်သား ၇ဦးပြန်လည်ခန့်အပ်မှုမရှိမချင်း ဇွန်လ၁၂ရက်နေ့က စတင်တောင်းဆိုနေတာဖြစ်လို့ စက်ရုံဘက်ကရဲနဲ့စစ်တပ်ကိုခေါ်ယူဖိအားပေးတာတွေပါ ပြုလုပ်ခဲ့တယ်လို့ သိရပါတယ်။
အဆိုပါ စက်ရုံမှာ ZARA, Inditexအမှတ်တံဆိပ်ချုပ်လုပ်တာဖြစ်တယ်လို့သိရပါတယ်။
အဆိုပါ အလုပ်ထုတ်ခံရတဲ့အလုပ်သမားခေါင်းဆောင် ၇ဦးကို မနက်ဖြန် ဇွန်လ ၁၄ ရက်မှာ ဆွေးနွေးညှိနှိုင်းဖို့ ခေါ်ထားတယ်လိုလည်း သိရပါတယ်။
#MyanmarLabourNews
