ရွှေပြည်သာမြို့နယ်မှာ ရှိတဲ့ Myanmar Sunview ကုမ္ပဏီပိုင် Myanmar Sunview 2 (ဆိုလာမိုဒါ (၂)) အထည်ချုပ်စက်ရုံမှာ ၂၀၂၁ခုနှစ်၊ မတ်လ ၁၄ ရက်နေ့က အကြောင်းအရင်းမသိရတဲ့ မီးလောင်မှုတစ်ခုဖြစ်ပွားခဲ့ပြီး အလုပ်သမား ၁၂၀၀ ကျော်ဟာ ဘယ်နေ့အလုပ်ပြန်ဆင်းရမယ် ဆိုတဲ့ အာမခံချက် ရေရေရာရာမရရှိသလို ရသင့်ရထိုက်တဲ့ နစ်နာကြေးတစ်စုံတရာ ရရှိခြင်းလည်းမရှိဘဲ ၉ လကျော်ကြာထိတိုင်အောင် ဒုက္ခပင်လယ်ဝေကြရတယ်လို့အလုပ်သမားရေးတက်ကြွလှုပ်ရှားသူတွေနဲ့အဆိုပါစက်ရုံအလုပ်သမားတွေကဆိုပါတယ်။
"စက်ရုံစပိတ်တော့လစာက ၁၆ ရက်စာကျန်တယ်စက်ရုံမဖွင့်ဘူးပိတ်မယ်ဆိုအလုပ်သမားနစ်နာကြေးတွေသူတို့ပေးရမှာလေအဲ့ဒါကိုလဲမပေးဘူးခုညှိနေတာ၁လရှိပြီ"လို့အဆိုပါစက်ရုံအလုပ်သမားများအရေးလိုက်ပါဆောင်ရွက်နေတဲ့သွေးစည်းညီညွတ်သောအလုပ်သမားသမဂ္ဂများအဖွဲ့ချုပ်(STUM)မှဒေါ်မျိုးအေးကပြောပါတယ်။
အလုပ်သမားရေးတက်ကြွဆောင်ရွက်သူတွေနဲ့အလုပ်သမားတွေညှိနှိုင်းခဲ့ပေမယ့်စက်ရုံဖက်က တရုတ်သံရုံးကိုအကြောင်းကြားပြီးထုချေသွားမယ်လို့ပြန်လည်တုန့်ပြန်ထားတယ်လို့လဲသိရပါတယ်။
"အလုပ်သမားတွေကစက်ရုံဖွင့်ရင်အလုပ်ရမယ်ဆိုပြီးစောင့်နေတာစက်ရုံပြင်တာလဲတွေ့တော့ပိုင်ရှင်ကိုမေးတာဘာမှမပြောလို့ကျန်တဲ့လစာစတောင်းတာကစတာပဲအဲ့ဒါကိုမနေ့ကမှပိတ်တယ်လို့ပြောတာသူတို့ကနစ်နာကြေးပေးရမှာကိုပေးကိုမပေးချင်တာ"လို့ဒေါ်မျိုးအေးကဆက်ပြောပါတယ်။
ဒီကိစ္စနဲ့ပတ်သက်ပြီးSTUMက- စက်ရုံမီးလောင်မှုဟာ အာမခံကြေးရလိုတာကြောင့် ပိုင်ရှင်ကိုယ်တိုင် တမင်ရည်ရွယ်မီးရှို့ခဲ့တာလို့ အချို့က သုံးသပ်ကြတာလည်း ရှိပေမယ့် အတည်ပြုနိုင်ခြင်းမရှိသလို မီးလောင်ရတဲ့ အကြောင်းအရင်းကိုလည်း သိရှိရခြင်း မရှိပါဘူး။ စက်ရုံပိုင်ရှင်ကတော့ အာမခံကြေးအနေနဲ့ရရှိတဲ့ ငွေကြေးတွေကို ရယူထားပြီး မီးလောင်သွားတဲ့ စက်ရုံကို ကိုးလကျော်ကြာတဲ့အထိ ပြန်လည်ပြင်ဆင်လည်ပတ်ခြင်းလည်းမရှိ၊ အလုပ်သမားတွေကို နစ်နာကြေးပေးပြီး အလုပ်ရပ်နားခြင်းလည်းမရှိဘဲ တာဝန်ရှောင်လွှဲပြီး အချိန်ဆွဲထားခဲ့တာ ဖြစ်ပါတယ်။
လက်ရှိမှာတော့ စက်ရုံကို ပြန်လည်ပြင်ဆင်ဖို့ ကြိုးစားလာတာ တွေ့ရပါတယ်။ ဒါပေမယ့် အလုပ်သမား ၁၂၀၀ ကျော်ရဲ့ နစ်နာကြေးကိစ္စတွေကို တာဝန်ယူခြင်းမရှိတဲ့အပြင် အလုပ်သမားတွေကို အလုပ်ပြန်ခန့်ဖို့ကိုလည်း အာမခံချက်ပေးခြင်း မရှိပါဘူး။ ဒီကိစ္စအပေါ် ရသင့်ရထိုက်တဲ့ အလုပ်သမားအခွင့်အရေး အပြည့်အဝရရှိရေးအတွက် စက်ရုံအလုပ်သမားတွေနဲ့ အလုပ်သမားသမဂ္ဂအဖွဲ့ချုပ်တစ်ခုဖြစ်တဲ့ “သွေးစည်းညီညွတ်သော သမဂ္ဂများအဖွဲ့ချုပ် (မြန်မာ) - STUM” တို့က ဦးဆောင်ပြီး တောင်းဆိုညှိနှိုင်းမှုတွေ၊ တိုက်ပွဲဝင်မှုတွေ လုပ်ဆောင်လျက်ရှိပါတယ်။လို့ထုတ်ပြန်ကြေညာထားပါသေးတယ်။
"သူတို့ကတော့ကျမတို့ဖက်ကိုတိုင်ချင်တဲ့နေရာတိုင်ဆိုတဲ့သဘောပြောတယ် ကျမတို့ကလဲဒီကိစ္စနဲ့ပတ်သက်ပြီးကျမတို့အလုပ်သမားရပိုင်ခွင့်ကျမတို့ကိုယ်တိုင်တောင်းမယ်"လို့ဒေါ်မျိုးအေးကပြောပါတယ်။
အဆိုပါစက်ရုံပိုင်ရှင်မှာတရုတ်နိုင်ငံသားတဦးဖြစ်ပြီးသူပိုင်ဆိုင်သည့် Myanmar Sunview-1(ဆိုလာမိုလာ၁)အထည်ချုပ်စက်ရုံကိုလှိုင်သာယာနဲ့ Myanmar Sunview-3(ဆိုလာမိုလာ၃)တို့ကိုပဲခူးမြို့မှာဆက်လက်လည်ပတ်လုပ်ကိုင်နေတယ်လို့သိရပါတယ်။
