ထိုင်းနိုင်ငံ လှချ်ဘူလိခရိုင်၊ ဒန်ထက်တကိုမြို့၊ ချောင်ဘိန်ကျေးရွာ တွင်ရှိသော ထိုင်းလုပ်ငန်းရှင်ပိုင် သစ်လုပ်ငန်းတွင်အလုပ်လုပ်နေသော မမိုးသန္တာလွင်သည် သစ်လုံးအမှုန့်ကြိတ်စက်တွင် စက်ညှပ်မိပြီး ညာဘက်လက်ပြတ်သွားကာ နစ်နာခဲ့ရမှုအပေါ် သက်ဆိုင်ရာ ဌာနကို တိုင်ကြားပြီးနောက် အလုပ်ရှင်မှပကန်စခွန်ရုံးတာဝန်ရှိသူများရှေ့တွင် နစ်နာကြေးအားတာဝန်ယူဖြေရှင်းပေးမည်ဟုဝန်ခံကတိပြုလက်မှတ်ရေးထိုးခဲ့ကြောင်း WAG အလုပ်သမားမဟာမိတ်အဖွဲ့မှသိရပါတယ်။
မြန်မာ (CI)အလုပ်သမား မမိုးသန္တာလွင်သည်အဆိုပါအလုပ်တွင် လုပ်ကိုင်နေသည်မှာ တစ်နှစ်ကျော်ခန့်ရှိပြီဖြစ်ပြီး ဇူလိုင်၂၂ရက် နံနက် ၈:၃၀ ခန့်တွင် သစ်လုံးကြီးများကို အမှုန့်ကြိတ်နေရာ သစ်လုံးငယ်တစ်ခုရောပါသွားသဖြင့် သံချောင်းနှင့် လှမ်းထုတ်လိုက်ရာ အင်္ကျီစဖြင့် ချိတ်မိကာ ညာဘက်လက်ကြိတ်မိသွားပြီး အခင်းဖြစ်သည့်နေရာတွင် ပြတ်ထွတ်သွားခဲ့ခြင်းဖြစ်ပါတယ်။
အခင်းဖြစ်ပွားပြီးနောက် လှချ်ပူလိဆေးရုံကြီးသို့ပို့ဆောင် ဆေးကုသမှုခံယူပြီးလက်ကိုပြန်ချုပ်ထားပေးခဲ့ပြီး ဇူလိုင် ၂၇ရက်တွင် ဆေးရုံဆင်းပြီး ဆေးကုသမှုစရိတ်ကို ပကန်စခွန်မရှိသောကြောင့် စက်ရုံမှသူဌေးမှရှင်းပေးခဲ့ပြီး ဆေးရုံမှဆင်းပြီးဆေးခွင့်ဖြင့်နားနေသည့်ကာလတွင် စက်ရုံဘက်မှ မည်သည့်ထောက်ပံ့ကြေးမှမပေးသည့်အပြင် ဆေးရုံမှပေးသည့်စာရွက်စာတမ်းများကိုလည်းသိမ်းဆည်းထားကြောင်းသိရပါတယ်။
"သူဌေးကပထမတုန်းကတော့လုံးဝတာဝန်ခံမှုမရှိဘူး။ ပကန်စခွန်ရုံးကိုခေါ်ပြီးတော့ သူဌေးကိုဝန်ခံကတိလက်မှတ်ထိုးခိုင်းရတာပါ။စာရွက်စာတမ်းတွေ အပေါ်မှာသူကတာဝန်ခံရမှာပေါ့။ရုံးမှာသူဌေးနဲ့တောင်ကျွန်တော်တို့ WAG အဖွဲ့စကားပြန်တွေနဲ့ပေါ့စကားအတိုက်အခံဖြစ်တယ်။အခုဆိုသူဌေးဒဏ်ငွေဆောင်ရမယ်။ဒီအလုပ်သမားကို လည်းတာဝန်အပြည့်အဝယူရမယ်ဆိုပြီး ပကန်စခွန်က နှစ်ဦးသဘောတူလက်မှတ်ထိုးခိုင်းတယ်ပေါ့။
အလုပ်သမားအနေနဲ့ဆေးကုသမှုတွေခံယူပြီး သူ့လက်ဆုံးရှုံးမှုဘယ်လောက်လဲဆိုတာတိုင်းထွာပြီးမှပကန်စခွန်နဲ့ဆရာဝန်ကနစ်နာကြေးသတ်မှတ်ပေးမှာပါ"လို့ WAG အလုပ်သမားမဟာမိတ်အဖွဲ့ခေါင်းဆောင်ကိုမုန်တိုင်းကပြောပါတယ်။
WAG အဖွဲ့သားများမှ အလုပ်သမားနှင့်အတူ အောက်တိုဘာ၂၉ရက်တွင် နယ်မြေခံပကန်စခွန်ရုံးသို့သွားရောက်ကူညီဆောင်ရွက်ပေးခဲ့ရာ ပကန်စခွန်ရုံးတာဝန်ရှိသူမှသူဌေးအားဖုန်းဆက်ခေါ်ပြီးညှိနှိုင်းဆောင်ရွက်ပေးခဲ့ရာ သူဌေးမှနစ်နာကြေးအားတာဝန်ယူဖြေရှင်းပေးမည် ဟုခံဝန်ကတိကို ပကန်စခွန်ရုံးတာဝန်ရှိသူများရှေ့တွင် နှစ်ဦးနှစ်ဖက်လက်မှတ်ရေးထိုးခဲ့ခြင်းဖြစ်ကြောင်း WAG အဖွဲ့မှသိရပါတယ်။
