လုပ်ငန်းခွင်ထဲမှာ အလုပ်ရှင်ဘက်က ဖွဲ့စည်းပေးထားတဲ့ လုပ်ငန်းခွင်ဆိုင်ရာညှိနှိုင်းရေးကော်မတီ WCC အဖွဲ့ဟာ အလုပ်ထဲမှာ အငြင်းပွားမှုတွေကို ဖြေရှင်းပေးခြင်းမရှိတာကြောင့် ကော်မတီကို ပွင့်လင်းမြင်သာစွာပြန်ဖွဲ့စည်းပေးဖို့ အပါအဝင် စက်ရုံရဲ့ စည်းကမ်းချက်အချို့ကို ဖြေရှင်းပေးဖို့ INNOVATION FOOD Co.,Ltd အလုပ်သမားတွေက တိုင်ကြားစာပေးပို့ထားတယ်လို့ သိရပါတယ်။
WCC ကို အသစ် ပြန်လည်ရွေးချယ်ဖွဲ့စည်းပေးဖို့၊ အလုပ်ကပေးထားတဲ့ ဝတ်စုံကို အိမ်ကနေ ဝတ်လာရင် ၁၅၀၀ ကျပ်ဖြတ်တောက်တာကို မလုပ်ဖို့ ၊ အလုပ်သမားရုံးက လုပ်ငန်းခွင်ထဲဝင်ရောက်စစ်ဆေးပါက ကြိုတင်သင်ကြားပေးထားတဲ့အလုပ်သမားတွေကိုသာ မေးမြန်းခြင်းမပြုဖို့ နဲ့ အလုပ်သမားတွေလစာထဲက ဖြတ်တောက်တဲ့ ဝင်ငွေခွန်ကို ဘာကြောင့် ဖြတ်တောက်တယ်ဆိုတာ ရှင်းပြဖို့ စတဲ့ အခြေအနေတွေကို ကူညီဖြေရှင်းပေးဖို့ မြန်မာနိုင်ငံ ကုန်ထုတ်နှင့် စက်မှုလက်မှု အလုပ်သမားများအဖွဲ့ချုပ် IWFM ကို အလုပ်သမားတွေက တိုင်ကြားထားတာပါ။
ရန်ကုန်တိုင်းဒေသကြီး၊ လှိုင်သာယာမြို့နယ်၊ ရွှေသံလွင်စက်မှူဇုန်၊ ချင်းတွင်းလမ်း မှာ ဖွင့်လှစ်ထားတဲ့ အဆိုပါ စက်ရုံမှာ အလုပ်သမား ၈၀၀ ခန့် နဲ့ Sunday ကော်ဖီမစ်ထုတ်လုပ်နေတာပါ။
"အလုပ်သမားအခွင့်အရေးတွေချိုးဖောက်ခံနေရလို့ အကူအညီတောင်းချင်တာပါ၊ အလုပ်ထဲက အလုပ်သမားတိုင်း တစ်လကို ၄ သောင်းကနေ ၆ သောင်းကျော်အဖြတ်ခံရတယ် ဘာကြောင့်ဖြတ်လဲဆိုတာ မရှင်းပြဘူး။ စာရွက်ပေါ်မှာ Tax amt ဆိုတာပဲရေးထားတယ် ဘာကြောင့်ဒီလိုဖြတ်တောက်လဲဆိုတာ သိသင့်တယ်ထင်ပါတယ်။ နောက်ပြီး WCC မှာ အလုပ်ရှင်စိတ်ကြိုက်လူတွေပဲခန့်ထားပြီး တခုခုဆို ဖြေရှင်းပေးဖို့ထက် အလုပ်မပြုတ်အောင်ဘဲနေနေရလို့ အကူအညီမဖြစ်ဘူး ဒါကြောင့် အလုပ်သမားတွေရဲ့ ဆန္ဒအတိုင်း ပြန်ရွေးချယ်ပေးစေချင်တယ်"လို့ အလုပ်သမားကပြောပါတယ်။
လုပ်ငန်းခွင်ထဲမှာ သတ်မှတ်ထားတဲ့ အလုပ်ချိန်အတိုင်းမဟုတ်ဘဲ ကုန်ကြမ်းရရှိမှုအပေါ်မူတည်ပြီး ပြောင်းလဲသတ်မှတ်ပြီး အလုပ်ချိန် နောက်ကျတဲ့အကြောင်းပြချက်နဲ့ ဌာနပြောင်းတာ ဖယ်ရီမစီစဉ်ပေးတာတွေ၊ အလုပ်သမားရုံးက လာရောက် စစ်ဆေးပါကလည်း အခြားအလုပ်သမားတွေကို ပြောခွင့်ပေးဖို့ ၊ ယူနီဖောင်းကို စက်ရုံရောက်မှ မဝတ်ဘဲ အိမ်ကကြိုတင်ဝတ်လာပါက ငွေကြေးဖြတ်တောက်တာ စတဲ့ စည်းကမ်းချက်တွေကို အလုပ်သမားတွေနဲ့ သင့်တော်တဲ့ အခြေအနေမျိုးနဲ့ ညှိနှိုင်းပေးဖို့ လိုလားနေတယ်လို့ အလုပ်သမားတွေရဲ့တိုင်ကြားချက်မှာဖော်ပြထားပါတယ်။
