ပေါ်တာဆွဲတဲ့ သတင်းတွေဆက်တိုက်ဆိုသလိုထွက်ပေါ်ပြီးနောက်မှာ ရန်ကုန်မြို့ရဲ့ လူထူထပ်တဲ့ နေရာတွေမှာ လူအသွားအလာနည်းပါးလာပြီးအရောင်းအဝယ်ကျဆင်းလာတယ်လို့ ဈေးရောင်းချသူတွေကပြောပါတယ်။
လက်ရှိမှာ စစ်တပ်က စစ်ကားနဲ့လမ်းကြောင်းပတ်တာတွေဟာ လူနေအတွင်းရပ်ကွက်တွေထဲကိုပါရောက်လာပြီးပြည်သူတွေထိတ်လန့်နေတာပဲဖြစ်ပါတယ်။
"ည(၈)နာရီမထိုးပါဘူး။(၇)နာရီကျော်တာနဲ့လူစပါးလာတယ်။တကယ်ဆိုည(၈)နာရီကျော်ဆိုတာအရောင်းအဝယ်ကောင်းတုန်းဖြစ်ရမှာ။အခုကျဘယ်သူကိုရောင်းရမလဲမသိတော့ဘူး။ဖြစ်နိုင်တာက ပေါ်တာဆွဲတဲ့သတင်းတွေကော၊မီးပျက်တာကောပေါင်းပြီးလူတွေလမ်းမထွက်တော့ဘူး"လို့ရွှေပြည်သာမြို့နယ်တွင်းကစားသောက်ဆိုင်ဖွင့်လှစ်ရောင်းချသူတစ်ဦးကပြောပါတယ်။
ဒီလိုအခြေအနေကြောင့်ဈေးရောင်းချသူတွေဟာအခက်အခဲတွေဖြစ်ပေါ်နေပြီးရှေ့ဆက်ရပ်တည်ရေးအတွက်ခက်ခဲလာတယ်လို့ဆိုကြပါတယ်။
"အခုကဆိုင်ငှားခတွေကလည်းတက်တယ်။မီတာခတွေကလည်းတက်တယ်။အခွန်အခစရိတ်တွေကလည်းလိုက်လာတော့တစ်ရက်လောက်မရောင်းရရင်လည်းသိသာတယ်။ဖြစ်နေတာကလူတွေကလည်း ကြပ်တည်းတော့ဝယ်လိုအားကျတဲ့အပြင်ရုတ်ရုတ်သဲသဲသတင်းတွေနဲ့ဆိုတော့အကုန်လုံးကစိုးရိမ်နေကြပြီရှေ့ဆက်မလွယ်တော့ဘူး"လို့အရောင်းအဝယ်လုပ်ငန်းလုပ်ကိုင်သူတစ်ဦးကပြောပါတယ်။
လက်ရှိမှာပေါ်တာဆွဲတဲ့သတင်းကြောင့်တစ်နိုင်တပိုင်ဆိုင်လေးတွေမှာအလုပ်လုပ်ကိုင်သူတွေဟာလည်းသွားလာရေးအတွက်စိတ်ပူပန်နေရပြီးဆိုင်ရှင်တွေလည်းငွေကြေးလည်ပတ်ဖို့ခက်ခဲလာပါတယ်။
#MyanmarLabourNews
