ရန်ကုန်တိုင်းဒေသကြီး၊ ရွှေပြည်သာမြို့နယ်၊ ဝါးတစ်ရာစက်မှုဇုန်၊ မဟာမြိုင်လမ်း၊ အမှတ် --- မှာ ဖွင့်လှစ်ထားတဲ့ True Green City ကော်စေ့စက်ရုံ ပိုင်ရှင်က စက်ရုံအတွင်း ဖွဲ့စည်းထားတဲ့ အလုပ်သမား သမဂ္ဂအဖွဲ့ကို ဖျက်သိမ်းဖို့ ဖိအားပေး ခြိမ်းခြောက်ခံရတယ်လို့ သိရပါတယ်။
အဆိုပါကော်စေ့စက်ရုံ အလုပ်သမားတွေဟာ ဒေးကြေး ၆၈၀၀ ကျပ်အစား ဒေးကြေး ၁၀၀၀၀ ကျပ်သို့ တိုးမြှင့်ပေးဖို့တောင်းဆိုရာ စက်ရုံတွင်းသမဂ္ဂအနေဖြင့်ဦးဆောင်တောင်းဆိုခဲ့လို့ စက်ရုံပိုင်ရှင်က သမဂ္ဂအဖွဲ့ကို ဖျက်သိမ်းပေးဖို့နဲ့ သမဂ္ဂကို ဖျက်သိမ်းပေးမှသာ ဒေးကြေးတိုးပေးမှာလို့ပြောဆိုခဲ့တာ လို့သိရပါတယ်။
ဒါ့အပြင်စက်ရုံအတွင်းဖွဲ့စည်းထားတဲ့ သမဂ္ဂကို မပျက်ပျက်အောင် ဖျက်မယ်လို့ပါ ထည့်သွင်းပြောဆိုခဲ့တာလို့လည်း သိရပါတယ်။
"သမဂ္ဂအဖွဲ့ကို ဖျက်ပေး၊ မင်းတို့ဖျက်ပေးရင် ဒေးကြေးမကဘူး။ ဘာမဆိုလုပ်ပေးမယ်။သမဂ္ဂရှိနေရင် ဘာမှမလုပ်ပေးနိုင်ဘူး။အစိုးရပေးခိုင်းတိုင်းလည်း ငါတို့မပေးနိုင်ဘူး။ရုံးကိုသွားတိုင်ရင်လည်း ဂရုမစိုက်ဘူး။အစိုးရက ငါတို့စက်ရုံမှာ ရင်းနှီးမြှုပ်နှံထားတာမရှိဘူး။မင်းတို့သမဂ္ဂအဖွဲ့စည်း ဖျက်မယ်ဆိုရင် ဘယ်လောက်ပေးရပေးရ။ငါတို့ကို လျှော့မတွက်နဲ့ မင်းတို့အဖွဲ့အစည်းကို မပျက်ပျက်အောင် ဖျက်မှာ"လို့ ခြိမ်းခြောက်ပြောဆိုခဲ့တယ်လို့ သိရပါတယ်။
မြန်မာနိုင်ငံ အလုပ်သမားများသမဂ္ဂဥပဒေ(၂၀၁၁) အရ အလုပ်သမားတွေဟာ တရားဝင်သမဂ္ဂများဖွဲ့စည်းခွင့်၊ အဖွဲ့ဝင်ခွင့်နဲ့ သမဂ္ဂဆိုင်ရာလှုပ်ရှားမှုတွေတရားဝင်ပြုလုပ်ခွင့်ရှိသော်လည်း True Green စက်ရုံပိုင်ရှင်ကတော့ အလုပ်သမားတွေရဲ့ဥပဒေပါအခွင့်အရေးတွေကို ပိတ်ပင်တဲ့အပြင် သမဂ္ဂကို ဖြိုခွင်းဖို့ကိုပါ ခြိမ်းခြောက်မှုတွေ ပြုလုပ်နေတာဖြစ်ပါတယ်။
အဆိုပါ True Green ကော်စေ့စက်ရုံပိုင်ရှင်ရဲ့ ယခုကဲ့သို့ သမဂ္ဂဖြိုခွင်းရန်ခြိမ်းခြောက် ကြိုးပမ်းလာမှုအပေါ် STUM အနေဖြင့် ပြင်းထန်စွာရှုတ်ချသလို စက်ရုံရဲဲ့ လုပ်ရပ်များကို မှတ်တမ်းတင်စောင့်ကြည့်သွားမယ်လို့လည်း ဆိုပါတယ်။
