လှိုင်သာယာမြို့နယ်ထဲက အလုပ်သမားရုံး တာဝန်ရှိသူတွေက တိုင်ကြားမှုတွေကို ဖြေရှင်းမပေးတာတွေ များလာ တယ်လို့ အလုပ်သမားတွေက ပြောပါတယ်။
“ကျွန်တော်က အနောက်ပိုင်းရုံးမှာ တိုင်စာတင်ပါတယ် ။ ဒါပေမယ့် ရုံးတွေက တိုင်စာကို လက်မခံပါဘူး။ စက်ရုံကို ဖုန်းဆက် ပြောလိုက်မယ်လို့ပဲ ပြောပါတယ်” လို့ အလုပ်ဖြုတ်ခံထားရတဲ့ အလုပ်သမားတစ်ဦး က ပြောပါတယ်။
အလုပ်သမားအများစု လုပ်အားနဲ့ ရပိုင်ခွင့် ခေါင်းပုံဖြတ်ခံရတာတွေ၊ ကိုယ်ထိလက်ရောက်ကျူးလွန်ခံရတာ၊ ဥပဒေ သတ်မှတ်ချက်တွေကို ကျော်လွန်ပြီး အချိန်ပို အလွန် အကျွံ ဆင်းနေရတာ၊ လိင်ပိုင်းဆိုင်ရာ ထိပါးမှုတွေနဲ့ အလုပ်သမား ဥပဒေပါ အခွင့်အရေးတွေ ဖောက်ဖျက်ကျူးလွန်တာတွေ ဖြစ်ပွားနေတယ်လို့ အလုပ်သမာတွေက ပြောပါတယ်။
“ကျွန်မတိုတစ်တွေ အနောက်ပိုင်းရုံးမှာ သွားတိုင်ဖူးတယ်။ အလုပ်ရှင်ဘက်က ကျူးလွန်တာ သိသိကြီးတောင် ဦးစီးမှူးတွေက ကျွန်မတိုကိုပဲ ဆူတယ်၊ ပြောတယ်” ဆိုပြီး အလုပ်သမားတဦးက ပြောပါတယ်။
အခွင့်အရေးချိုးဖောက်ခံရတဲ့ ဖြစ်စဉ်တွေ နေ့စဉ်လိုလို ဖြစ်ပွားနေပြီး အကြောင်းကြောင်းကြောင့် အလုပ်သမား အများစု တိုင်ကြားမှုတွေ မလုပ်နိုင်ဘူးလိုလည်း အလုပ်သမားတွေက ပြောပါတယ်။
အဲဒီလို တိုင်ကြားမှုတွေ မလုပ်နိုင်တာက အလုပ်သမားရုံးတွေအပေါ် ယုံကြည်အားကိုးမရလို့ ဖြစ်တယ်ဆိုပြီး အလုပ်သမားတဦးက ပြောပါတယ်။
“စက်ရုံမှာ တစ်ပတ်ကို အိုတီပေါင်း ၄၀ နာရီအကျော်မှာ ဆင်းနေရတယ်။ မဆင်းရင် မကြားဝံ့မနာသာ အပြော ခံရတယ်၊ ပြီးတော့ အလုပ်ကနေ ထုတ်တယ်။ ရုံးတွေကို တိုင်ရင် ကိုယ်က ပြန်မရောက်သေးဘူး စက်ရုံကို သတင်း ပို့ပြီးနေပြီ။ စက်ရုံမှာလည်း ပိုက်ဆံထုပ်နဲ့ အလုပ်ထုတ်ဖို ပြင်ထားပြီးပြီ။ အလုပ်သမားရုံးတွေက အဲ့လောက်ကို မယုံကြည်ရတော့တာပါ။” လို့ အလုပ်ထုတ်ခံထားရတဲ့ အလုပ်သမားတဦးက ပြောပါတယ်။
အလုပ်သမားရုံးတွေက တိုင်စာတွေရောက်လာရင် ချက်ချင်း လက်မခံတာ၊ အချိန်ဆွဲတာ၊ စက်ရုံဘက်ကို အကြောင်းကြားတာတွေကို ဆောင်ရွက်နေတာလို့ အလုပ်သမားအရေး ဆောင်ရွက်ပေးနေသူတဦးက ပြောပါတယ်။
“စက်ရုံဘက်က ချိုးဖောက်တာကို တိုင်လိုက်ရင် WCC နဲ့ ရှင်းခိုင်းတယ်။ WCC ကလည်း ဘာမှလုပ်မပေးဘူး၊ ဒါနဲ့ အလုပ်သမားက လိုင်းထဲပြန်ရောက်သွားတယ်။ ဖြစ်တဲ့ ပြဿနာကို စက်ရုံဘက်က တာဝန်ခံပြီး မရှင်းပေးဘူး။ နောက် အလုပ်သမားကို နေရာ ပြောင်းပြန်တယ်၊ အဲလိုတွေ ဆက်တိုက်ဖြစ်လို့ တိုင်ပြန်တော့ တပတ်ချိန်း ပြန်တယ်။ အချိန်တွေဆွဲတာပေါ့။ အဲဒီကာလထဲမှာပဲ တိုင်တဲ့ အလုပ်သမားက ဘယ်လိုမှ လုပ်ငန်းခွင်ထဲမှာ နေမရ တော့ဘူး၊ မနေနိုင်တော့ဘူး။ “ လို ပြောပါတယ်။
စက်ရုံအတွင်း အလုပ်သမားပြဿနာတွေက အလုပ်သမားရုံးတွေရဲ့ အချိန်ဆွဲ ဖြေရှင်းတာတွေကြောင့်လည်း အလုပ်သမားတွေမှာ စိတ်ပိုင်းဆိုင်ရာ ထိခိုက်တာတွေ ဖြစ်ရတယ်လို့လည်း ဆက်ပြောပါတယ်။
လှိုင်သာမြိုနယ် အရှေ့ပိုင်း အလုပ်သမားရုံးတွေမှာလည်း အလားတူ ကိစ္စရပ်တွေရှိနေပြီး သူဌေးတွေကို ကြောက်ရကြောင်းနဲ့ အဲ့ဒီ သူဌေးဆိုသူတွေဟာ အလုပ်သမားအရာရှိတွေရဲ့ အထက်က လူတွေလိုလည်း ထုတ်ဖော်ပြောကြားတယ်လို့ အလုပ်သမားတွေက ပြောကြားထားပါတယ်။
Application - https://bit.ly/3oNDLga
Website Link - https://www.myanmarlabournews.com
Telegram Link - https://t.me/myanmarlabournews
#MyanmarLabourNews
