ထိုင်းနိုင်ငံ စမွတ်ပရာကန် တွင် ဖြစ်ပွားခဲ့တဲ့ ထိုင်းနိုင်ငံသားအချို့နဲ့ မြန်မာနိုင်ငံသားအချို့ ကြား ဖြစ်ပွာခဲ့သည့် ပဋိပက္ခအရှိန်ကြောင့် လုံခြုံရေးစိုးရိမ်ရတဲ့ အတွက် အလုပ်ရှင်သူဌေးထံ အသနားခံကာ ခွင့်ယူခဲ့ကျတဲ့ မြန်မာလုပ်သား ၂၃ဦးကို အလုပ်ရှင်မှ အလုပ်ထုတ်ပယ်လိုက်တယ်လို့ ၎င်းကိစ္စကို ကူညီပေးနေတဲ့ MHACမဟာမိတ်အဖွဲ့ထံမှ သိရပါတယ်။
ပြီးခဲ့တဲ့ ဇန်နဝါရီလ ၂၈ရက်နေ့ မှာ စမွတ်ပရာကန် ရှိ မြန်မာလုပ်သားများ နေထိုင်ရာနေရာ အချို့ကို ထိုင်းနိုင်ငံသား အချို့ လာရောက်မယ်ဆိုတဲ့ သတင်းတွေ ထွက်ခဲ့တဲ့ အတွက် ၎င်းနေရာ ရှိ အွန်လိုင်းလုပ်ငန်း တစ်ခုမှာ အလုပ်လုပ်ကိုင်နေကြတဲ့ မြန်မာလုပ်သား ၂၃ဦးဟာ လုပ်ငန်းရှင်သူဌေးထံ၌ အလုပ်နားရန်အတွက် အကျိုးကြောင်းပြောပြပြီး အသနားခံကာ ခွင့်ယူခဲ့ကြတယ်လို့ သိရပါတယ်။
ဒါပေမယ့် နောက်တနေ့အလုပ်ပြန်ဆင်းတဲ့ အခါတွင် အလုပ်ရှင်က ၎င်း လုပ်သားတွေကို နားလည်မပေးဘဲ အလုပ်မှ ရုတ်တရက် ထုတ်ပယ်လိုက်တယ်လို့ ဆိုပါတယ်။
အခုလို မတရား အလုပ်မှ ထုတ်ပယ်လိုက်တဲ့ အတွက် မြန်မာအလုပ်သမားတွေဟာ အခက်ခဲ တွေ့ကြုံခဲ့ရ ပြီး 𝐌.𝐇.𝐀.𝐂မဟာမိတ်အဖွဲ့ထံလာရောက်အကူညီတောင်းခံလာတယ်လို့ သိရပါတယ်။
MHAC မဟာမိတ်အဖွဲ့အနေနဲ့ ဖေဖေါ်ဝါရီ ၄ရက်မှာ နစ်နာသူမြန်မာလုပ်သားများနှင့်တွေ့ဆုံပြီး အလုပ်သမားတွေ အတွက် အလုပ်သမားဥပဒေ အတိုင်း ရသင့်ရထိုက်တဲ့ နစ်နာကြေးတွေရဖို့ သက်ဆိုင်ရာ နယ်မြေခံ အလုပ်သမားကာကွယ်စောင့်ရှောက်ရေးရုံးတွင် တိုင်ကြားဆောင်ရွက်ခဲ့တယ်လို့ MHACမဟာမိတ်အဖွဲ့က ထုတ်ပြန်ထားပါတယ်။
