ထိုင်းနိုင်ငံ နခွန်ပထုံခရိုင် အုန်းယိုင်ရှိ ပိတ်စဆေးဆိုးပန်းရိုက် အလုပ်ရုံတစ်ခုတွင် လုပ်သက် နှစ်၂၀ကျော်ရှိတဲ့ လုပ်သက်ရင့် မြန်မာအလုပ်သမား ၆၀ ကျော်ကို စက်ရုံဘက်မှ ကြိုတင်အကြောင်းမကြားဘဲ အလုပ်မှ ထုတ်ပယ်လိုက်တယ်လို့ ၎င်းအမှုကိုကူညီပေးနေတဲ့ MHACမဟာမိတ်အဖွဲ့ ထံ မှသိရပါတယ်။

 

၎င်းစက်ရုံမှ အလုပ်ထုတ်ခံရတဲ့ မြန်မာလုပ်သားတွေကို ဥပဒေတိုင်းနစ်နာကြေး မပေးဘဲ ဘတ်တစ်သောင်းသာ ပေးတဲ့ အတွက် အလုပ်သမားတွေက MHAC မဟာမိတ်ထံ အကူညီတောင်းခံခဲ့တယ်လို့ သိရပါတယ်။

 

""စက်ရုံဘက်က ကြိုတင်အကြောင်းမကြားဘူး ဘာလို့အလုပ်ထုတ်တယ် ဆိုတဲ့အကြောင်းပြချက်လည်းမရှိဘဲ အလုပ်ထုတ်တယ် နစ်နာကြေးကိုလည်း ဘတ်တစ်သောင်းထက်ပိုမပေးဘူး တစ်သောင်းဘဲပေးမယ်လို့ ပြောတယ် ဒါကြောင့် လုပ်သက်နစ်နာကြေးနဲ့အလုပ်သမားတွေရဲ့ရပိုင်ခွင့်တွေရဖို့ တိုင်ကြားတာပါ""လို့ နစ်နာသူမြန်မာအလုပ်သမားတစ်ဦးကပြောပါတယ်။

 

၎င်းစက်ရုံမှ အလုပ်ထုတ်ခံရတဲ့ မြန်မာလုပ်သား ၆၀ ကျော်ရှိပေမယ့် မြန်မာ အလုပ်သမား၄၀ခန့်သာ လာရောက်ပြီး MHAC မဟာမိတ်အဖွဲ့နဲ့အတူ ထိုင်းအစိုးရရဲ့ မြို့နယ် ဆဝါဒီကန်ရုံးမှာစက်ရုံဘက်ကို အမှုဖွင့်တိုင်ကြားခဲ့တယ်လို့ သိရပါတယ်။

 

MHAC မဟာမိတ်အဖွဲ့အနေနဲ့ အလုပ်ထုတ်ခံရတဲ့ မြန်မာလုပ်သားများ ထိုက်သင့်တဲ့နစ်နာကြေးရရှိဖို့ အမှုပြီးဆုံးသည်အထိ ကူညီဆောင်ရွက်ပေးသွားမယ်လို့ ပြောပါတယ်။

 

ထိုင်းနိုင်ငံ အတွင်း အလုပ်ထုတ်ခံရပါက လုပ်သက်ရက်ပေါင်း၁၂၀ကျော်လွန်ပြီး တစ်နှစ်မပြည့်သေးတဲ့ အလုပ်သမားကို နစ်နာကြေး အဖြစ် နောက်ဆုံးလစာ အတိုင်း ရက် ၃၀ စာပေးရမှာ ဖြစ်သလို လုပ်သက် ၁နှစ်မှ၃နှစ် အတွင်းရှိသူ ကို နောက်ဆုံးလစာအတိုင်း ရက်၉၀စာ နစ်နာကြေးပေးရမယ်လို့ ဥပဒေပြဌာန်းထားပါတယ်။

 

လုပ်သက်၃နှစ်မှ၆နှစ်ရှိသူ ကို နောက်ဆုံးလစာ အတိုင်း ရက် ၁၈၀ စာနစ်နာကြေးပေးရမှာဖြစ်ပြီး လုပ်သက်၆နှစ်မှ၁၀နှစ် ရှိသူကို နောက်ဆုံးလစာ အတိုင်း ရက်၂၄၀စာပေးရပြီး လုပ်သက်၁၀နှစ်အထက်ရှိပါက ရက်ပေါင်း ၃၆၀ စာ နစ်နာကြေးပေးရမယ်လို့ ထိုင်းအလုပ်သမားဥပဒေမှာ ပြဌာန်းထားပါတယ်။